ລິ້ງ ສຳຫລັບເຂົ້າຫາ

ຊາວມຸສລິມແລະຊາວພຸດ ປະທະກັນ ທີ່ມຽນມາ: 7 ຄົນ ເສຍຊີວິດ

  • ທອງປານ ເທບວົງສາ

ຊາວເຜົ່າ Rakhine ຈໍານວນນຶ່ງ ສວດມົນພາວະນາ ຢູ່ທີ່ວັດ Shwedagon ໃນນະຄອນຢ່າງກຸ້ງ, ວັນທີ 9 ມີຖຸນາ 2012, ຕໍ່ໜ້າສະພາບການວຸ້ນວ້າຍ ລະຫວ່າງຊາວພຸດ ກັບຊາວຣາຄິນ ເມື່ອນຶ່ງອາທິດຜ່ານມາ.

ທາງ​ການມຽນມາ​ໄດ້​ສົ່ງກໍາລັງ​ຮັກສາ​ຄວາມ​ປອດ​ໄພ​ ​ໄປ​ປະຕິບັດ​ໜ້າ​ທີ່ຢູ່​ໃນ​ເຂດ​ຕາ​ເວັນ​ຕົກຂອງປະ​ເທດ​ ໃກ້​ຊາຍ​ແດນ​ຕິດ​ກັບ​ບັງ​ກລາ​ເດ​ສ ​ເພື່ອ​ກອບກູ້​ເອົາຄວາມ​ສະຫ​ງົບ ຢູ່​ທີ່​ນັ້ນ​ຄືນ​ມາ ຫຼັງຈາກເກີດເຫດການ​ກໍ່​ຄວາມ​ຮຸນ​ແຮງລະຫວ່າງ​ຊົນ​ເຜົ່າທີ່​ຍັງ​ຜົນ​ໃຫ້​ມີ​ຜູ້​ເສຍ​ຊີວິດຢ່າງ​ໜ້ອຍ 7 ຄົນ​ນັ້ນ.

ໜ່ວຍ​ຕໍາຫຼວດ​ແລະ​ທະຫານ ​ໄດ້​ກອບ​ກູ້​ສະຖານະ​ການໃຫ້ກັບຄືນສູ່ຄວາມ ສະຫງົບ​ ແລະ​ຫ້າມ​ການ​ສັນຈອນ​ໃນ​ຍາມ​ຄໍ່າ​ຄືນ​ຢູ່​ໃນ​ລັດ Rakhine ​ເມື່ອ​ວັນ​ເສົາ​ວານ​ນີ້ ຫຼັງ
ຈາກ​ເກີດ​ເຫດການກໍ່​ການ​ຈະລາຈົນ​ຕະຫຼອດຄືນ​ລະຫວ່າງ​ຊົນ​ເຜົ່າ​ມຸສລິ​ມໂຣຮີ​ງຢາ ​ແລະ​ຊາວ​ພຸດ​ທ້ອງ​ຖິ່ນ.

ສື່​ມວນ​ຊົນ​ລັດ​ກ່າວ​ວ່າ ຢ່າງ​ໜ້ອຍ​ເຈັດ​ຄົນ​ເສຍ​ຊີວິດ​ໃນ​ການ​ສູ້​ລົບ​ກັນ ​ແລະຕຶກ​ອາຄານຫຼາຍຮ້ອຍ​ແຫ່ງ​ຖືກ​ຈູດ​ເຜົາ.

ສະຫະລັດ​ໄດ້​ສະ​ແດງ​ຄວາມ​ເປັນ​ຫ່ວງ​ ນໍາລາຍ​ງານ​ຕ່າງໆກ່ຽວ​ກັບເຫດ ການ​ກໍ່ຄວາມ​ຮຸນ​ແຮງ​ທີ່​ກໍາ​ລັງ​ດໍາ​ເນີນ​ໄປ​ຢູ່​ໃນລັດ Rakhine ນັ້ນ.

​ທ່ານ​ນາງ Victoria Nuland ໂຄສົກ​ກະຊວງ​ຕ່າງປະ​ເທດ ກ່າວ​ວ່າ ວໍ​ຊິງ​ຕັນ​ກໍາລັງ​ຕິດຕາມ​ເບິ່ງ​ສະຖານະ​ການ ​ແລະ​ຮຽກຮ້ອງ​ໃຫ້ທຸກ​ຝ່າຍ​ຍຸຕິ​ການ​ໂຈມຕີ​ທີ່​ຮຸນ​ແຮງ​ນັ້ນ​ໂດຍ​ທັນທີ.

ຖະ​ແຫຼງການ​ທີ່​ອອກ​ເມື່ອວັນ​ເສົາ​ວານ​ນີ້ ຍັງ​ໄດ້​ຮຽກຮ້ອງ​ໃຫ້​ລັດຖະບານ ຈົ່ງ​ທໍາ​ການ​ສືບ​ສວນ​ສອບ​ສວນ​ໄປ​ຕາມ​ຕົວ​ບົດ​ກົດໝາຍ.

ຄວາມ​ເຄັ່ງ​ຕຶງ​ໄດ້​ມີ​ຢູ່​ໃນລະດັບສູງ ​ໃນ​
ລັດ Rakhine ນັບ​ຕັ້ງ​ແຕ່​ວັນອາທິດ
ແລ້ວ​ນີ້ ​ເວລາ​ແກ໊ງຊາວ​ພຸດ​ໄດ້​ໂຈມ​ຕີ
​ລົດ​ບັສຄັນ​ນຶ່ງ ​ແລະ​ໄດ້​ສັງຫານ​ຊົນ​ເຜົ່າ​
ໂຣຮິງ​ຢາ 10 ຄົນ ຍ້ອນເຂົ້າ​ໃຈ​ຜິດ​ວ່າ
​ພວກ​ເຂົ​າ​ເຈົ້າ​ເປັນ​ຕົວ​ການໃນ​ການ
ລວມຫົວ​ກັນຂົ່ມຂືນແລະ​ສັງຫານ
​ແມ່ຍິງ​ຊາວ​ພຸດ​ຄົນ​ນຶ່ງເມື່ອ​ບໍ່​ດົນ​ມາ​ນີ້.

ມຽນມາ​ບໍ່ຖື​ວ່າ​ຊົນ​ເຜົ່າ​ໂຣຮິງ​ຢາ​ເປັນ​ພົນ
ລະ​ເມືອງ​ມຽນມາ ​ເຖິງ​ແມ່ນ​ພວກເຂົາ
​ເຈົ້າຈະ​ອາ​ໃສ​ຢູ່​ໃນ​ເຂດ​ຕາ​ເວັນ​ຕົກຂອງ
​ມຽນມາ ​ແລະ​ມີ​ຈໍານວນຫຼາຍ​ເຖິງ 800,000 ຄົນ​ກໍ​ຕາມ ອີງ​ຕາມ​ອົງການ​ສະຫະ​ປະ
ຊາ​ຊາດ.

​ເມື່ອ​ບໍ່​ນານ​ມາ​ນີ້​ ລັດຖະບານ​ມຽນມາ​ໄດ້​ເລິ່ມທໍາ​ການ​ປະຕິ​ຮູບ​ການ​ເມືອງຫຼາຍຢ່າງ ທີ່​ສົ່ງ​ຜົນ​ໃຫ້ໄດ້​ຮັບ​ການ​ສະ​ໜັບສະ​ໜຸນ​ໂດຍ​ບັນດາ​ປະ​ເທດ​ຕາ​ເວັນ​ຕົກ ທີ່​ໄດ້​ຮຽກຮ້ອງ​ໃຫ້​ມີ​ການ​ປ່ຽນ​ແປງ​ມາ​ດົນ​ນານ​ແລ້ວ​ນັ້ນ. ສື່​ຂອງລັດ​ໄດ້​ເຜີຍ​ແ​ຜ່ຂໍ້​ມູນ​ຢ່າງ​ຫລວງຫຼາຍ ​ແບບ​ຜິດ​ປົກກະຕິ​ວິ​ໄສ ​ກ່ຽວ​ກັບ​ເຫດການ​ກໍ່​ຄວາມຮຸນ​ແຮງ​ຕ່າງໆ​ຂອງ​ອາທິດ​ນີ້.

XS
SM
MD
LG