ກຸ່ມທີ່ເປັນເຄືອຂ່າຍຂອງລັດອິສລາມ ໄດ້ອ້າງເອົາງຄວາມຜິດ
ຊອບໃນການໂຈມຕີດ້ວຍລົດ ລະເບີດຂະໜາດແຮງ ຢູ່ນອກ
ຕຶກໂຮງການຮັກສາຄວາມສະຫງົບຂອງລັດ ທີ່ນະຄອນຫຼວງ
ໄຄໂຣ ໃນຕອນເຊົ້າວັນພະຫັດມື້ນີ້ ທີ່ເຮັດໃຫ້ຫຼາຍສິບຄົນໄດ້
ຮັບບາດເຈັບ ໃນການໂຈມຕີ ຄັ້ງຫລ້າສຸດຂອງພວກຫົວຮຸນແຮງ.
ເຈົ້າໜ້າທີ່ທ້ອງຖິ່ນ ກ່າວວ່າ ມີຕຳຫຼວດຢ່າງນ້ອຍ 6 ຄົນ ຮວມຢູ່
ໃນພວກທີ່ໄດ້ຮັບບາດເຈັບໃນເຫດລະເບີດຂະໜາດແຮງ ທີ່ໄດ້ທຳລາຍດ້ານໜ້າຂອງຕຶກໂຮງການລັດຖະບານແລະ ເຮັດໃຫ້ແກ້ວປ່ອງຢ້ຽມຂອງຕຶກອາຄານບ້ານເຮືອນທີ່ຢູ່ໃກ້ຄຽງ ໃນຄຸ້ມ Shubra ນັ້ນແຕກ.
ພວກເຫັນເຫດການກ່າວວ່າ ຜູ້ໂຈມຕີໄດ້ຈອດລົດທີ່ເຕັມໄປດ້ວຍລະເບີດໄວ້ຢູ່ຂ້າງນອກຕຶກດັ່ງກ່າວ ກ່ອນທີ່ຈະຫລົບໜີໄປນຳລົດອີກຄັນນຶ່ງ. ສຽງລະເບີດແມ່ນດັງແຮງຫຼາຍ ພາໃຫ້ຜູ້ຄົນທີ່ລັບນອນນັ້ນຕື່ນ ໃນທົ່ວນະຄອນຫຼວງ ອິງຕາມລາຍງານຈາກສື່ສັງຄົມ ທີ່ນຳອອກມາເຜີຍແຜ່ນັ້ນ.
“ທະຫານຂອງລັດອິສລາມ” ເປັນຜູ້ທຳການໂຈມຕີ ອີງຕາມຖະແຫຼງການຜ່ານທາງບັນຊີ Twitter ທີ່ພົວພັນກັບແຂວງ Sinai ທີ່ໄດ້ປະຕິຍານວ່າ ຈະຈົງຮັກພັກດີຕໍ່ກຸ່ມລັດອິສລາມ ນັ້ນ.
ພວກຫົວຮຸນແຮງໄດ້ສັງຫານຕຳຫຼວດຫຼາຍຮ້ອຍຄົນແລ້ວ ໃນຄື້ນຟອງຂອງການໂຈມຕີທີ່ແນເປົ້າໝາຍໃສ່ເຈົ້າໜ້າທີ່ ນັບຕັ້ງແຕ່ປີ 2013 ເປັນຕົ້ນມາ ຫລັງຈາກພວກທະຫານໄດ້ໂຄ່ນລົ້ມປະທານາທິບໍດີຂອງພັກສາສະໜາອິສລາມ ທ່ານ Mohamed Morsi. ໃນເມື່ອມໍ່ໆມານີ້ ພວກຫົວຮຸນແຮງໄດ້ເພັ່ງເລັງການໂຈມຕີຂອງຕົນ ໃສ່ພວກພົນລະເຮືອນ.
ການໂຈມຕີຄັ້ງຫຼ້າສຸດ ມີຂຶ້ນບໍ່ເທົ່າໃດມື້ ຫຼັງຈາກອີຈິບໄດ້ຮັບຮອງເອົາກົດໝາຍຕໍ່ຕ້ານການກໍ່ການຮ້າຍ ທີ່ມີຄວາມໝາຍຄຸມເຄືອບໍ່ຈະແຈ້ງ ສະບັບໃໝ່ ຊຶ່ງພວກນັກວິຈານ ກ່າວວ່າ ເປັນຄວາມພະຍາຍາມເພື່ອເຮັດໃຫ້ການລ່ວງລະເມີດສິດທິມະນຸດຂອງລັດຖະບານ ເປັນທີ່ ຖືກຕ້ອງຊອບທຳຕາມກົດໝາຍ.
ກຸ່ມລັດອິສລາມ ອ້າງວ່າ ຕົນວາງລະເບີດ ຢູ່ໄຄໂຣ
