ກຳປູເຈຍ ຈະສ້າງຕັ້ງ ຕາໜ່າງສວນ ອິດສະຫລະພາບຂຶ້ນ ໃນທົ່ວປະເທດ ບ່ອນທີ່ປະຊາຊົນ ສາມາດສະແດງອອກ ຊຶ່ງຄວາມຄິດຄວາມເຫັນ ຂອງພວກເຂົາເຈົ້າ ໄດ້ຢ່າງເສລີ ຕາບໃດທີ່ ພວກເຂົາເຈົ້າ ພາກັນສະແດງ ຄວາມເຫັນເຫຼົ່ານີ້ ໃນລະຫວ່າງ 6 ໂມງເຊົ້າ ຫາ 6 ໂມງແລງ.
ເຈົ້າໜ້າທີ່ ກະຊວງພາຍໃນ ຂອງກຳປູເຈຍ ກ່າວໃນມື້ວັນຈັນ ວານນີ້ວ່າ ຕົນພວມຊອກຫາ ສະຖານທີ່ ທີ່ຈະສ້າງ ສວນອິດສະຫລະພາບຂຶ້ນ ໃນທຸກໆແຂວງ ແລະທຸກໆເມືອງ. ການໂຮມຊຸມນຸມປະທ້ວງ ຢູ່ໃນສວນດັ່ງກ່າວນີ້ ຈະຈຳກັດ ໃຫ້ແຕ່ພຽງ 200 ຄົນ.
ອົງການຂ່າວຝຣັ່ງ ໄດ້ອ້າງຄຳເວົ້າ ຂອງບັນດາ ກຸ່ມປົກປ້ອງ ສິດທິມະນຸດ ໃນເຂດທ້ອງຖິ່ນ ທີ່ກ່າວວ່າ ພວກຕົນຢ້ານວ່າ ສວນອິດສະຫລະພາບນີ້ ຈະຖືກໃຊ້ເປັນບ່ອນ ຫຼຸດຜ່ອນ ການປະທ້ວງລົງ ໂດຍເຮັດໃຫ້ ມີຂະໜາດນ້ອຍລົງ ແລະສ້າງຂຶ້ນຢູ່ບ່ອນຫ່າງໄກ ຈາກສາຍຕາ ຂອງສາທາລະນະຊົນ.
