ນາຍົກລັດຖະມົນຕີໄທກ່າວວ່າ ທ່ານໝັ້ນໃຈວ່າຈະມີການ
ພົບເຫັນວ່າ ກໍາປູເຈຍ ເປັນຜູ້ຜິດ ກ່ຽວກັບການປະທະກັນ
ຄັ້ງຫຼ້າສຸດ ໃນເຂດຊາຍແດນລະຫວ່າງກັນນັ້ນ ເວລາລັດ
ຖະມົນຕີຕ່າງປະເທດຂອງທັງສອງປະເທດໄປສະເໜີຂໍ້ໂຕ້
ແຍ້ງຂອງພວກຕົນ ຕໍ່ສະພາຄວາມໝັ້ນຄົງສະຫະປະຊາ
ຊາດໃນວັນຈັນມື້ນີ້.
ເວລານີ້ ທ່ານກະສິດ ພິຣົມ ລັດຖະມົນຕີການຕ່າງປະ
ເທດໄທ ແລະຄູ່ຕໍາແໜ່ງ ຈາກກໍາປູເຈຍ ທ່ານ Hor
Namhong ກໍາລັງຢູ່ທີ່ນະຄອນ New York ເພື່ອອະທິ
ບາຍກ່ຽວກັບວ່າ ແມ່ນຫຍັງເປັນສາເຫດທີ່ນໍາໄປສູ່ການ
ປະທະກັນ 4 ມື້ໃນເຂດຊາຍແດນເມື່ອຕົ້ນເດືອນນີ້ ທີ່ໄດ້
ເຮັດໃຫ້ມີຜູ້ເສຍຊີວິດຢ່າງນ້ອຍ 8 ຄົນ ແລະຊາວບ້ານ
ຫລາຍກ່ວາ 20,000 ຄົນ ຕ້ອງໄດ້ຍົກຍ້າຍຫຼົບໜີອອກ ຈາກບ້ານເຮືອນຂອງຕົນ.
ນາຍົກລັດຖະມົນຕີກໍາປູເຈຍທ່ານ Hun Sen ເປັນຜູ້
ຮ້ອງຂໍໃຫ້ສະພາຄວາມໝັ້ນຄົງຈັດກອງປະຊຸມສຸກເສີນຂຶ້ນ ໂດຍຈົ່ມວ່າກອງກໍາລັງຂອງໄທ ໄດ້ບຸກລຸກປະເທດຂອງທ່ານ.
ແຕ່ທ່ານ ອະພິສິດ ເວດຊາຊິວະ ນາຍົກລັດຖະມົນຕີໄທ ໄດ້ກ່າວຜ່ານທາງໂທລະພາບ
ໃນວັນອາທິດວານນີ້ວ່າ ປະເທດຂອງທ່ານຈະສາມາດຊີ້ໃຫ້ເຫັນວ່າ ທາງກໍາປູເຈຍເປັນ
ຜູ້ເລີ່ມຕົ້ນການປະທະກັນກ່ອນ.
ທ່ານ ອະພິສິດ ຍັງກ່າວຕື່ມວ່າ ການເຈລະຈາສອງຝ່າຍບໍ່ແມ່ນການໄກ່ເກ່ຍຈາກພາຍ
ນອກ ແມ່ນຈໍາເປັນຫລາຍກ່ວາ ເພື່ອແກ້ໄຂບັນຫາຜິດຖຽງກັນເລື້ອງຊາຍແດນທີ່ມີມາ
ເປັນເວລາດົນນານແລ້ວ ລະຫວ່າງສອງປະເທດນັ້ນ.
