ຫລັງຈາກຫລາຍປີແຫ່ງຄວາມເຄັ່ງຂືມທາງດ້ານການເມືອງມາແລ້ວ ປະທານາທິບໍດີ
Barack Obama ແລະບັນດາຜູ້ນຳຂັ້ນສູງໃນພັກຣີພັບບລິກັນ ໃນທີ່ສຸດກໍໄດ້ຕົກລົງວ່າ ຈະກ້າວເຂົ້າໄປຫາການແກ້ໄຂບັນຫາທີ່ປະເຊີນໜ້າກັບ ວໍຊິງຕັນ ທີ່ເຫັນວ່າ ຣັດເຊຍໂຈມຕີທາງອິນເຕີແນັດ ເພື່ອແຊກແຊງການເລືອກຕັ້ງປະທານາທິບໍດີສະຫະລັດ.
ໃນວັນຈັນຜ່ານມານີ້ ຜູ້ນຳສະພາສູງສຽງສ່ວນຫລາຍ ທ່ານ Mitch McConnell ແລະ ຜູ້ນຳສະພາຕໍ່າ ທ່ານ Paul Ryan ໄດ້ເຫັນພ້ອມວ່າຈະສືບສວນກ່ຽວກັບການເລືອກຕັ້ງ. ທ່ານ McConnell ກ່າວວ່າ “ຣັດເຊຍບໍ່ແມ່ນເພື່ອນຂອງພວກເຮົາ.”
ທ່ານ Ryan ກ່າວວ່າ ການສືບສວນຂອງສະພາຕໍ່າ “ຄວນລົບລ້າງຄວາມສົງໄສໃດໆ” ໃນໄຊຊະນະຂອງທ່ານ Trumpແຕ່ການແຊກແຊງຂອງຕ່າງປະເທດ ໃນການເລືອກຕັ້ງຂອງ ສະຫະລັດ “ເປັນການຮັບເອົາບໍ່ໄດ້ທັງໝົດ” ແລະການພົວພັນຂອງຣັດເຊຍ “ແມ່ນເປັນບັນຫາໂດຍສະເພາະ.”
ໃນການປາກົດໂຕໃນຕອນແລງວັນຈັນຢູ່ ສູນກາງຕະຫລົກ ຂອງ Daily Show ປະທານາ ທິບໍດີ Obama ອະທິບາຍວ່າ ທ່ານໄດ້ສັ່ງໃຫ້ທົບທວນຢ່າງລະອຽດກ່ຽວກັບການໂຈມຕີທາງອິນເຕີແນັດຂອງຣັດເຊຍ.
ປະທານາທິບໍດີ Obama ກ່າວວ່າ “ເຫດຜົນທີ່ຂ້າພະເຈົ້າໄດ້ຮຽກຮ້ອງ ໃຫ້ມີການທົບທວນ ຄືນ ແມ່ນພຽງແຕ່ວ່າເປັນການຮິບໂຮມເອົາຂໍ້ມູນຕ່າງໆທັງໝົດໃນການສືບສວນ ການປະຕິບັດງານສືບລັບທີ່ໄດ້ປະຕິບັດມາຫລາຍເດືອນ ເພື່ອໃຫ້ສາທາລະນະ ແລະບັນດາຜູ້ຕາງ ໜ້າການເລືອກຕັ້ງໄດ້ດຳເນີນໄປໜ້າ ໃຫ້ສາມາດຊອກຫາທາງຫັກຫ້າມການແຊກແຊງດັ່ງ ກ່າວທີ່ຈະເປັນເປັນຜົນກະທົບຕໍ່ການເລືອກຕັ້ງໃນອະນາຄົດ.”
