ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ກຳ​ປູ​ເຈຍ ຕັດ​ສິນ​ຂັງ​ຄຸກ​ນັກ​ປຸກ​ລະ​ດົມສີ​ຂຽວ ສຳ​ລັບ "ການ​ວາງ​ແຜນ" ກໍ່​ອາ​ຊະ​ຍາ​ກຳ​ໃນ​ການ​ເຄື່ອນ​ໄຫວ​ຂອງ​ເຂົາ​ເຈົ້າ


​ນັກ​ເຄື່ອນ​ໄຫວ​ສິ່ງ​ແວດ​ລ້ອມ ກຳ​ປູ​ເຈຍ ຮ້ອງ​ໄຫ້ຫຼັງ​ຈາກ​ສານ ກຳ​ປູ​ເຈຍ ປະ​ກາດ​ຄຳ​ຕັດ​ສິນ​ຕໍ່​ບັນ​ດາ​ນັກ​ເຄື່ອນ​ຫວ​ຈາກ​ກຸ່ມ​ສິ່ງ​ແວດ​ລ້ອມ ກຳ​ປູ​ເຈຍ Mother Nature, ໃນ​ຂໍ້​ກ່າວ​ຫາ​ວາງ​ແຜນ​ຕໍ່​ຕ້ານ​ລັດ​ຖະ​ບານ ແລະ ດູ​ໝິ່ນ​ກະ​ສັດ, ນະ​ຄອນຫຼວງ ພະ​ນົມ​ເປັນ, ກຳ​ປູ​ເຈຍ, 2 ກໍ​ລະ​ກົດ 2024.
​ນັກ​ເຄື່ອນ​ໄຫວ​ສິ່ງ​ແວດ​ລ້ອມ ກຳ​ປູ​ເຈຍ ຮ້ອງ​ໄຫ້ຫຼັງ​ຈາກ​ສານ ກຳ​ປູ​ເຈຍ ປະ​ກາດ​ຄຳ​ຕັດ​ສິນ​ຕໍ່​ບັນ​ດາ​ນັກ​ເຄື່ອນ​ຫວ​ຈາກ​ກຸ່ມ​ສິ່ງ​ແວດ​ລ້ອມ ກຳ​ປູ​ເຈຍ Mother Nature, ໃນ​ຂໍ້​ກ່າວ​ຫາ​ວາງ​ແຜນ​ຕໍ່​ຕ້ານ​ລັດ​ຖະ​ບານ ແລະ ດູ​ໝິ່ນ​ກະ​ສັດ, ນະ​ຄອນຫຼວງ ພະ​ນົມ​ເປັນ, ກຳ​ປູ​ເຈຍ, 2 ກໍ​ລະ​ກົດ 2024.

ສານ​ກຳ​ປູ​ເຈຍ ໃນ​ວັນ​ອັງ​ຄານ​ວານນີ້​ໄດ້​ຕັດ​ສິນ​ລົງ​ໂທດ​ຂັງ​ຄຸກ​ນັກ​ອະ​ນຸ​ລັກ​ສິ່ງ​ແວດ​ລ້ອມ 10 ຄົນ​ລະ​ຫວ່າງ 6 ແລະ 8 ປີ​ສຳ​ລັບ​ການ​ວາງ​ແຜນ​ທີ່​ຈະ​ກໍ່​ອາ​ຊະ​ຍາ​ກຳ​ໃນ​ການ​ເຄື່ອນ​ໄຫວ​ຂອງ​ເຂົາ​ເຈົ້າ, ເຊິ່ງ​ເປັນ​ການ​ປາບ​ປາມ​ທາງ​ກົດ​ໝາຍ​ຄັ້ງຫຼ້າ​ສຸດ​ຕໍ່​ບັນ​ດາ​ນັກປຸກ​ລະ​ດົມ​ສີ​ຂຽວ​ຂອງ​ປະ​ເທດ.

ບັນ​ດາ​ນັກປຸກ​ລະ​ດົມຈາກ​ກຸ່ມ Mother Nature, ເຊິ່ງ​ແມ່ນ​ນຶ່ງ​ໃນ​ບັນ​ດາ​ກຸ່ມ​ນັກ​ເຄື່ອນ​ໄຫວ​ສິ່ງ​ແວດ​ລ້ອມ​ສອງ​ສາມ​ກຸ່ມ, ໄດ້​ປະ​ຕິ​ເສດ​ຂໍ້​ກ່າວ​ຫາ​ຕ່າງໆ, ເຊິ່ງ​ເຂົາ​ເຈົ້າ​ເວົ້າ​ວ່າ​ຖືກ​ກະ​ຕຸ້ນ​ທາງ​ການ​ເມືອງ.

ທ່ານ ແອມ ແຊມ ອາດ, ຜູ້​ອຳ​ນວຍ​ການ ການ​ປະ​ຕິ​ບັດ​ການ​ຂອງ​ກຸ່ມ LACIDHO ໄດ້​ກ່າວ​ຕໍ່​ອົງ​ການ​ຂ່າວ AFP ວ່າ​ສານ​ໄດ້​ຕັດ​ສິນ​ລົງ​ໂທດ​ຂັງ​ຄຸກ​ບັນ​ດາ​ນັກ​ເຄື່ອນ​ໄຫວ​ຈາກ 6 ຫາ 8 ປີ.

ທ່ານ​ໄດ້​ກ່າວ​ວ່າ​ສາມ​ຄົນ​ໃນ​ນັ້ນ​ລວມ​ມີ​ຜູ້​ຮ່ວມ​ກໍ່​ຕັ້ງ​ກຸ່ມ Mother Nature, ທ່ານ ອາ​ເລ​ຮານ​ໂດ​ຣ ກອນ​ຊາ​ເລສ ເດ​ວິດ​ສັນ, ຜູ້​ຖື​ສັນ​ຊາດ ສ​ເປນ ທີ່​ຖືກ​ເນ​ລະ​ເທດ​ອອກ​ຈາກ ກຳ​ປູ​ເຈຍ ໃນ​ປີ 2015, ຖືກ​ຕັດ​ສິນ​ໂທດ​ຂັງ​ຄຸກ 8 ປີ​ສຳ​ລັບ​ການ​ວາງ​ແຜນ​ຕໍ່​ຕ້ານ​ລັດ​ຖະ​ບານ ແລະ ໝິ່ນ​ປະ​ໝາດ​ກະ​ສັດ.

ອີກ 7 ຄົນ​ແມ່ນ​ຖືກ​ຕັດ​ສິນ​ຂັງ​ຄຸກ 6 ປີ​ໃນ​ຂໍ້​ກ່າວ​ຫາ​ວາງ​ແຜນ​ທີ່ບໍ່​ໄດ້​ຖືກ​ລະ​ບຸ​ໄວ້.

ຈຳ​ເລີຍ 6 ຄົນ​ຖືກ​ຕັດ​ສິນ​ໂທດ​ໂດຍບໍ່​ໄດ້​ໄປ​ຂຶ້ນ​ສານ, ໃນ​ຂະ​ນ​ະ​ທີ່ 4 ຄົນ​ຜູ້​ທີ່​ໄດ້​ໄປ​ປາ​ກົດ​ຕົວ​ແມ່ນ​ຖືກ​ຈັບ​ໂດນ​ຕຳຫຼວດ​ຢູ່ນອກ​ສານ ແລະ ຖືກ​ນຳ​ຕົວ​ໄປ, ອີງ​ຕາມ​ນັກ​ຂ່າວ​ AFP ຄົນ​ນຶ່ງ.

ອົງ​ການ​ສິ້ງ​ຊອມ​ສິດ​ທິ​ມະ​ນຸດ ຫຼື Human Rights Watch ໃນ​ເດືອນ​ແລ້ວນີ້​ໄດ້​ກ່າວ​ປະ​ນາມ​ການ​ດຳ​ເນີນ​ຄະ​ດີ​ດັ່ງ​ກັບ​ການ​ພະ​ຍາ​ຍາມ​ທີ່​ຈະ “ປິດ​ປາກ​ການ​ຕຳ​ໜິ​ຕິ​ຕຽນ​ນະ​ໂຍ​ບາຍ​ຂອງ​ລັດ​ຖະ​ບານ.”

ອົງ​ການ​ສິ້ງ​ຊອມ​ສິດ​ທິ​ມະ​ນຸດ​ກ່າວ​ວ່າ ກຸ່ມ Mother Nature ໄດ້​ທຳ​ການ​ປຸກ​ລະ​ດົມ​ກວ່າ​ນຶ່ງ​ທົດ​ສະ​ວັດ​ຕໍ່​ໂຄງ​ການ​ພື້ນ​ຖານ​ໂຄງ​ລ່າງ​ທີ່​ສ້າງ​ຄວາມ​ເສຍ​ຫາຍ ແລະ “ໄດ້​ເປີດ​ເຜີຍ​ການ​ສໍ້​ລາດ​ບັງຫຼວງ​ໃນ​ການ​ບໍ​ລິ​ຫານ​ແຫຼ່ງ​ຊັບ​ພະ​ຍາ​ກອນ​ທຳ​ມະ​ຊາດ​ຂອງ ກຳ​ປູ​ເຈຍ.”

ຂໍ້​ກ່າວ​ຫາ​ຕໍ່​ນັກ​ເຄື່ອນ​ໄຫວ 10 ຄົນ​ນັ້ນ​ແມ່ນ​ກ່ຽວ​ຂ້ອງ​ກັບ​ການ​ເຄື່ອນ​ໄຫວ​ຂອງ​ກຸ່ມ Mother Nature ລະ​ຫວ່າງ​ປີ 2012 ຫາ 2021.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG