ຜູ້ນຳສູງສຸດຂອງມຽນມາ ນາຍພົນ Than Shwe ໄດ້ເດີນທາງໄປເຖິງກຸງປັກ ກິ່ງໃນ
ວັນອັງຄານມື້ນີ້ ເພື່ອທຳການຢ້ຽມຢາມຈີນຢ່າງເປັນທາງການ ກ່ອນໜ້າ ການເລືອກຕັ້ງ
ແຫ່ງຊາດໃນລະດູໃບໄມ້ຫຼົ່ນທີ່ຈະມາເຖິງນີ້.
ຈີນເປັນຜູ້ໜຸນຫຼັງມຽນມາຢ່າງແຂງຂັນ ແລະໃຫ້ການສະໜັບສະໜຸນທີ່ສຳຄັນ ທັງໃນດ້ານ
ເສດຖະກິດແລະດ້ານການທູດ. ບັນດາປະເທດຕາເວັນຕົກສ່ວນໃຫຍ່ ແມ່ນໄດ້ຫລີກລ່ຽງ
ບໍ່ຍອມຕິດຕໍ່ຄ້າຂາຍກັບມຽນມາ ຍ້ອນປະເທດດັ່ງກ່າວມີປະວັດການເຄົາລົບນັບຖືສິດທິ
ມະນຸດທີ່ບໍ່ດີ ແລະບໍ່ຍອມມອບອຳນາດໃຫ້ພັກຝ່າຍຄ້ານ ທີ່ໄດ້ຊະນະການເລືອກຕັ້ງເມື່ອ
20 ປີກ່ອນ.
ເປັນທີ່ຄາດກັນວ່າ ນາຍພົນ Than Shwe ຈະໄດ້ພົບປະກັບປະທານປະເທດຈີນ ທ່ານ
ຫູຈິນເທົາ ນາຍົກລັດຖະມົນຕີເຫວັນເຈຍບາວແລະເຈົ້າໜ້າທີ່ອະວຸໂສຄົນອື່ນໆຂອງຈີນ
ໃນລະຫວ່າງການຢ້ຽມຢາມເປັນເວລາ 5 ມື້ເທື່ອນີ້..
ເຖິງແມ່ນບໍ່ໄດ້ມີການເປີດເຜີຍໃຫ້ຊາບກ່ຽວກັບຫົວຂໍ້ຂອງການປະຊຸມໃນຄັ້ງນີ້ກໍຈິງ ແຕ່ພວກ
ນັກຊ່ຽວຊານຄາດວ່າການເຈລະຈາຫາລືຈະເພັ່ງເລັງໃສ່ການເລືອກຕັ້ງຄັ້ງຈະມາຂອງມຽນມາ
ແລະຂໍ້ຕົກລົງທາງດ້ານເສດຖະກິດ ທີ່ທ່ານເຫວັນ ເຈຍ ບາວ ໄດ້ລົງນາມໃນຕົ້ນປີນີ້.
ນອກນັ້ນແລ້ວ ນາຍພົນ Than Shwe ຍັງໄດ້ເດີນທາງໄປຊົມງານມະຫະກຳ ສະແດງ
ສິນຄ້າໂລກທີ່ນະຄອນຊຽງໄຮ້ແລະເຂດເສດຖະກິດພິເສດ Shenzhen ທີ່ແຂວງກວາງ
ຕຸ້ງໃນພາກໃຕ້ຂອງຈີນ ກ່ອນຈະເດີນທາງກັບຄືນສູ່ປະເທດມຽນມາໃນມື້ວັນເສົາຈະມານີ້.
