ທະຫານໄທ 2 ຄົນໄດ້ຮັບບາດເຈັບສາຫັດໃນຕົ້ນສັບປະດານີ້ຈາກການຍິງປືນໃຫຍ່ໂຈມ
ຕີຢ່າງໜັກຂອງພວກທະຫານມຽນມາໃສ່ເລາະຕາມເຂດຊາຍແດນຕິດກັບໄທນັ້ນ.
ເຫດການດັ່ງກ່າວເກີດຂຶ້ນໃນວັນຈັນມື້ກ່ອນນີ້ ໃນຂະນະທີ່ລົດບັນທຸກທະຫານໄທຄັນ
ນຶ່ງກໍາລັງທໍາການລາດຕາເວນຢູ່ທີ່ເມືອງແມ່ສອດໃນຈັງຫວັດຕາກ. ພວກທະຫານມຽນ
ມາ ກໍາລັງຍິງປືນໃສ່ພວກທະຫານທີ່ເປັນພັນທະມິດຫຼືຢູ່ຖັນແຖວດຽວກັນກັບກຸ່ມກະບົດ
ກອງທັບປະຊາທິ ປັດຊາວພຸດກະຫລ່ຽງນັ້ນ.
ເວລານີ້ພວກທະຫານໄທ 2 ຄົນທີ່ໄດ້ຮັບບາດເຈັບກໍາລັງຮັບການປິ່ນປົວບາດແຜຢູ່ໃນໂຮງ
ໝໍເມືອງແມ່ສອດຂອງໄທ.
ກຸ່ມກະບົດທະຫານບ້ານຊາວກະຫລ່ຽງໄດ້ປະທະກັນເລື້ອຍໆກັບພວກທະຫານລັດຖະບານມຽນມາຢູ່ເລາະຕາມຊາຍແດນ ລະຫວ່າງມຽນມາຕິດກັບໄທນັ້ນ. ພວກກະບົດຊາວກະຫລ່ຽງໄດ້ຍຶດເອົາອາຄານຫລາຍຫລັງໃນເມືອງຊາຍແດນເມຍວະດີໃນເດືອນພະຈິກປີຜ່ານມາ ຊຶ່ງ ໄດ້ພາໃຫ້ເກີດການຕໍ່ສູ້ກັນເປັນເວລາ 2 ມື້ກັບພວກທະຫານມຽນມາທີ່ເຮັດໃຫ້ພວກຊາວບ້ານປະມານ 2 ໝື່ນຄົນຕ້ອງອົບພະຍົບເຂົ້າໄປອາໄສຢູ່ໃນໄທນັ້ນ.
