ສານກໍາປູເຈຍແຫ່ງນຶ່ງໄດ້ຍົກເລີກຂໍ້ກ່າວຫາຖ່າຍຮູບລາມົກຕໍ່
ຊ່າງພາບໜັງສືພິມຍີ່ປຸ່ນຄົນນຶ່ງ ແລະຜົວເມຍຊາວກໍາປູເຈຍ
ຄູ່ນຶ່ງ ທີ່ຜູ້ກ່ຽວໄດ້ຖ່າຍຮູບເອົາ ໃນເມືອງສຽມຣຽບ ທາງ
ພາກຕາເວັນຕົກສຽງເໜືອຂອງກໍາປູເຈຍນັ້ນ.
ຕໍາຫລວດກໍາປູເຈຍໄດ້ຈັບກຸມຊ່າງພາບໜັງສືພິມ ນາຍ Go Takayamaແລະຄູ່ຜົວເມຍຊາວຂະເໝນໃນເດືອນແລ້ວນີ້
ໃນຂໍ້ຫາຖານຖ່າຍຮູບລາມົກ ຍ້ອນພວກເຂົາເຈົ້າໄດ້ຖ່າຍຮູບເອົາພວກໂສເພນີ ໃນໂຮງໂສເພນີແຫ່ງນຶ່ງໃນເມືອງສຽມ
ຣຽບນັ້ນ. ນາຍ Go Takayama ໄດ້ຖ່າຍຮູບເອົາຜົວເມຍຄູ່ນັ້ນ ເພື່ອເອົາໄປສະແດງໃນງານສະແດງຮູບຖ່າຍໃນເມືອງນັ້ນ.
ພວກຈັດແຈງງານສະແດງ ກ່າວວ່າ ບໍ່ມີພາບໂປ້ຈັກອັນຢູ່ໃນຮູບພາບຂອງນາຍ Go Takayama ນັ້ນ. ສານເມືອງສຽມຣຽບຕັດສິນ ໃຫ້ນາຍ Go ແລະຜົວເມຍກໍາປູເຈຍຄູ່ນີ້ ພົ້ນຄວາມຜິດໃນວັນອັງຄານວານນີ້ ແລະພວກເຂົາເຈົ້າກໍໄດ້ຢ່າງອອກຈາກຄຸກໄປ ຢ່າງເປັນອິດສະລະ.
ນາງ Jessica Lim ຜູ້ຈັດແຈງງານສະແດງ ໄດ້ສະແດງຄວາມຍິນດີນໍາການປ່ອຍໂຕພວກເຂົາເຈົ້າອອກຈາກຄຸກນັ້ນ. ຄະນະກໍາມາທິການປົກປ້ອງນັກຂ່າວ ຊຶ່ງເປັນກຸ່ມສົ່ງເສີມສິດທິພວກນັກຂ່າວຊຶ່ງມີຫ້ອງການຕັ້ງຢູ່ໃນສະຫະລັດ ກ່າວວ່ານັກຖ່າຍພາບໜັງສືພິມຍີ່ປຸ່ນຄົນນີ້ ຖືກຈັບກຸມຍ້ອນຄວາມເຂົ້າໃຈຜິດກັນແລະບໍ່ຄວນຈະຖືກປະຕິບັດຕໍ່ຄືກັນກັບນັກໂທດ.
