ພວກເຈົ້າໜ້າທີ່ກຳປູເຈຍເວົ້າວ່າ ກໍາປູເຈຍໄດ້ມອບສັນຍາ
ໃຫ້ບໍລິສັດພັດທະນາທີ່ດິນ ເກົາຫລີໃຕ້ບໍລີສັດນຶ່ງເປັນຜູ້ຮັບ
ເໝົາກໍ່ສ້າງສະໜາມບິນສາກົນແຫ່ງໃໝ່ ເພື່ອຮອງຮັບພວກ
ນັກທ່ອງທ່ຽວທີ່ໄປທ່ຽວຊົມປູສະນີຍະສະຖານ ອັງກໍວັດ
ທີ່ມີຊື່ສຽງນັ້ນ.
ບໍລິສັດພັດທະນາທີ່ດິນ Lees A&A ກ່າວໃນວັນພຸດວານ
ນີ້ວ່າ ຕົນມີແຜນການທີ່ຈະໃຊ້ເງິນ 1 ພັນລ້ານໂດລາ ເຂົ້າ
ໃນການກໍ່ສ້າງໂຄງການດັ່ງກ່າວ ແລະວ່າສະໜາມບິນແຫ່ງ
ໃໝ່ນີ້ ເວລາສ້າງສໍາເລັດແລ້ວນັ້ນ ຈະສາມາດຮອງຮັບຄົນ
ໂດຍສານໄດ້ 15 ລ້ານ 5 ແສນຄົນໃນແຕ່ລະປີ.
ບໍລິສັດ Lees A&A ເວົ້າວ່າ ການກໍ່ສ້າງຈະເລີ້ມຕົ້ນຂຶ້ນໃນທ້າຍປີໜ້າ ແລະ ພາກທຳອິດຈະສ້າງໃຫ້ສໍາເລັດໃນປີ 2012. ນອກນັ້ນ ບໍລິສັດເວົ້າອີກວ່າ ຕົນຍັງມີແຜນທີ່ຈະຂະຫຍາຍເດີ່ນອອກໄປອີກ ໃນປີ 2032.
ພວກເຈົ້າໜ້າທີ່ໃນແຂວງສຽມຣຽບຂອງກຳປູເຈຍເວົ້າວ່າ ສະໜາມບິນແຫ່ງໃໝ່ນີ້ຈະຖືກສ້າງຢູ່ໄກຈາກເຂດຄຸ້ມອັງກໍວັດ ໄປທາງຕາເວັນອອກປະມານ 60 ກິໂລແມັດ.
ບໍລິສັດພັດທະນາທີ່ດິນດັ່ງກ່າວຍັງແຈ້ງໃຫ້ຊາບວ່າ ທາງບໍລິສັດກໍາລັງທຳການ ເຈລະຈາກັບພວກນັກລົງທຶນ ທີ່ມີຄວາມສົນໃຈລົງທຶນໃນໂຄງການນີ້ ເພື່ອຫາທຶນ 500 ລ້ານໂດລາມາ ກໍ່ສ້າງພາກທໍາອິດຂອງໂຄງການ.
