ສະຫະພາບອາຟຣິກາ ໄດ້ກ່າວເມື່ອສັບປະດາແລ້ວນີ້ ວ່າ ຕົນ
ຈະສົ່ງ ໜ່ວຍຮັກສາສັນຕິພາບ ທີ່ມີສະມາຊິກຈຳນວນ 5,000
ຄົນ ໄປຍັງປະເທດບູຣຸນດີ ທ່າມກາງຄວາມຢ້ານກົວວ່າ ປະເທດ
ດັ່ງກ່າວ ຈະຖອຍຫຼັງກັບຄືນໄປສູ່ສົງຄາມກາງເມືອງອີກ ແຕ່
ບູຣຸນດີ ໄດ້ປະຕິເສດ ທີ່ຈະຮັບເອົາກຳລັງຮັກສາສັນຕິພາບນັ້ນ.
ສະພາຄວາມໝັ້ນຄົງແຫ່ງຊາດຂອງບູຣຸນດີ ປະກອບດ້ວຍປະທາ
ນາທິບໍດີ Pierre Nkurunziza ແລະ ບັນດາຄະນະລັດຖະບານ
ຂອງທ່ານທັງ ໝົດ ໄດ້ປະຕິເສດຕໍ່ຂໍ້ສະເໜີການສົ່ງກຳລັງຂອງ
ສະຫະພາບອາຟຣິກາເມື່ອວັນອັງຄານວານນີ້. ມື້ໜຶ່ງກ່ອນໜ້ານີ້
ສະພາບູຣຸນດີ ໄດ້ກ່າວວ່າ ຕົນພິຈາລະນາວ່າ ການສົ່ງກຳລັງເຂົ້າ
ປະເທດນັ້ນ ແມ່ນເປັນການຮຸກຮານ.
ລັດຖະມົນຕີຕ່າງປະເທດບູຣຸນດີ ທ່ານ Alain Nyamitwe ໄດ້ຕຳໜິຕິຕຽນ ສະຫະພາບ
ອາຟຣິກາ ທີ່ບໍ່ໄດ້ປຶກສາຫາລື ກັບລັດຖະບານຂອງທ່ານ ກ່ອນທີ່ຈະຕັດສິນໃຈ ສົ່ງກຳລັງ
ຮັກສາສັນຕິພາບ ໄປປະເທດຂອງທ່ານ.
ທ່ານ Nyamitwe ເວົ້າວ່າ “ການຕັດສິນໃຈ ຂອງສະພາສັນຕິພາບ ແລະຄວາມໝັ້ນຄົງ
ມີຂໍ້ກຳນົດອັນໜຶ່ງ ທີ່ໃຫ້ລັດຖະບານຂອງສາທາລະນະລັດ ບູຣຸນດີ ມີຄຳເຫັນ ກ່ຽວກັບ
ການສົ່ງທະຫານເຫຼົ່ານັ້ນ ໄປປະຈຳການ. ໃນຄວາມເປັນຈິງແລ້ວ ການຕັດສິນ ໃນໂຕ
ມັນເອງນັ້ນ ກໍແມ່ນວ່າ ລັດຖະບານຂອງສາທາລະນະລັດ ບູຣຸນດີ ແມ່ນຕ້ອງທຳຕາມ
ສະຫະພາບອາຟຣິກາ ແຕ່ມັນບໍ່ໄດ້ເກີດຂຶ້ນເຊັ່ນນັ້ນເລີຍ ແລະ ພວກເຮົາມີຄວາມເສຍ
ໃຈຫຼາຍ ເພາະວ່າ ມັນກົງກັນຂ້າມ ກັບການທຳງານດ້ານການທູດທີ່ດີ.”
ຮອງປະທານ ຄະນະກຳມະທິການສະຫະພາບອາຟຣິກາ ທ່ານ Erastus Mwencha
ໄດ້ກ່າວຕໍ່ວີໂອເອ ເມື່ອວັນອັງຄານວານນີ້ວ່າ ສະພາສັນຕິພາບ ແລະຄວາມໝັ້ນຄົງ ຂອງ
ສະຫະພາບອາຟຣິກາ ໄດ້ຮັບຟັງຄຳເຫັນຂອງລັດຖະບານບູຣຸນດີ ກ່ອນໜ້າສະພາ ໄດ້ບັນ
ລຸການຕັດສິນໃຈ ທີ່ຈະສົ່ງທະຫານໄປປະຈຳການ.
ແຕ່ທ່ານ Nyamitwe ກ່າວວ່າ ເຖິງແມ່ນໃນຄວາມຈິງແລ້ວ ບູຣຸນດີເປັນປະທານ ຂອງສະ
ພາສັນຕິພາບ ແລະຄວາມໝັ້ນຄົງ ຂອງສະຫະພາບອາຟຣິກາ ສຳລັບເດືອນທັນວາ ແຕ່ກໍບໍ່
ໄດ້ມີການປຶກສາຫາລືກັບ ບູຣຸນດີເລີຍ.
