ການຢ້ຽມຢາມປະເທດໄທ ເປັນເວລາ 4 ມື້ ຂອງທ່ານ Tomas Quintana ແມ່ນ ຮວມທັງ ການເດີນທາງໄປ ເມືອງແມ່ສອດ ຊຶ່ງເປັນຫົວ ເມືອງຊາຍແດນ ແລະເມືອງ ຊຽງໃໝ່ ໃນພາກເໜືອ ຂອງໄທ ບ່ອນທີ່ທ່ານ ໄດ້ພົບປະ ກັບບັນດາ ກຸ່ມປົກຄອງສິດທິມະນຸດ ຂອງມຽນມາ.
ພວກນັກເຄື່ອນໄຫວ ເພື່ອສິດທິມະນຸດ ກ່າວເຖິງການເດີນທາງ ໄປຢ້ຽມຢາມ ຂອງຜູ້ ລາຍງານພິເສດ ອົງການສະຫະປະຊາຊາດ ໃນຄັ້ງນີ້ວ່າ ເປັນການຊອກຄົ້ນຫາຄວາມຈິງ. ແຫຼ່ງຂ່າວຈາກ ອົງການສະຫະປະຊາຊາດ ແຈ້ງວ່າ ທ່ານໄດ້ເດີນທາງ ອອກຈາກປະເທດໄທ ໃນຕອນແລງຂອງມື້ວັນຈັນ ສັບປະດາແລ້ວ.
ທີ່ເມືອງແມ່ສອດ ບ່ອນທີ່ອົບພະຍົບ ແລະພວກລີ້ໄພມຽນມາ ຈຳນວນຫຼາຍພັນຄົນ ພາກັນອາໄສຢູ່ນັ້ນ ທ່ານ Quintana ໄດ້ພົບປະ ກັບສະມາຄົມ ໃຫ້ການຊ່ອຍເຫຼືອ ພວກນັກໂທດການເມືອງ ໃນມຽນມາ. ທ່ານ Bo Kyi ຊຶ່ງເປັນເລຂາທິການຮ່ວມ ຂອງສະມາຄົມ ກ່າວວ່າ:
“ເຫດຜົນທີ່ທ່ານ QUINTANA ມາຢ້ຽມຢາມ ເຂດຊາຍແດນໄທ ມຽນມານັ້ນ ກໍແມ່ນເພື່ອມາເອົາຂໍ້ມູນ ກ່ຽວກັບການຝ່າຝືນສິດທິມະນຸດ ຂອງຊາວມຽນມາ. ເພາະສະນັ້ນ ໃນລະຫວ່າງ ການຢ້ຽມຢາມ ຂອງເພິ່ນນັ້ນ ພວກເຮົາກໍໄດ້ ປຶກສາຫາລືກັນ ເຖິງເລື່ອງການທໍລະມານ ຢູ່ໃນມຽນມາ ການທໍລະມານ ຢູ່ໃນຄຸກມຽນມາ ແລະລະບົບຕຸລາການ ໃນມຽນມາ ເລື່ອງຢຸກຢາສຳລັບພວກນັກໂທດການເມືອງ ແລະພວກນັກໂທດ ຄະດີອື່ນໆ. ນັ້ນແຫລະ ຄືສິ່ງທີ່ພວກເຮົາ ໄດ້ປຶກສາຫາລືກັນ.”
ທ່ານ Bo Kyi ເວົ້າວ່າ ທ່ານ Quintana ໄດ້ສະແດງຄວາມຜິດຫວັງຢ່າງແຮງ ກ່ຽວກັບ ສະຖານະການ ດ້ານສິດທິມະນຸດ ໃນມຽນມາ. ບັນດາກຸ່ມ ປົກປ້ອງສິດທິມະນຸດ ໃນມຽນມາກ່າວວ່າ ລັດຖະບານທະຫານມຽນມາ ໄດ້ຈັບກຸມຄຸມຂັງ ພວກນັກໂທດການເມືອງ ຫຼາຍກວ່າ 2,000 ຄົນ ຮວມທັງ ທ່ານນາງອອງຊານຊູຈີ ຜູ້ທີ່ເຄີຍໄດ້ຮັບ ລາງວັນໂນແບລ ຂະແໜງສັນຕິພາບ ທີ່ພວມຖືກກັກບໍລິເວນ ໃນເວລານີ້.
ສ່ວນກຸ່ມອື່ນໆ ທີ່ທາງ VOA ໄດ້ຕິດຕໍ່ໄປນັ້ນ ລັງເລໃຈ ທີ່ຈະເປີດເຜີຍໃຫ້ຮູ້ ກ່ຽວກັບລາຍ ລະອຽດ ໃນການສົນທະນາຫາລື ກັບທ່ານ Quintana ຊຶ່ງບໍ່ໄດ້ພົບປະ ກັບສື່ມວນຊົນ ໃນການເດີນທາງ ໄປຢ້ຽມຢາມປະເທດໄທ ເທື່ອນີ້.
ນາງ Debbie Stohardt ໂຄສົກຂອງຕາໜ່າງ ທາງເລືອກອາຊ່ຽນ ເວົ້າວ່າ ທ່ານ Quintana ຢາກຮູ້ຈັກ ແລະເຫັນກັບຕາທ່ານເອງ ສະຖານະການ ທີ່ປະເຊີນໜ້າ ກັບພວກອົບພະຍົບມຽນມາ ໃນໄທນັ້ນ. ນາງກ່າວກ່ຽວກັບເລື່ອງນີ້ວ່າ:
“ມັນເປັນການເຄື່ອນໄຫວ ທີ່ເໝາະສົມແທ້ໆ ທີ່ທ່ານ Quintana ໄດ້ເດີນທາງໄປຍັງ ເຂດຊາຍແດນ ເພື່ອໃຫ້ໄດ້ເຫັນ ກັບຕາທ່ານເອງ ຜົນສະທ້ອນໄລຍະຍາວບາງຢ່າງ ຂອງການລະເມີດສິດທິມະນຸດ ຂອງອຳນາດປົກຄອງມຽນມານັ້ນ. ຢ່າງນ້ອຍ ການເດີນທາງໄປຊາຍແດນ ກໍຈະຊ່ວຍໃຫ້ທ່ານໄດ້ເຫັນວ່າ ຜົນກະທົບ ຈາກການລະເມີດສິດທິມະນຸດ ຂອງອໍານາດປົກຄອງ ເປັນຄືແນວໃດ.”
ທ່ານ Quintana ໄດ້ຊອກຫາຊ່ອງທາງ ເພື່ອຢາກເດີນທາງ ໄປຢ້ຽມຢາມປະເທດມຽນມາ ເປັນຄັ້ງທີ 4 ແຕ່ພວກນັກເຄື່ອນໄຫວ ກ່າວວ່າ ລັດຖະບານມຽນມາ ບໍ່ຍອມອອກວີຊ່າ ໃຫ້ທ່ານ.
ບັນດາກຸ່ມປົກປ້ອງສິດທິມະນຸດ ກ່າວວ່າ ນັ້ນອາດຈະແມ່ນຜົນທີ່ຕິດຕາມມາ ຈາກການຮຽກຮ້ອງ ຂອງທ່ານ Quintana ເພື່ອໃຫ້ມີການສ້າງຕັ້ງ ຄະນະກຳມາທິການສືບສວນ ກ່ຽວກັບການກໍ່ອາດຊະຍາກຳສົງຄາມ ແລະກໍ່ໂທດກຳ ຕ້ານມະນຸດຊາດ ໂດຍລັດຖະບານມຽນມາ ຊຶ່ງເປັນທີ່ຮູ້ຈັກກັນ ໃນນາມສະພາສັນຕິພາບ ແລະພັດທະນາແຫ່ງລັດ ເອີ້ນຫຍໍ້ວ່າ SPDC ນັ້ນ.
ນາງ Stothardt ກ່າວວ່າ ການປະຕິເສດ ບໍ່ຍອມອອກວີຊ່າໃຫ້ ຂອງລັດຖະບານທະຫານ ມຽນມານັ້ນ ແມ່ນເປັນບາດກ້າວຖອຍຫຼັງ ຊຶ່ງນາງເວົ້າວ່າ.
“ມັນບໍ່ແມ່ນຮ່ອງຮອຍທີ່ດີເລີຍ ທີ່ສະພາ SPDC ປະຕິເສດ ບໍ່ຍອມອະນຸຍາດໃຫ້ທ່ານ ເຂົ້າໄປໃນມຽນມາ ໂດຍສະເພາະໃນເວລານີ້ ຊຶ່ງອໍານາດປົກຄອງມຽນມາ ກໍາລັງກຽມຈັດການເລືອກຕັ້ງຂຶ້ນ ເພື່ອປັບປຸງສະຖານນະການ ໃຫ້ດີຂຶ້ນ.”
ພວກທະຫານມຽນມາກ່າວວ່າ ຕົນຈະຈັດການເລືອກຕັ້ງຂຶ້ນ ໃນວັນທີ 7 ພະຈິກ ທ້າຍປີນີ້. ບັນດາກຸ່ມ ປົກປ້ອງສິດທິມະນຸດເວົ້າວ່າ ການເລືອກຕັ້ງ ຊຶ່ງເປັນເທື່ອທຳອິດ ໃນຮອບ 20 ປີ ແລະລັດຖະທຳມະນູນ ສະບັບໃໝ່ ຂອງມຽນມາ ຈະເສີມຂະຫຍາ ຍອິດທິພົນຂອງພວກທະຫານ ໃຫ້ເຂັ້ມແຂງຕື່ມຂຶ້ນ.
ໃນມື້ວັນຈັນ ສັບປະດາແລ້ວ ທ່ານ Ban Ki Moon ເລຂາທິການໃຫຍ່ ຂອງອົງການ ສະຫະປະຊາຊາດ ກ່າວວ່າ ລັດຖະບານມຽນມາ ບໍ່ໄດ້ສະໜອງຕອບ ຕໍ່ການດຳເນີນຄວາມພະຍາຍາມ ຂອງອົງການສະຫະປະຊາຊາດ ທີ່ຈະສົນທະນາຫາລື ກ່ຽວກັບຄວາມວິຕົກກັງວົນ ສຳລັບການເລືອກຕັ້ງ. ນອກນັ້ນແລ້ວ ທ່ານຍັງເວົ້າວ່າ ທ່ານພວມຢູ່ໃນຂັ້ນຕອນ ຂອງການກະກຽມ ລາຍງານປະຈຳປີ ຕໍ່ກອງປະຊຸມ ສະມັດຊາໃຫຍ່ ສະຫະປະຊາຊາດ ຊຶ່ງທ່ານຈະແຈ້ງໃຫ້ຊາບ ຢ່າງລະອຽດ ກ່ຽວກັບຄວາມເຫັນຂອງທ່ານ ໃນເລື່ອງມຽນມາ ຢູ່ໃນລາຍງານນັ້ນ.
ພວກນັກເຄື່ອນໄຫວ ກ່ຽວກັບມຽນມາ ເວົ້າວ່າ ເປັນທີ່ຄາດກັນວ່າ ທ່ານ Quintana ຈະນຳສະ ເໜີລາຍງານຂອງທ່ານ ກ່ຽວກັບການລ່ວງລະເມີດ ສິດທິມະນຸດ ຂອງລັດຖະບານ ມຽນມາ ພາຍໃນທ້າຍປີນີ້.
