ລິ້ງ ສຳຫລັບເຂົ້າຫາ

ມໍລະດົກຈາກພວກຂະເໝນແດງ

  • ສິງ ບູຣົມມະວົງ

ສານ​ອາຊະຍາ​ກໍາສົງຄາມ​ນາ​ໆ​ຊາດ​ໃນ​ກໍາປູ​ເຈຍ​ກໍາລັງ​ກະກຽມ​ຕັ້ງ​ຂໍ້​​ຫາຕໍ່​ພວກ​ຜູ້​ນໍາ ​ຂະ​ເໝນ​ແດງ​ຕື່ມອີກ 4 ຄົນ ​ໃນຖານ​ຂ້າລ້າງຜານ​ດັບ​ສູນ​ເຜົ່າພັນ ຊຶ່ງ​​​ເຮັດໃຫ້ປະຊາຊົນຫລາຍຄົນ ພາກັນ​​ມອງ​ເບິ່ງ​ໄປ​ຍັງອະນາຄົດ​ວ່າ ຄວນຈະ​ສ້າງ​ສິ່ງ​ໃດ​ຂຶ້ນ​ມາ ​ເພື່ອເປັນ​ມໍລະດົກ​ຕົກ​ທອດ​ ຈາກ​ການ​ດໍາ​ເນີນ​ຄະດີ​​ພວກ​ຂະ​ເໝນ​ແດງ​ນັ້ນ ​ຫລັງ​ຈາກ​ສານ​ດັ່ງກ່າວອັດລົງ​ແລ້ວ.

ຢູ່ໃນ​ເຂດ​ຊານ​ເມືອງ​ພະ​ຕະບອງ ​ມີ​ວັດ​ສໍາຣຸງກະ​ນົງຕັ້ງ​ຢູ່. ສູ່​ມື້​ນີ້ ວັດ​ສາສະໜາ​ພຸດ​ແຫ່ງ​ນີ້​ ແມ່ນ​ມີ​ຄວາມ​ສະ​ງົບງຽບ ແລະ​ຮົ່ມ​ເຢັນ. ​ແຕ່ໃນ​ສະ​ໄໝ​ທີ່​ພວກ​ຂະ​ເໝນ​ແດງ​ປົກຄອງ​ກໍາປູ​ເຈຍລະຫວ່າງ​ປີ 1975 ຫາ 1979 ນັ້ນ ວັດ​ດັ່ງ ກ່າວ​ແມ່ນ​ຫ່າງ​ໄກ​ຫລາຍ​ຈາກຄວາມ​ສະ​ງົບງຽບ.


ໃນ​ສະ​ໄໝ​ນັ້ນ ວັດສໍາຣຸງກະ​ນົງເປັນແດນ​ມໍລະນະແຫ່ງ​ນຶ່ງ ໃນຈໍານວນ​ຫລາຍໆ​ຮ້ອຍ​ບ່ອນ​ ທີ່​ມີ​ກະຈັດກະຈາຍ​ຢູ່ທົ່ວ​ ປະ​ເທດ. ​ພວກ​ຂະ​ເໝນ​ແດງ​ຫົວນິຍົມ​ລັດທິ​ເໝົາ​ເຈີ​ຕຸ​ງຈັດ ທີ່ປົກຄອງ​ປະ​ເທດ​ໃນເວລາ​ນັ້ນ ໄດ້​ຂັບໄລ່ປະຊາຊົນ​ອອກ ໄປຈາກ​ພວກຫົວ​ເມືອງ​ຕ່າງໆ​ຈົນ​ເປົ່າ​ແປນ​ ​ແລະ​ພະຍາຍາມ​ສ້າງ​ຕັ້ງ​ສັງຄົມ​ກະ​ເສດ​ທີ່​ດີ​ເລີດ ໃນ​ຮູບ​ແບບ​ທີ່​ຊາວ​ໄຮ່​ຊາວ ນາມີ​ດິນ​ດອນ​ຕອນ​ຫຍ້າ​ເທົ່າ​ທຽມ​ກັນ​ນັ້ນ. ​ໃນ​ລະຫວ່າງ​ທີ່​ພວກ​ເຂົາພະຍາຍາມດໍາ​ເນີນ​ການ​ດັ່ງ ກ່າວ​ນັ້ນ ປະຊາຊົນ​ຈໍານວນ 1 ລ້ານ​ກ່ວາຄົນໄດ້ເສຍ​ຊີວິດ​ ຍ້ອນ​ຄວາມ​ອຶດຫິວ​ແລະ​ໂຣຄາ​ພະຍາດຫລືບໍ່​ກໍ​ຖືກ​ພວກ​ຂະ​ເໝນແດງປະຫານ​ຊີວິດ​.


ອາຈານ​ທຸນ​ໂສ​ວັດ ​ເຈົ້າ​ອາວາດ​ວັດແຫ່ງ​ນີ້​ໃນ​ປັດຈຸບັນ ​ເປັນ​ພະ​ທີ່​ຍັງ​ໜຸ່ມ​ຢູ່ເວລາ​ພວກ​ຂະ ​ເໝນ​ແດງ​ຂຶ້ນ​ກໍາ​ອໍານາດ​ໃນ​ປີ 1975 ຊຶ່ງ​ເພິ່ນ​ໄດ້​ຖືກ​ບັງຄັບ​ໃຫ້​ສິກ​ອອກ​ຈາກ​ວັດ​ ແລະ​ໄປ​ເຮັດ​ວຽກ​ຢູ່​ໃນ​ທົ່ງ​ໄຮ່​ທົ່ງ​ນາ. ພະ​ຫລາຍ​ອົງ​ໄດ້​ຖືກ​ປະຫານ​ຊີວິດ ເພາະວ່າ​ພວກ​ຂະ​ເໝນ ແດງ ​ຫ້າມການເຊື່ອ​ຖື​ສາສະໜາ ໃນ​ຄວາມ​ພະຍາຍາມ​ເພື່ອ​ປະຕິ​ຮູບ​ສັງຄົມຂອງ​ຊາວ​ກໍາປູ​ ເຈຍນັ້ນ.

ອາຈານ Thun Sovath ຫົວໜ້າວັດສໍາຣຸງກະນົງ ເມືອງພະຕະບອງ, ກໍາປູເຈຍ.
ອາຈານ Thun Sovath ຫົວໜ້າວັດສໍາຣຸງກະນົງ ເມືອງພະຕະບອງ, ກໍາປູເຈຍ.


ອາຈານ​ທຸນ​ໂສ​ວັດ ກ່າວວ່າ ປະຊາຊົນ​ຫລາຍ​ກວ່າ 1 ໝື່ນ​ຄົນຖືກ​ທາລຸນ​ນະ​ກໍາ​ແລະ​ ຖືກ​ປະຫານ​ຊີວິດ​ຢູ່​ໃນ​ວັດ​ແຫ່ງ​ນີ້​ ​ແລະ​ສົບ​ຂອງ​ພວກ​ເຂົາ​ເຈົ້າ​ຖືກ​ຖິ້ມ​ລົງ​ໃສ່​ໜອງ​ແຫ່ງ​ຕ່າງໆໃນ​ວັດ. ຄໍາ​ບອກ​ເລົ່າກ່ຽວ​ກັບ​ການ​ສັງຫານຜູ້​ຄົນຂອງ​ພວກ​ຂະ​ເໝນ​ແດງ ເປັນ​ເລື້​ອງທໍາ​ມະ​ດາ​ທີ່​ໄດ້​ຍິນ​ກັນໃນທົ່ວປະ​ເທດ. ​ແຕ່​ກໍ​ມີ​ຊາວ​ໜຸ່ມ​ກໍາປູ​ເຈຍ​ ຈໍານວນ ​ຫລາຍທີ່ຍັງ​ບໍ່​ເຊື່ອ​ວ່າ ຄົນ​ກໍາປູ​ເຈຍ​ຈະສາມາດ​ທໍາ​ສິ່ງ​ທີ່​ໂຫດ​ຫ້ຽມແບບ​ນັ້ນ ໃຫ້​ຄົນ​ກໍາປູ​ເຈຍ​ດ້ວຍ​ກັນ​ໄດ້. ອາຈານ​ທຸນ​ໂສ​ວັດ​ກ່າວ​ວ່າ​ ​ເພີ່ນ​ບໍ່​ແປກ​ໃຈ​ຫຍັງ​ເລີຍ ທີ່​ພວກ​ຊາວ​ໜຸ່ມ​ບໍ່ເຊື່ອ​ເລື້ອງ​ນີ້​. ອາຈານ​ທຸນເວົ້າວ່າ ​ເວລາ​ນີ້​ເພີ່ນ​ເຖົ້າ​ແກ່​ແລ້ວ ​ແຕ່ໃນ​ສະ​ໄໝປີ 1974 ​ນັ້ນ ເວລາ​ເພິ່ນ​ໄດ້​ຍິນ​ຄົນເວົ້າ​ກັນ​ວ່າ ​ພວກ​ຂະເໝນ​ແດງເຂັ່ນຂ້າ​ພະສົງແລະ​ຄົນ​ທໍາ​ມະ​ດາ​ສາມັນ​ກັນ​ແບບ​ໃດນັ້ນ ​ເພິ່ນ​ກໍບໍ່ ເຊື່ອ​ຄື​ກັນ.


ທ່ານ​ດາຣາວຸດ​ເສັງ ​ທະນາຍຄວາມ​ອະ​ເມ​ລິ​ກັນ​ເຊື້ອສາຍ​ກໍາປູ​ເຈຍ ຊຶ່ງ​ເຄີຍເປັນ​ຫົວໜ້າ​ກຸ່ມຈັດ​ຕັ້ງ​ທີ່​ເອີ້ນ​ວ່າ ສູນ​ກາງ​ເພື່ອ​ຄວາມ​ຍຸຕິ​ທໍາ​ແລະ​ຄວາມ​ປອງ​ດອງ​ກັນ ຫລື CJR ນັ້ນ​ ໄດ້ໄປ​ຢ້ຽມຢາມ​ວັດ​ດັ່ງກ່າວ. ທ່ານ​ເສັງເວົ້າ​ວ່າ ປະວັດ​ຂອງ​ວັດ​ສໍາຣຸງກະ​ນົງ ​ເຮັດ​ໃຫ້​ວັດ​ນີ້​ເປັນ​ບ່ອນທີ່​ເໝາະ​ສົມສໍາລັບອັນ​ທີ່​ເອີ້ນ​ກັນ​ວ່າ ໂຄງການ​ມໍລະດົກ​ຕົກທອດຈາກການ​ດໍາ​ເນີນ ​ຄະດີ​ພວກຂະ​ເໝນ​ແດງ ​ເພື່ອ​ວາງສະ​ແດງ​ຫລັກ​ຖານ​ທີ່​ເປັນຮູບປະ​ທໍາ​ຕ່າງໆ​ກ່ຽວ​ກັບພວກ​ ຂະ​ເໝນ​ແດງ ຫລັງຈາກ​ສານ​ອາຊະຍາ​ກໍາສົງຄາມໃນນະຄອນຫລວງພະນົມ​ເປັນ ອັດ​ປະຕູ​ລົງ ໃນອີກ​ບໍ່​ເທົ່າ​ໃດ​ປີ​ຂ້າງ​ໜ້າ​ນີ້.


ສູນ​ກາງ​ເພື່ອ​ຄວາມຍຸຕິ​ທໍາ​ແລະ​ຄວາມ​ປອງ​ດອງ​ກັນ ​ໄດ້​ດໍາ​ເນີນ​ງານ​ຮ່ວມ​ກັບພະ​ອາຈານ​ທຸນ​ໂສ​ວັດ ​ແລະ​ປະຊາ​ຄົມ​ອ້ອມ​ແອ້ມ​ ເພື່ອ​ສ້າງ​ສູນ​ສຶກສາແຫ່ງ​ນຶ່ງ​ຂຶ້ນ ຊຶ່ງ​ກໍ່ສ້າງ​ຂຶ້ນກວມໜອງ ນ້ອຍ​ແຫ່ງ​ນຶ່ງ​ໃນ​ວັດ​ ທີ່​ເຄີຍ​ເປັນ​ຂຸມ​ຝັງ​ສົບ​ໝູ່. ອາຄານ​ທີ່​ວ່າ​ນີ້​ເປັນ​ເຮືອນໄມ້ສູງ​ໆແບບ​ມີ​ກ້ອງຕະລ່າງ​ ທີ່​ປຸກ​ຂຶ້ນ​ກວມ​ໜອງແລະ​ສ້າງ​ເກືອ​ບຈະ​ສໍາ​ເລັດແລ້ວ ຊຶ່ງ​ທ່ານ​ເສັງ​ໄດ້​ກ່າວ​ຊີ້​ແຈງ​ເຖິງ​ຈຸດປະສົງ​ຫລື​ເປົ້າ​ໝາຍ​ຂອງ​ເຮືອນຫລັງ​ນີ້​ວ່າ :


“ຄວາມຫວັງຂອງພວກເຮົານັ້ນ ກໍຄືຢາກໃຫ້ມີບ່ອນ​ຫລື​ເນື້ອ​ທີ່ຕົວຈິງ ສຳລັບ​ໃຫ້ ພວກເຂົາເຈົ້າມາຕຸ້ມໂຮມກັນ ແລະສຶກສາຄົ້ນຄວ້າ ແລະ​ໃຫ້ມີເອກກະສານບັນ​ທຶກໄວ້ພ້ອມ ເພື່ອ​ໃຫ້ເລື້ອງລາວຫລື​ຄໍາ​ບອກ​ເຫລົ່າບາງຢ່າງເຫລົ່ານີ້ ສອດຄ່ອງ ກັນກັບສິ່ງທີ່ພໍ່ແມ່ ລຸງປ້ານ້າ​ອາວ​ອາ ຫລືຍາດຕິພີ່ນ້ອງຂອງ​ຂ້ອຍທີ່ລອດຊີວິດມາ​ໄດ້ນັ້ນ ​ໄດ້ເອີ່ຍ​ເຖິງຢ່າງແທ້ຈິງ.”

ສູນສຶກສາ ທີ່ພວມກໍ່ສ້າງກວມໜອງແຫ່ງນຶ່ງ ທີ່ເຄີຍເປັນຂຸມຝັງສົບ ປະຊາຊົນ ທີ່ຖືກພວກຂະເໝນແດງປະຫານຊີວິດ ຢູ່ວັດສໍາຣຸງກະນົງ ເມືອງພະຕະບອງ
ສູນສຶກສາ ທີ່ພວມກໍ່ສ້າງກວມໜອງແຫ່ງນຶ່ງ ທີ່ເຄີຍເປັນຂຸມຝັງສົບ ປະຊາຊົນ ທີ່ຖືກພວກຂະເໝນແດງປະຫານຊີວິດ ຢູ່ວັດສໍາຣຸງກະນົງ ເມືອງພະຕະບອງ


ທ່ານ​ເສັງ​ກ່າວ​ຕື່ມ​ວ່າ ສູນ​ສຶກສາ​ແຫ່ງ​ນີ້​ມີ​ຄວາມ​ພິ​ເສດ ​ເພາະວ່າ ຊາວ​ບ້ານ​ໄດ້ມີ​ສ່ວນ​ພົວພັນຢ່າງ​ເລິກ​ເຊິ່ງ ​ທັງໃນ​ການ​ວາງແຜນ ​ສະໜອງວັດຖຸ​ ແລະ​ສະລະ​ເວລາ​ໃນ​ການ​ກໍ່ສ້າງ​ສູນ​ແຫ່ງ​ນີ້ ຊຶ່ງ​ ເປັນ​ນຶ່ງ​ໃນ​ໂຄງການ​ມໍລະດົກ ຈໍານວນ​ນຶ່ງ​ທີ່​ກໍາລັງ​ມີ​ການຈັດ​ຕັ້ງ​ ປະຕິບັດ ​ຫລື​ກໍາລັງໂອ້​ລົມສົນ ທະນາ​ກັນ.

ທີ່​ກຸງ​ພະນົມ​ເປັນ ປີນີ້ສານ​ອາດຊະຍາ​ກໍາ​ສົງຄາມໄດ້​ຕັດສິນ​ໂທດສະມາຊິກ​ຂັ້ນ​ອາວຸ​ໂສຄົນ​ນຶ່ງ​ຂອງ​ພວກ​ຂະເໝນ​ແດງ​ ໃນ​ຂໍ້​ຫາກໍ່ອາຊະຍາ​ກໍາ​ສົງຄາມ​ແລະ​ກໍ່ໂທດ​ອື່ນໆ​ຕ້ານມະນຸດຊາດ. ​ສະມາຊິກ​ຂະ​ເໝນແດງອີກ 4 ຄົນຈະ​ປະ​ເຊີນ​ກັບ​ການ​ດໍາ​ເນີນ​ຄະດີ​ໃນ​ປີໜ້າ​ນີ້. ​ເປົ້າໝາຍ ຂອງ​ສານ​ອາຊະຍາ​ກໍາສົງຄາມ​ ແມ່ນ​ເພື່ອ​ນຳ​ໂຕ​ພວກ​ອະດີດ​ຜູ້ນໍາ​ຂະ​ເໝນ​ແດງ​ທີ່​ຍັງ​ມີ​ຊີວິດ​ ຢູ່​ ມາ​ຂຶ້ນ​ສານ ​ແລະ​ການສ້າງ​ມໍລະດົກ​ຂຶ້ນ​ມາວາງສະ​ແດງ​ເປັນ​ຫລັກ​ຖານ​ນັ້ນ ກໍ​ຈະຊ່ອຍໃຫ້​ ກໍາປູ​ເຈຍ​ຟື້ນ​ໂຕ​ຄືນ​ຈາກ​ ອະດີດອັນ​ໂຫດຮ້າຍ​ນັ້ນ.


ທ່ານ​ນາງ Michelle Staggs Kelsall ຫົວໜ້າ​ໂຄງການ​ຕິດຕາມ ເບິ່ງ​ສານ​ອາຊະຍາ​ກໍ​າ​ສົງຄາມ​ຂອງ​ສູນ​ກາງ​ຕາ​ເວັນ​ອອກ-ຕາເວັນ​ຕົກ ຊຶ່ງ​ເປັນ​ສະ​ຖາ​ບັນ​ຄົ້ນຄວ້າ​ໃນ​ລັດ​ຮາ​ວາຍ​ຂອງ​ສະຫະລັດ ໄດ້​ຂຽນ​ເລື້ອງ​ກ່ຽວ​ກັບ​ໂຄງການ​ມໍລະດົກ​ຕ່າງໆ​ຈາກສານນາໆຊາດໃນແຫ່ງ ອື່ນໆມາ​ແລ້ວ​ ຊຶ່ງ​ທ່ານ​ນາງ​ກ່າວ​ວ່າ ມໍລະດົກຕົກ​ທອດ​ທີ່​ສໍາຄັນ​ທີ່​ສຸດ​ຂອງ​ສານ ​ແມ່ນ​ເປົ້າ​ໝາຍໃນ​ການ​ປັບປຸງ​ລະ​ບົບຕຸລາການ​ຂອງ​ກໍາປູ​ເຈຍ​ໃຫ້​ດີ​ຂຶ້ນ ​ໂດຍ​ໂອນຫລັກ​ການປະຕິບັດ​ທາງ​ກົດໝາຍ​ທີ່​ດີ ທີ່​ກໍາລັງ​ໃຊ້​ກັນຢູ່​ໃນ​ສານ​ນີ້ ​ໄປ​ໃຫ້​ລະ​ບົບຕຸລາການ​ຂອງ​ກໍາປູ​ເຈຍ. ສິ່ງ​ສໍາຄັນ​ນຶ່ງ​ອີກ​ກໍ​ແມ່ນ​ເພື່ອ​ຮັບປະກັນ​ໃຫ້ປະຊາຊົນ​ໄດ້ຮູ້ຈັກປະວັດ​ສາດ​ ກ່ຽວ​ກັບ​ສິ່ງ​ທີ່ໄດ້ເກີດ​ຂຶ້ນ​ພາຍ​ໃຕ້​ການ​ປົກຄອງ​ຂອງ​ພວກ​ຂະ​ເໝນແດງ​ນັ້ນ.

ຮູບພາບທີ່ບອກເຖິງການເຂັ່ນຂ້າປະຊາຊົນຂອງພວກ ຂະເໝນແດງ ຢູ່ທາດອັນນື່ງໃນວັດສໍາຣຸງກະນົງ
ຮູບພາບທີ່ບອກເຖິງການເຂັ່ນຂ້າປະຊາຊົນຂອງພວກ ຂະເໝນແດງ ຢູ່ທາດອັນນື່ງໃນວັດສໍາຣຸງກະນົງ

ແລະ​ອີກໂຄງການ​ທີ່​ສານນີ້ໄດ້​ອະນຸມັດ​ໃຫ້​ເຮັດ​ນັ້ນ ກໍ​ຄື​ສ້າງຖານ​ຂໍ້​ມູນ ທີ່ເກັບ​ກໍາ​ເອກະສານ​ຂອງ​ສານ​ທັງ​ໝົດ ສໍາລັບ​ຜູ້​ຄົນ​ຮຸ່ນ​ຕໍ່​ໆໄປ ​ໄດ້ອ່ານ​ໄດ້ສຶກສາ. ຢູ່​ທີ່​ວັດ​ສໍາຣຸງກະ​ນົງນັ້ນ ອາຈານ​ທຸນ​ໂສ​ວັດກ່າວ​ວ່າ ສູນສຶກສາແຫ່ງນີ້ ເປັນ​ໂອກາດ​ສໍາຄັນ​ທີ່​ສຸດ​ສໍາ​ລັບ​ການສຶກສາ​ ຂອງ​ຄົນ​ຕໍ່​ໄປ. ອາຈານ​ທຸນກ່າວ​ວ່າ ແລະ​ເວລາ​ເຂົາ​ເຈົ້າ​ໄດ້​ເຫັນ​ແລ້ວ ເຂົາ​ເຈົ້າ​ກໍຈະ​ບໍ່​ລືມ​ຈັກ​ເທື່ອ ​ແລະ​ກໍ​ຈະຕ້ອງ​ຈື່ຈໍາ​ຕະຫລອດ​ໄປ​ວ່າ​ ​ໄດ້ມີ​ຫຍັງ​ເກີດ​ຂຶ້ນ​ໃນ​ພວກ​ອາຄານ​ເຫລົ່າ​ນີ້ ​ເພື່ອ​ວ່າເຂົາ​ເຈົ້າ​ຈະ​ໄດ້​ເລົ່າ​ໃຫ້​ຜູ້​ຄົນ​ໃນ​ລຸ່ນ ຕໍ່ໆ​ໄປ​ ແລະ​ໃຫ້​ເຂົາ​ເຈົ້າ​ຮູ້ຈັກ​ກ່ຽວ​ກັບ​ຜູ້ຄົນທີ່​ ໄດ້​ເສຍ​ຊີວິດ​ພາຍ​ໃຕ້​ການ​ປົກຄອງ​ຂອງ​ພວກ​ຂະ​ເໝນ​ແດງ​ນັ້ນ.


ທ່ານ​ດາຣາວຸດເສັງກ່າວ​ວ່າ ​ສູນ​ສຶກສາທີ່​ວ່າ​ນີ້​ເມື່ອ​ສ້າງ​ສໍາ​ເລັດ​ແລ້ວຈະ​ສິ້ນ​ເປືອງ​ຄ່າ​ໃຊ້​ຈ່າຍ ​ປະມານ 10 ພັນດອນລາ ແລະທ່ານກໍຢາກ ເຫັນໂຄງການລາຄາຖືກກຸ້ມ​ຕົນ​ເອງແບບນີ້ ມີຂຶ້ນໃນທົ່ວປະເທດ. ທ່ານ ກ່າວຕໍ່ໄປວ່າ ສານອາຊະຍາກໍາສົງຄາມນີ້ແມ່ນຈັດຕັ້ງຂຶ້ນມາ ເພື່ອອໍາ ນວຍຄວາມຍຸຕິທໍາທາງກົດໝາຍ ແລະ​ໄດ້ພິສູດໃຫ້ເຫັນວ່າເປັນຈຸດເລີ້ມຕົ້ນທີ່ສໍາ ຄັນສໍາລັບການດໍາເນີນຂັ້ນຕອນສ້າງຄວາມປອງດອງຊາດ.

ແຕ່ພວກໂຄງການຕ່າງໆ ເຊ່ນສູນກາງດັ່ງກ່າວນີ້ ຈະ​ເປັນປາກກະບອກສຽງອັນຖາວອນ ສໍາລັບ​ໃຫ້ປະຊາຄົມໄດ້ຮຽນຮູ້ກ່ຽວ​ກັບ​ສິ່ງ​ທີ່​ໄດ້ເກີດຂຶ້ນ ແລະທ່ານດາຣາວຸດເສັງກ່າວວ່າ ນັ້ນ​ແມ່ນ​ສອດຄ່ອງ​ກັບຈຸດປະສົງ​ອັນນຶ່ງຂອງສານອາດຊະຍາກໍາ​ສົງຄາມ ຊຶ່ງກໍເພື່ອຊ່ອຍ​ໃຫ້ ປະຊາຊົນກໍາປູເຈຍໄດ້ຖອດ​ຖອນ​ບົດຮຽນ ຈາກປະວັດສາດອັນ​ໜ້າ​ສະ​ລົດ​ໃຈ​ທີ່ສຸດຂອງຕົນ.

XS
SM
MD
LG