ພົນໂທ Hun Manet ລູກຊາຍກົກ ຂອງນາຍົກລັດຖະມົນຕີ Hun Sen ໄດ້ມ້ວນທ້າຍ ສະ ຫຼຸບ ການຢ້ຽມຢາມສະຫະລັດເປັນເວລາ 10 ມື້ ໃນສັບປະດານີ້ ທ່າມກາງການປະທ້ວງ ຂອງຊາວອາເມຣິກັນເຊື້ອສາຍກຳປູເຈຍ ທີ່ພາກັນອອກມາປະທ້ວງຕາມຖະໜົນຫົນທາງ ຊຶ່ງເຮັດໃຫ້ມີການແຕກແຍກເພີ້ມຂຶ້ນ ໃນໝູ່ປະຊາຄົມດັ່ງກ່າວແບບທີ່ບໍ່ເຄີຍມີມາກ່ອນ.
ພົນໂທ Manet ແມ່ນຖືກກົດດັນໃຫ້ຖອນຕົວອອກຈາກຂະບວນແຫ່ສວນສະໜາມໃນພິທີ ສະເຫຼີມສະຫຼອງກຸດສົງການປີໃໝ່ໃນເມືອງ Long Beach ຊຶ່ງນັ້ນແມ່ນສະຖານທີ່ທຳອິດ ຂອງການຢ້ຽມຢາມສະຫະລັດຂອງທ່ານ ທີ່ໄດ້ປະເຊີນກັບພວກປະທ້ວງ ແບບຊຶ່ງໆໜ້າ.
ທ່ານ Khim Any Yorn ຜູ້ປະທ້ວງຄົນນຶ່ງໃນຂະບວນແຫ່ເມື່ອວັນທີ 10 ເມສາຜ່ານມານີ້ໄດ້ ກ່າວວ່າ “ຂ້າພະເຈົ້າອອກມາປະທ້ວງນີ້ ກໍຍ້ອນຂ້າພະເຈົ້າບໍ່ພໍໃຈ ກັບທ່ານ Hun Sen ແລະທ່ານ Hun Manet ທີ່ໄດ້ລ່ວງລະເມີດແລະເຂັນຂ້າປະຊາຊົນກຳປູເຈຍ, ຂາຍດິນໃຫ້ແກ່ຫວຽດນາມ ແລະຂາຍຈິດສຳນຶກຂອງພວກເຂົາເຈົ້າ. ພວກເຮົາບໍ່ດີໃຈ ທີ່ຈະໃຫ້ທ່ານເຂົ້າຮ່ວມໃນການຂະບວນແຫ່ສະເຫຼີມສະຫຼອງຄັ້ງນີ້ ໃນສະຫະລັດ ເພາະ ວ່າ ນີ້ແມ່ນດິນແດນປະຊາທິປະໄຕ ແລະວ່າມືຂອງທ່ານໄດ້ເປິະເປື້ອນໄປດ້ວຍເລືອດ ຂອງ ປະຊາຊົນກຳປູເຈຍ ເພາະສະນັ້ນ ພວກເຮົາບໍ່ຂໍຕ້ອນຮັບຜູ້ກ່ຽວ.”
ມີພວກປະທ້ວງຫຼາຍໆຄົນເຫັນດີເຫັນພ້ອມກັບຄວາມເຫັນຂອງທ່ານ Any Yorn.
ທ່ານ Kheng Song ໄດ້ກ່າວວ່າ “ຂ້ອຍແມ່ນບໍ່ສະໜັບສະໜຸນໃຫ້ຜູ້ແທນຂອງລັດຖະບານ ເຂົ້າຮ່ວມໃນການແຫ່ຂະບວນສະເຫຼີມສະຫຼອງນີ້ ຊຶ່ງທຸກໆຄົນກໍຊາບດີຢູ່ແລ້ວວ່າ ອຳນາດການປົກຄອງນີ້ແມ່ນຜະເດັດການ.”
ພວກປະທ້ວງທັງຫຼາຍ ຕ່າງກໍພາກັນຖືປ້າຍທີ່ມີຄຳຂວັນ ຕໍ່ຕ້ານທ່ານ Hun Sen ດ້ວຍຂໍ້ ຄວາມຕ່າງໆນາໆ ທີ່ຕໍ່ຕ້ານການຍຶດເອົາທີ່ດິນຂອງປະຊາຊົນ ການສໍ້ລາດບັງຫຼວງ ແລະການຕັດໄມ້ທຳລາຍປ່າ ເປັນຕົ້ນ.
ເຊີນທ່ານອ່ານຂ່າວນີ້ເພີ້ມຕື່ມ ໃນພາສາອັງກິດ
