ກໍາປູເຈຍໄດ້ຕົກລົງທີ່ຈະຊື້ເອົາເຮືອບິນເຮລີຄອບເຕີທະຫານຈາກຈີນ ຈໍານວນນຶ່ງ ທີ່ບໍ່ໄດ້ແຈ້ງໃຫ້ຊາບວ່າເທົ່າໃດ.
ຂໍ້ຕົກລົງກັນດັ່ງກ່າວທີ່ພົວພັນກັບເຮືອບິນເຮລີຄອບເຕີຮຸ່ນ “Z-9 ທີ່ເຮັດໃນປະເທດຈີນນັ້ນ ໄດ້ປະກາດໃຫ້ຊາບໃນວັນຈັນມື້ນີ້ ແລະເປັນນຶ່ງໃນຂໍ້ຕົກລົງ 20 ກວ່າສະບັບທີ່ໄດ້ບັນລຸກັນໃນວັນເສົາຜ່ານມານີ້ ໃນລະຫວ່າງການຢ້ຽມຢາມນະຄອນຫລວງພະນົມເປັນຂອງທ່ານ Zhou Yongkang ສະມາຊິກກົມການເມືອງຈີນ.
ຂໍ້ຕົກລົງອື່ນໆນັ້ນ ມີຮວມທັງສັນຍາຂຸດຄົ້ນບໍ່ແຮ່ແລະໂຮງໄຟຟ້າ ແລະການຈັດແຈງເພື່ອຊ່ອຍບໍລິສັດໂທລະສັບມືຖື CamGSM ຂອງກໍາປູເຈຍ ສ້າງດາວທຽມດວງທໍາອິດຂອງປະເທດ.
ການລັ່ງໄຫລຂອງການລົງທຶນຂອງຈີນເຂົ້າມາໃນກໍາປູເຈຍໃນຫວ່າງໄວໆຜ່ານມານີ້ ໄດ້ກະ
ຕຸ້ນໃຫ້ພວກທີ່ຕິຕຽນບໍ່ເຫັນພ້ອມນໍາເຕືອນວ່າ ກໍາປູເຈຍກໍາລັງຈະກາຍເປັນປະເທດທີ່ອາ
ໄສກາງຕໍ່ກຸງປັກກິງຫລາຍໂພດ. ແຕ່ໂຄສົກປະຈໍານາຍົກລັດຖະມົນຕີຮຸນແຊນໄດ້ກ່າວຊົມ
ເຊີຍວ່າເປັນ “ຍຸກໃໝ່ແຫ່ງການຮວມໄມ້ຮ່ວມມືກັນ” ລະຫວ່າງສອງປະເທດ.
ສື່ມວນຊົນຂອງທາງການຈີນ ກ່າວວ່າ ທ່ານຮຸນແຊນໄດ້ໃຫ້ຄໍາໝັ້ນສັນຍາໃນລະຫວ່າງ
ການພົບປະຫາລືກັນນັ້ນວ່າ ກໍາປູເຈຍຈະຍຶດໝັ້ນຕໍ່ນະໂຍບາຍຈີນດຽວ.
ທ່ານ Zhou ທໍາການຢ້ຽມຢາມກຸງພະນົມເປັນ ຫລົງຈາກໄປຢ້ຽມຢາມເນປານແລະລາວ
ມາແລ້ວ. ທ່ານຍັງມີໝາຍກໍານົດທີ່ຈະໄປຢ້ຽມຢາມ ປະເທດ Tajikistan ແລະ Mongo
lia ເຊ່ນກັນ.
