ນາຍົກລັດຖະມົນຕີຮຸນແຊນ ແຫ່ງກໍາປູເຈຍໄດ້ສັ່ງໃຫ້ລັດຖະບານທໍາການສືບສວນກ່ຽວກັບການຍິງຜູ້ອະນຸລັກສິ່ງແວດລ້ອມທີ່ມີຊື່ສຽງຕາຍໃນສັບປະດາຜ່ານມາ ໃນລະຫວ່າງການປະເຊີນໜ້າກັນກັບສາລະວັດທະຫານໃນພາກຕາເວັນຕົກຂອງກໍາປູເຈຍ.
ພວກນັກຂ່າວຝ່າຍຕາເວັນຕົກໄດ້ເຫັນຄໍາສັ່ງດັ່ງກ່າວໃນວັນອັງຄານ ວານນີ້ ຊຶ່ງຮຽກຮ້ອງໃຫ້ມີການລາຍງານໂດຍເຕັມກ່ຽວກັບການຕາຍຂອງທ່ານ Chut Wutty ນັກເຄື່ອນໄຫວຕໍ່ຕ້ານການລັກຕັດໄມ້ທີ່ໄດ້ເສຍຊີວິດໄປໃນວັນທີ 26 ເມສາຜ່ານມາ ໃນຂະນະທີ່ຜູ້ກ່ຽວກໍາລັງຖ່າຍຮູບເງົາເອົາຫຼັກຖານການຕັດໄມ້ ທີ່ສົງໄສວ່າຜິດກົດໝາຍຢູ່ ໃກ້ໆກັບປ່າສະຫງວນ ທີ່ມີຄວາມຫຼໍ່ແຫຼມສຳຄັນຕໍ່ສິ່ງແວດລ້ອມແຫ່ງນຶ່ງທີ່ທ່ານໄດ້ໃຊ້ຊີວິດຂອງທ່ານສ່ວນຫຼາຍປົກປັກຮັກສາໄວ້ນັ້ນ. ໃນຫວ່າງບໍ່ເທົ່າໃດປີຜ່ານມານີ້ທ່ານ Wutty ໄດ້ຊ່ອຍພວກປົກປ້ອງສິ່ງ ແວດລ້ອມນາໆຊາດຫຼາຍກຸ່ມ ຈົດບັນທຶກຫຼັກຖານກ່ຽວກັບການລັກຊື້ຂາຍໄມ້ທ່ອນທີ່ສົງໄສວ່າຜິດກົດໝາຍໃນຂົງເຂດນັ້ນ.
ນັກຂ່າວ 2 ຄົນທີ່ຕິດຕາມນັກອະນຸລັກສິ່ງແວດລ້ອມລອດຊີວິດມາໄດ້ຈາກການປະເຊີນໜ້າກັນ. ພວກນັກຂ່າວທັງ 2 ກ່າວຕໍ່ໜັງສືພິມກຳປູ ເຈຍລາຍວັນວ່າ ການປະເຊີນໜ້າກັນໄດ້ກາຍເປັນຄວາມຮຸນແຮງຂຶ້ນ ເວລາທ່ານ Wutty ບໍ່ຍອມປະຕີບັດຕາມຄໍາສັ່ງໃຫ້ມອມກ້ອງຖ່າຍຮູບຂອງທ່ານທີ່ໃຊ້ສໍາລັບຖ່າຍຮູບເອົາອັນທີ່ກ່າວຫາວ່າເປັນການທຳລາຍສິ່ງແວດລ້ອມໃນແຂວງເກາະກົງນັ້ນ.
ຮູບພາບທີ່ລົງໃນໜ້າປົກຂອງໜັງສືພິມສະບັບນີ້ ສະແດງໃຫ້ເຫັນວ່າ ທ່ານ Chut Wutty ໄດ້ອອກຈາກລົດຂອງທ່ານປະມານ 30 ນາທີກ່ອນເຫດການຍິງກັນເກີດຂຶ້ນ ໃນອັນທີ່ພວກລອດຊີວິດມາໄດ້ກ່າວວ່າ ມີການຜິດຖຽງກັນຢ່າງເຜັດຮ້ອນກັບສາລະວັດທະຫານນັ້ນ. ພວກລອດຊີວິດກ່າວຕື່ມວ່າ ນັກເຄື່ອນໄຫວໄດ້ຖືກຍິງຕາຍໃນເວລາຕໍ່ມາຂະນະທີ່ນັ່ງຢູ່ໃນຕັ່ງຄົນຂັບລົດຂອງທ່ານນັ້ນ.
ທໍາອິດທາງການກໍາປູເຈຍກ່າວວ່າ ສາລະວັດທະຫານທີ່ຍິງນັກອະນຸລັກສິ່ງແວດລ້ອມນັ້ນ ກໍເສຍຊີວິດເຊ່ນກັນຈາກລູກປືນທີ່ກະເດັນມາໃສ່ ໃນລະຫວ່າງເກີດເຫດຕໍ່ສູ້ກັນ. ແຕ່ຕໍ່ມາສາລະວັດທະຫານກ່າວວ່າ ເຈົ້າໜ້າທີ່ຄົນນັ້ນໄດ້ຂ້າໂຕຕາຍ.