ເຈົ້າໜ້າທີ່ດັບເພີງ ໃນລັດ California ທາງພາກຕາເວັນຕົກຂອງສະຫະລັດ ໄດ້ປະສົບກັບ ຄວາມກ້າວໜ້າຈຳນວນນຶ່ງ ເພື່ອຄວບຄຸມໄຟປ່າ ທີ່ໄດ້ເຜົາໄໝ້ໃນພື້ນທີ່ຫຼາຍກວ່າ 12 ພັນ hectares ນັບຕັ້ງແຕ່ວັນອັງຄານຜ່ານມານີ້ ແຕ່ວ່າ ບັນດາເຈົ້າໜ້າທີ່ ເຕືອນວ່າ ໃນຂະນະທີ່ພວກເຂົາເຈົ້າບໍ່ຮູ້ວ່າ ມີບ້ານເຮືອນຫຼາຍປານໃດ ທີ່ໄດ້ຖືກທຳລາຍ ແຕ່ກໍຄາດວ່າຈະເປັນຈຳນວນຫຼວງຫຼາຍ.
“ໄຟປ່ານີ້ ແມ່ນໄດ້ກະທົບຢ່າງໜັກ ຄືມັນໄດ້ເຜົາໄໝ້ຢ່າງໄວວາ ແລະເຜົາໄໝ້ຢ່າງຮ້າຍແຮງ ທີ່ພວກເຮົາບໍ່ເຄີຍໄດ້ພົບເຫັນມາກ່ອນ. ຈະມີຫຼາຍໆຄອບຄົວທີ່ກັບຄືນມາບ້ານ ດ້ວຍການໝົດຕົວສູນເສຍທຸກຢ່າງ,” ນັ້ນແມ່ນຄຳເວົ້າຂອງທ່ານ Mark Hartwig ຫົວໜ້າໜ່ວຍ ດັບເພີງຂົງເຂດເມືອງ San Bernardino.
ໄຟປ່າທີ່ວ່ານີ້ ແມ່ນໄດ້ເຜົາຜານທຳລາຍໃນເຂດພູທາງພາກເໜືອຂອງເມືອງ San Bernardino ໂດຍໄໝ້ພວກຕົ້ນໄມ້ທີ່ເປັນພຸ່ມແຫ້ງ ແລະກໍສົ່ງຄວັນສີຂາວແລະສີດຳຂຶ້ນສູ່ເທິງທ້ອງຟ້າ. ມີເຈົ້າໜ້າທີ່ດັບເພີງ ຫຼາຍກວ່າ 1 ພັນ 5 ຮ້ອຍຄົນ ໄດ້ປະຕິບັດໜ້າທີ່ຢູ່ໃນພື້ນທີ່ແລ້ວ ແລະຍັງມີອີກຈຳນວນນຶ່ງ ກຳລັງເດີນທາງໄປຊ່ອຍມອດໄຟ.
ປະມວນພາບ: ໄຟປ່າ ໃນລັດ California
ລັດ California ແມ່ນຄຸ້ນເຄີຍກັບການເກີດໄຟປ່າໃນໄລຍະຊຸມເດືອນລະດູຮ້ອນ ແຕ່ວ່າໄຟໄໝ້ດັ່ງກ່າວ ແມ່ນລາມອອກໄປໄວຫລາຍ. ສາເຫດຂອວການເກີດໄຟໄໝ້ນີ້ ແມ່ນບໍ່ເປັນທີ່ຊາບກັນເທື່ອ.
“ນີ້ແມ່ນປີ ທີ 5 ຂອງການແຫ້ງແລ້ງໃນລັດພວກເຮົາ ຊຶ່ງມັນໄດ້ສົມທົບກັບການທີ່ມີອາກາດຮ້ອນ ມີຄວາມຊຸ່ມຕ່ຳ ແລະລົມທີ່ພວກເຮົາເຫັນວ່າມັນເຄື່ອນຍ້າຍຢ່າງໄວວານັ້ນ ແມ່ນຮຸນແຮງ,” ນັ້ນຄືຄຳເວົ້າຂອງທ່ານ Henry Herrera ໂຄສົກຂອງໜ່ວຍດັບເພີງ ທີ່ໄດ້ກ່າວໄວ້.
ມີພຽງແຕ່ 4 ເປີເຊັນຂອງໄຟໄໝ້ໄດ້ຖືກຄວບຄຸມໄວ້ ດັ່ງນັ້ນການຂົ່ມຂູ່ທີ່ອາດຈະແຜ່ລາມອອກໄປ ໄດ້ເຕືອນໃຫ້ບັນດາເຈົ້າໜ້າທີ່ສັ່ງໃຫ້ຜູ້ຄົນທີ່ຢູ່ອາໄສໃນຂົງເຂດ ຫຼາຍກວ່າ 82 ພັນຄົນ ອອກຈາກບ້ານເຮືອນຂອງພວກເຂົາເຈົ້າ. ພວກເຂົາເຈົ້າໄດ້ກ່າວວ່່າ ການເຄື່ອນຍ້າຍທີ່ວ່ານີ້ ຈະສາມາດຊ່ອຍໃຫ້ ພວກດັບເພີງ ເພັ່ງເລັງໃສ່ ການດັບເພີງແລະບໍ່ຊ່ອຍກູ້ໄພຜູ້ຄົນ ທີ່ຍັງຕົກຄ້າງຢູ່ນັ້ນແລ້ວປະສົບກັບບັນຫາໃນທີ່ສຸດ. ນັ້ນລະ ຍັງມີຜູ້ຄົນບາງພວກທີ່ຍັງລັງເລທີ່ຈະໜີອອກຈາກບ້ານໄປ.
ທ້າວ Joe Cole ຜູ້ອາໄສໃນຂົງເຂດ ໄດ້ກ່າວວ່າ “ຂ້າພະເຈົ້າ ຈະບໍ່ໜີອອກຈາກທີ່ນີ້ ເພາະວ່າ ພວກເຮົາຢູ່ຫ້ອມລ້ອມດ້ວຍຕົ້ນໄມ້ສີຂຽວແລະວ່າ ແລະເມື່ອໃດຫາກເຖິງທີ່ສຸດແລ້ວ ພວກເຂົາເຈົ້າກໍຈະສາມາດດັບໄຟໄດ້ຢູ່ທີ່ນີ້.”
ມີຫຼາຍໆຄົນ ກ່າວວ່າ ພວກເຂົາເຈົ້າຕຽມພ້ອມທີ່ຈະອອກໜີອອກໄປ ຖ້າຫາກວ່າໄຟໄດ້ໄໝ້ມາເຖິງເຂດເພື່ອນບ້ານແລ້ວນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
ເຊີນຊົມ: ການຄວບຄຸມໄຟໄໝ້ຂອງບັນດານັກດັບເພີງ