ລິ້ງ ສຳຫລັບເຂົ້າຫາ

ນະຄອນຫລວງຂອງກໍາປູເຈຍ ພັດທະນາຕົນເອງ ໃຫ້ທັນສະໄໝຂຶ້ນນັບມື້

  • ທອງປານ ເທບວົງສາ

ຮ່ອງຮອຍແຫ່ງການພັດທະນາຕົນເອງ ຂອງນະຄອນຫລວງພະນົມເປັນ ຂອງກໍາປູເຈຍ.

ເມື່ອສິບປີກ່ອນ​ນີ້ ໂຄງລ່າງພື້ນຖານໃນນະຄອນຫລວງພະນົມເປັນຂອງກໍາປູເຈຍ ແມ່ນມີ ສະພາບການຊຸດໂຊມຫລາຍ ເຊັ່ນໄຟຟ້າຈະມອດດັບເປັນປະຈໍາ. ຝົນຕົກໜັກ ແລະລະບົບ ໂທລະ​ຄົມມະນາຄົມທີ່​ບໍ່​ດີໄດ້​ພາ​ໃຫ້ ການພານິດຕ້ອງຊັກຊ້າ ແລະມີການຕິດ​ຕໍ່​ກັບນອກ ປະເທດຢ່າງຈໍາກັດທີ່ ສຸດໃນເວລານັ້ນ. ແຕ່ໃນໄລຍະນຶ່ງທົດສະວັດຜ່ານມາ ຖະໜົນຫົນທາງ​ໃໝ່ ແລະຕຶກອາຄານສູງໆ ໄດ້ປ່ຽນແປງສະພາບຂອງ​ໂຕ​ນະຄອນຫລວງພະນົມເປັນໄປ. ແລະໃນ ເດືອນ​ແລ້ວນີ້ ກໍໄດ້ມີ​ການເປີດຕະຫລາດຫຸ້ນ​ແຫ່ງທໍາອິດຂອງປະເທດ ແລະເປີດ ໂຮງຊີ​ເນ​ມາ​ແບບ Multiplex ທີ່​ມີ​ບ່ອນ​ສາຍ ຮູບ​ເງົາ​ຫລາຍໆ​ບ່ອນ ຢູ່​ໃນ​ຕຶກ​ດຽວ​ກັນ ຜູ້ສື່ ຂາວວີໂອເອ Robert Carmichael ມີລາຍງານກ່ຽວກັບຄວາມທັນສະໄໝ ທີ່ກໍາລັງປ່ຽນ ໂສມໜ້າຂອງເມືອງຫລວງພະນົມເປັນ ຂອງກໍາປູເຈຍ ຊຶ່ງທອງປານຈະ​ນໍາ​ສະ​ເໜີລາຍລະອຽດ ໃນອັນດັບຕໍ່ໄປ

ນະຄອນຫລວງພະນົມເປັນຂອງ​ກໍາປູ​ເຈຍ ຍັງມີໂຮງ​ຊິ​ເນຫລືໂຮງສາຍ​ຮູບ​ເງົາ ​ໄວ້​ບໍລິການ
ຄົນ​ເບິ່ງ​ຫລາ​ຍ​ແຫ່ງ ທີ່​ສ້າງ​ຂຶ້ນ​ໃນສະ​ໄໝຊຸມ ປີ 1950 ແຕ່​ໂຮງສາຍຊິເນ​ເຫລົ່າ​ນີ້ສາຍ​ແຕ່
ຮູບ​ເງົາທີ່ສ້າງຂຶ້ນຢູ່ພາຍໃນປະເທດ ທີ່​ມີຈໍານວນນ້ອຍໆ ຫລືຊິເນທີ່ນໍາເຂົ້າມາແຕ່​ໄທທີ່​ແປ
ເປັນພາສາຂະ​ເໝນ. ​ແລະ​ເວລາ​ນີ້ ຮູບ​ເງົາໃນລະບົບແຜ່ນດີວີດີໄດ້​ເຂົ້າ​ມາຕີຕະຫລາດ ​ສົ່ງ​
ຜົນໃຫ້ພວກທີ່​ມັກເບິ່ງຊິເນ ພາກັນຢູ່ບ້ານ​ ເບິ່ງ​ດີ​ວີ​ດີຫລາຍກວ່າ.

ກ່ອນ​ໜ້າເດືອນກໍລະກົດປີນີ້ ວິທີດຽວທີ່ຊາວ​ຂະ​ເໝນຈະໄດ້​ເບິ່ງຊິເນເລຶ່ອງດັງລ່າສຸດຂອງ
Hollywood ຢູ່ໃນໂຮງຊິເນນັ້ນ ກໍ​ແມ່ນຕ້ອງໄດ້ບິນໄປເບິ່ງຢູ່ໄທ ຫລືຫວຽດນາມພຸ້ນ.

ແຕ່ມາບັດນີ້ ພຽງ​ແຕ່ເສຍເງິນ 6 ໂດລາຫລື​ປະມານ 45,000 ກີບ​ເທົ່າ​ນັ້ນ ​ເຂົາ​ເຈົ້າກໍຈະ
ສາມາດເຂົ້າໄປເບິ່ງຊິເນໃນຫ້ອງແອໃໝ່ໆ ລະບົບສາມຈໍ ຊິເນມາສະໂຄບ ພ້ອມດ້ວຍ
popcorn ຫລືເຂົ້າຕອກແຕກນຶ່ງຫໍ່ ແລ້ວກໍນັ່ງເບິ່ງໜັງກັງຟູແພນດາ ພາກສອງ ໃນລະ
ບົບ 3D ຫລືສາມມິຕິ.

ນາຍ ​ໄມ​ເກິ​ລ ​ໄຊ(Michael Chai) ຜູ້ອໍານວຍການທີ່ບໍລິສັດ WesTec Media ທີ່ສ້າງ
ໂຮງຊິເນ​ແຫ່ງ​ນີ້ ແນເປົ້າໝາຍໃສ່ຕະຫລາດຊາວໜຸ່ມກໍາປູເຈຍ ທີ່​ຮອບ​ຮູ້ທາງອິນເທີເນດ.
ນາຍ Michael Chai ກ່າວ​ວ່າ:

ຕົວຢ່າງ ຖ້າຂ້ອຍເບິ່ງ​ໜ້າເວັບ​ສັງຄົມ ເຟສບຸກນັ້ນ ​ແມ່ນຂ້ອຍຈະເບິ່ງຈໍານວນຜູ້
ທີ່​ເຂົ້າ​ໄປໃຊ້ເວັບ​ນີ້ ຄືໃນເດືອນພຶດສະພາປີ 2010 ມີພຽງປະມານ 50,000 ຄົນ
ທີ່ມີຊື່ຢູ່ໃນເຟສບຸກ. ຕົກມາເດືອນພຶດສະພາຂອງປີ 2011 ນີ້ ມີເກືອບ 400,000
ຄົນ. ດັ່ງນັ້ນ ສະເພາະແຕ່ຕົວເລກນັ້ນຢ່າງດຽວ ກໍສະ​ແດງ​ໃຫ້​ເຮົາເຫັນ​ແລ້ວວ່າ
ມີການເຕີບ​ໂຕ​ຢ່າງ​ຫລວງຫລາຍ ແລະພວກຄົນສ່ວນຫລາຍທີ່ໃຊ້ເຟສບຸກນັ້ນ ແມ່ນຕິດຕໍ່ລົມກັນເປັນພາສາອັງກິດແທບທັງນັ້ນ.”

ເຖິງ​ແມ່ນ​ວ່າ ມັນ​ອາດ​ຕ້ອງ​ໃຊ້​ເວລາ​ຫລາຍ​ມື້​ເຕີບ​ ສໍາລັບ​ຊາວ​ກໍາປູ​ເຈຍສ່ວນ​ໃຫຍ່ ​ກວ່າ​ຈະ
ຫາ​ເງິນ​ໄດ້​ຫົກ​ໂດ​ລາ ສໍາລັບຄ່າ​ປີ້​ຊິ​ເນນັ້ນ​ກໍ​ຕາມ ​ແຕ່ພວກ​ເຈົ້າຂອງ​ໂຮງ​ຊິ​ເນ​ທັງຫລາຍກໍ​
ພາກັນຫວັງ​ວ່າ​ ພວກ​ຄົນ​ຖານະ​ປານ​ກາງ​ທີ່​ມີ​ຈໍານວນ​ຫລາຍ​ຂຶ້ນນັບ​ມື້​ນັ້ນ ​ຈະ​ມາເປັນລູກ​ຄ້າ ​ປະ​ຈໍາ.


Michael Chai​ ຫົວໜົາບໍລິສັດ WesTec Mediaຢືນຢູ່ທ່າມກາງຮູບກະດາດຂອງດາຣາ
ຮູບເງົາເລື່ອງ
X-Men: First Class, ທີ່ກຳລັງສາຍຢູ່ທີ່ໂຮງສາຍຮູບເງົາ ແບບ multiplex ແຫ່ງທຳ
ອິດທີ່ບໍລິສັດຂອງລາວສ້າງຂື້ນໃນນະຄອນຫລວງພະນົມເປັນ. (photo credit: Robert Carmichael)

ນາຍ Prum Seila ພະນັກງານ​ຫ້ອງການ ​ອາຍຸ 24 ປີ ກໍ​ເປັນ​ຜູ້​ນຶ່ງ​ຢູ່​ໃນ​ໝູ່​ພວກ​ຊົນ​ຊັ້ນທີ່
ເປັນເປົ້າໝາຍ​ຂອງ​ນາຍ​ໄຊ. ພຽງ​ສອງ​ສາມ​ອາທິດ​ຫລັງ​ຈາກໂຮງ​ໜັງ​ເປີດ​ບໍລິການ ກໍປາກົດ
ວ່າ ນາຍ Seila ​ໄດ້ເຂົ້າ​ມາ​ເບິ່ງ​ຊິ​ເນ​ຢູ່ໂຮງ​ໜັງ​ນີ້ສອງ​ຄັ້ງ​ແລ້ວ. ນາຍເຊ​ລາເວົ້າ​ວ່າ:

“ຂ້ອຍໄປ​ທີ່​ນັ້ນ ໄປເບິ່ງ​ຊິ​ເນ​ເລຶ່ອງ Transformers 3 ​ແລະຂ້ອຍ​ກໍ​ບໍ່​ເຄີຍ​ເບິ່ງ​ຊິ​ເນ
ລະບົບ​ສາມ​ມິ​ຕິມາ​ກ່ອນ​ໃນ​ຊີວິດ​ຂ້ອຍ. ຂ້ອຍຫາ​ກໍ​ໄດ້​ເບິ່ງ​ເລຶ່ອງ Transformers 3 ​
ນີ້​ແຫລະ ແລະ​ຮູ້​ວ່າ​ໃນຊິ​ເນ​ເລຶ່ອງນີ້ ມີ​ສາກ​ນຶ່ງທີ່​ຖ່າຍ​ທໍາ​ຢູ່​ໃນ​ກໍາປູ​ເຈຍ ​ແລະ​ດັ່ງ​ນັ້ນ​
ພວກ​ເຮົາ​ຄວນ​ຈະ​ໄປ​ເບິ່ງ ​ແບບ​ວ່າໄປສະໜັບສະໜຸນເລື້ອງແບບ​ນີ້ ຢູ່ໃນ​ກໍາປູ​ເຈຍ.”

ການ​ເຕີບ​ໂຕ​ທາງເສດຖະກິດຢູ່​ໃນ​ນະຄອນຫລວງ​ພະນົມ​ເປັນ ​ພາກສ່ວນ​ນຶ່ງແມ່ນ​ມາຈາ​ກ
ການຫລໍ່ລ້ຽງຂອງ​ໂຮງງານເຮັດ​ເສື້ອ​ຜ້າ ຊຶ່ງຖື​ວ່າ​ເປັນ​ເສົາ​ຄໍ້າເສດຖະກິດ​ອັນ​ນຶ່ງ​ໃນ​ກໍາປູ​ເຈ​ຍ
ທີ່​ຕັ້ງຢາຍຢູ່​ອ້ອມ​ແອ້ມ​ນະຄອນຫລວງພະນົມ​ເປັນ ​ແລະ​ດຶງ​ດູດ​ພວກ​ຄົນ​ງານ​ໜຸ່ມ​ນ້ອຍ​ໃຫ້​
ຫລັ່ງ​ໄຫລ ເຂົ້າມາ​ຢູ່​ໃນ​ເມືອງ.

ວຽກງານແລະ​ວິຊາ​ການ​ໃໝ່ໆ ​ໄດ້​ຜັນ​ປ່ຽນ​ຫລາຍ​ສິ່ງຫລາຍ​ຢ່າງ​ຢ່າງ​ວ່ອງ​ໄວ. ຜົນ​ການ​ສໍາ
ຫລວດ​ເມື່ອ​ໝໍ່ໆມາ​ນີ້ຊີ້​ແນະ​ວ່າ ມີຊາວ​ໜຸ່ມ​ກໍາປູ​ເຈຍຫລາຍ​ກວ່າ 90 ​ເປີ​ເຊັນ​ ທີ່ມີໂທລະສັບ​
ມື​ຖື​ໃຊ້ ​ແລະ​ການ​ຊົມ​ໃຊ້​ອິນ​ເທີເນັດ ​ເຖິງ​ແມ່ນ​ຍັງມີ​ລະດັບ​ຕໍ່າ​ຢູ່ ​ແຕ່​ກໍ​ໄດ້​ເພີ່ມ​ຂຶ້ນ​ເປັນ​ສອງ
ເທົ່າ ຕົວ​ໃນ​ປີນຶ່ງ ຄືຂຶ້ນ​ເປັນ 6 ​ເປີ​ເຊັນ.

ນາຍ Prum Seila ທີ່​ມັກ​ໄປ​ເບິ່ງ​ຊິ​ເນ ​ເຕີບ​ໃຫຍ່​ຢູ່​ໃນ​ເມືອງ​ຫລວງ. ນາຍ ປຣຸມກ່າວ​ວ່າ ຕົນ​ແລະ​ໝູ່​ພາກັນ​ໃຊ້​ເວລາ​ຫາ​ເລາະ​ຢູ່​ຕາມຮ້ານ​ອາຫານ​ໃນ​ຍ່ານ​ການ​ຄ້າ ຕາມຮ້ານ​ກາ​ເຟເປີດໃໝ່ໆທີ່​ມີ​ຢູ່​ຫລາຍ​ສິບ​ຮ້ານ ແລະສະຖານ​ທີ່ບັນ​ເທີ​ງ​ ທີ່​ມີ​ຊື່ວ່າ ​Diamond Island ຫລື​ດອນ​ເພັດ ​ແລະ Dreamland ຫລື​ດິນແດນ​ໃນ​ຝັນ ບ່ອນ​ທີ່​ມີ​ຫ້ອງ​ໃຫ້ຮ້ອງ​ເພງຄາຣາ​ໂອ​ເກະ. ນາຍ ປຣຸມ ​ເວົ້າວ່າ ການ​ຫາ​ເລາະ​ຊື້ເຄຶ່ອງຫລືຊອບ​ປິ້ງ ​ແມ່ນເປັນ​ທີ່​ນິຍົມ​ກັນ​ຫລາຍ ​
ໃນ​ເວລາ​ນີ້. ນາຍ ປຣຸມ ​ເວົ້າວ່າ:

“ພວກ​ຄົນ​ຄື​ຂ້ອຍ​ ມີ​ການ​ມີ​ງານ​ເຮັດ ມີ​ເງິນ​ໃຊ້. ພວກ​ເຂົາ​ເຈົ້າທ້ອນ​ເງິນ​ໄວ້ ຊື້​ເຄຶ່ອງ
ຍີ່​ຫໍ້ແພງໆ ​ເຊັ່ນ ​ເຄຶ່ອງ​ຄອມ​ພິວ​ເຕີ​ຍີ່​ຫໍ້​ແອບ​ເປິ້ລ ​ມື​ຖືອາຍ​ໂຟນ. ພວກຍິງ​ສາວ​ບາງ
ຄົນຫາ​ຊື້​ເຄຶ່ອງນຸ່ງ​ຈາກ​ອິນ​ເທີ​ເນັດ​ ຈາກ​ເຟສບຸກ​.”

ຕຶກຕະຫລາດຫລັກຊັບຊອງກຳປູເຈຍ ທນະຄອນຫລວງ ພະນົມເປັນ ທໄຂຂນເມອວັນທີ 11 ເດືອນກໍລະກົດ ແຕຍັງບເປີດໃຫມີການຊຂາຍຮຸນ ຈົນກວາທາຍປີ. (AP Photo/Heng Sinith)
ຕຶກຕະຫລາດຫລັກຊັບຊອງກຳປູເຈຍ ທນະຄອນຫລວງ ພະນົມເປັນ ທໄຂຂນເມອວັນທີ 11 ເດືອນກໍລະກົດ ແຕຍັງບເປີດໃຫມີການຊຂາຍຮຸນ ຈົນກວາທາຍປີ. (AP Photo/Heng Sinith)

ໃນ​ເດືອນ​ກໍລະກົດ​ຜ່ານ​ມາ​ນີ້ ທາງ​ການກໍາປູ
​ເຈຍໄດ້ເປີດ​ຕະຫລາດ​ຂາຍ​ຊື້​ຫຸ້ນ​ຂອງ​ປະ
ເທດ​ເປັນ​ເທື່ອ​ທໍ​າອິດ. ​ເຖິງ​ແມ່​ນວ່າ​ເວລາ​ນີ້
​ຍັງ​ບໍ່​ມີ​ບໍ​ລິສັດ​ໃດ​ເທື່ອ​ມາ​ລົງ​ຊື່​ຈົດ​ທະບຽນ
​ແຕ່ລັດຖະບານ​ກໍາປູ​ເຈຍ​ກ່າວ​ວ່າ ມີສາມ
ບໍລິສັດທີ່ເປັນຂອງ​ລັດ​ ຈະ​ເຂົ້າມາ​ຈົດ​ຊື່​ເອົາ
​ຫຸ້ນ​ອອກຂາຍ​ໃນຕະຫລາດ​ຂາຍ​ຊື້​ຫຸ້ນ​ໃນ
ທ້າຍ​ປີ​ນີ້​ແລະຄາດ​ວ່າ​ພວກ​ບໍລິ​ສັດ​ອື່ນໆ​ກໍ
ຈະ​ທະ​ຍອຍ​ຕາມ​ມາ​ເຊັ່ນ​ກັນ.

ທ່ານ ສະຕີ​ເວິນ ຮິ​ກກິນ​ສ໌ (Stephen
Higgins) ​ເປັນຫົວໜ້າ​ທະນາຄານ ANZ-
Royal Bank ຊຶ່ງເປັນການ​ລົງທຶນ​ຮ່ວມ
ລະ​ຫວ່າງທະນາຄານ​ຍັກ​ໃຫຍ່​ ANZ ຂອງ
ອອສ​ເຕຣ​ເລຍ ​ກັບ​ບໍລິ​ສັດກໍາປູ​ເຈຍບໍລິສັດ
ນຶ່ງ. ທ່ານ ຮິ​ກກິນ​ສ໌ ​ເວົ້າ​ວ່າ:

“​ໃນໄລຍະ​ຍາວແລ້ວ ຕະຫລາດຫຸ້ນ​ນີ້ຈະເປັນ​ສິ່ງ​ທີ່​ດີ​ ສໍາລັບ​ກໍ​າປູ​ເຈຍ ຄື​ມັນຈະ​ຊ່ວຍ
ໃຫ້​ມີ​ງົບປະມານ​ສໍາລັບ​ການພັດທະນາ. ມັນ​ຈະ​ສະໜອງພາຫະນະໃຫ້​ພວກບໍລິສັດ
ເອກະ​ຊົນໄດ້​ອອກ​ຈາກການລົງທຶນ​ຂອງ​ພວກ​ເຂົາ​ເຈົ້າ ຊຶ່ງ​ເປັນ​ສິ່ງ​ສໍາຄັນ​ສໍາລັບ​ພວກ
​ເຂົາ​ເຈົ້າ ​ເວລາ​ພວກ​ເຂົາ​ເຈົ້າຕັດສິນ​ໃຈ​ລົງທຶນເທື່ອ​ທໍາ​ອິດ​ນັ້ນ ​ແຕ່​ມັນກໍ​ຕ້ອງ​ໃຊ້​ເວລາ.
ຜູ້​ໃດ​ກໍ​ຕາມ​ທີ່​ມີ​ວິ​ໄສ​ທັດໄລຍະສັ້ນ​ກ່ຽວ​ກັບ​ຕະຫລາດຫຸ້ນແລ້ວ ​ແມ່ນຈະ​ຜິດ​ຫວັງ​.”

ເມື່ອ​ສິບ​ປີກ່ອນ​ນີ້ ມີ​ທະນາຄານ​ພຽງ​ບໍ່​ເທົ່າ​ໃດ​ແຫ່ງ ທີ່​ສາມາດ​ອອກ​ເງິນສົດ​ແກ່​ລູກ​ຄ້າ​ຢູ່​ເທິງ
ເຄົາ​ເຕີ​ໄດ້. ປັດຈຸບັນ​ນີ້ ມີ​ຕູ້​ທະນາຄານ​ເບີກ​ເງິນສົດໄດ້ ຫລາຍ​ຮ້ອຍ​ຕູ້ ຈາກ​ທະນາຄານ
ທ້ອງ​ຖິ່ນ​ປະມານ 30 ​ແຫ່ງ ​ແລະກໍ​ມີບາງ​ທະນາຄານ​ທີ່ຮັບບໍລິການ​ຈ່າຍ​ເງິນ​ຄ່າ​ນໍ້າ​ຄ່າ​ໄຟ
ທາງ​ອິນເທີ​ເນັດ ​ໃຫ້​ລູກ​ຄ້າ. ທ່ານ​ຮິ​ກກິນ​ສ໌ກ່າວ​ຕໍ່​ໄປ​ວ່າ:

ທານສະຕີເວິນ ຮິກກິນສ ​ຫົວໜ້າທະນາຄານ ANZ- Royal ທພະນົມເປັນ, ວັນທີ 27 ກໍລະກົດ 2011.
ທານສະຕີເວິນ ຮິກກິນສ ​ຫົວໜ້າທະນາຄານ ANZ- Royal ທພະນົມເປັນ, ວັນທີ 27 ກໍລະກົດ 2011.

“ກໍາປູ​ເຈຍ​ແມ່ນໄດ້ກ້າວ​ອອກມາ​ຈາກ
ຄວາມ​ລ້າ​ຫລັງ​ຫລາຍ ​ໃນ​ແງ່​ຂອງການ
ພັດທະນາ​ໂດຍ​ທົ່ວໄປ ​ແຕ່​ກໍໂຮມ​ທັງ​
ການ​ບໍລິການ​ຕ່າງໆ​ທາງດ້ານ​ການ​
ເງິນນໍາ ຊຶ່ງ​ກໍາປູ​ເຈຍ​ກໍ​ກໍາລັງປັບ​ເຂົ້າ
ກັບ​ຍຸກ​ສະ​ໄໝ​ໄດ້​ຢ່າງ​ວ່ອງ​ໄວ.”

ເຖິງ​ແມ່ນ​ຈະ​ມີ​ການ​ປ່ຽນ​ແປງ​ຫລາຍ​ຢ່າງ​ເກີດ​
ຂຶ້ນ​ໃນ​ເມືອງ​ຫລວງ​ພະນົມເປັນ ​ແຕ່ໂດຍ​ທົ່ວ​
ໄປ​ແລ້ວ ມັນ​ກໍ​ບໍ່​ໄດ້ສົ່ງ​ຜົນ​ປະ​ໂຫຍ​ດໃດໆ
ໃຫ້​ແກ່​ປະຊາຊົນ​ກໍາປູ​ເຈຍ ຈໍານວນ 80 ​ເປີ
ເຊັນ ທີ່​ອາ​ໃສ​ຢູ່​ຕາມ​ຊົນນະບົດ​ນັ້ນ​. ຄວາມ
ບໍ່​ເທົ່າທຽມ​ກັນ​ເລຶ່ອງລາຍ​ໄດ້ ​ແມ່ນ​ແຮ່ງ​ຊໍ້າ
ຮ້າຍ​ລົງໄປອີກ​ໃນໄລຍະບໍ່​ເທົ່າ​ໃດ​ປີຜ່າ​ນມາ ​ໃນ​ຂະນະ​ທີ່​ການເຕີບ​ໂຕ​ທາງ​ເສດຖະກິດຂອງ​
ກໍາປູ​ເຈຍ​ສະໜອງ​ຜົນ​ປະ​ໂຫຍດໃຫ້ແກ່ພວກ​ຄົນ​ຮັ່ງມີ ຫລາຍ​ກວ່າ​ພວກ​ຄົນທຸກ​ຈົນ.

ໂດຍ​ສະ​ເພາະ​ພວກໂຮງໝໍ ​ແລະ​ສຸກສາລາ​ຂອງ​ປະ​ເທດ ກໍ​ຍັງໃຫ້ການບໍລິການສຸຂະພາບ​ທີ່​ຂີ້ຮ້າຍ​ນັ້ນ​ຢູ່. ການ​ສໍ້​ລາດ​ບັງ​ຫລວງ​ກໍ​ຍັງມີ​ຢ່າງແຜ່​ຫລາຍ ລະບົບຕຸລາການ​ກໍ່​ອ່ອນ​ແອ​ຢ່າງ​ໜ້າສົງສານ ຄວາມທຸກ​ຈົນ​ແມ່ນ​ຢູ່​ໃນລະດັບ ປະມານ 30 ​ເປີ​ເຊັນ.

ແຕ່​ການ​ປ່ຽນ​ແປງ​ບາງ​ຢ່າງ​ນັ້ນກໍ​ຍັງ​ມີ​ປະ​ໂຫຍດ​ຕໍ່​ສ່ວນ​ລວມຢູ່ ​ເປັນ​ຕົ້ນ​ວ່າ ຖະໜົນ​ຫົນທາງ​
ທີ່​ດີ​ຂຶ້ນ ​ແລະ​ຄວາມສາມາດໃນ​ການຊົມ​ໃຊ້​ມື​ຖືໄດ້ຫລາຍ​ຂຶ້ນ ຊຶ່ງ​ໄດ້​ສ້າງຄວາມ​ແຕກ​ຕ່າງ​ອັນ​ເລິກ​ເຊິ່ງຕໍ່​ຊີວິດ​ຂອງ​ຄົນ​ສ່ວນ​ໃຫຍ່ໃນປະ​ເທດ ​ ​ທີ່​ເພິ່ງ​ພາ​ອາ​ໃສການ​ກະ​ເສດເປັນ​ຫລັກ​ໃນ​ການ​ດໍາລົງ​ຊີວິດ​ຂອງ​ພວກ​ເຂົາ​ເຈົ້ານັ້ນ ​ແລະ​ລັດຖະບານ​ກໍາປູ​ເຈຍ​ກໍ​ຫວັງ​ຢ່າງ​ຍິ່ງ​ວ່າ ການ ປັບປຸງຕ່າງ​ໆ​ທີ່​ມີຂຶ້ນຢູ່​ໃນ​ນະຄອນຫລວງ​ພະນົມ​ເປັນ​ນັ້ນ ຈະ​ສົ່ງ​ຜົນ​ກະທົບຄື​ກັນ​ກັບ​ຄຶ້ນ​ຟອງ​ທະ​ເລ ຊັດ​ອອກ​ໄປ​ທົ່ວ​ເຂດ​ອື່ນໆຂອງ​ປະ​ເທດ.

XS
SM
MD
LG