ນັກເຄື່ອນໄຫວເພື່ອປະຊາທິປະໄຕຂອງມຽນມາ ທ່ານນາງ Aung San Suu Kyi ໄດ້ໄປຍັງບ້ານພັກຮັບຮອງແຂກຂອງລັດຖະບານໃນຢາງກຸ້ງ ໃນວັນຈັນມື້ນີ້ ເພື່ອໂອ້ລົມສົນທະນາເປັນຄັ້ງທໍາອິດ ກັບເຈົ້າໜ້າທີ່ຂັ້ນສູງຂອງລັດຖະບານ ຫຼັງຈາກທີ່ຖືກປ່ອຍເປັນອິດສະລະຈາກການຖືກກັກບໍລິເວນໃຫ້ ຢູ່ແຕ່ໃນບ້ານເຮືອນ ໃນເດືອນພະຈິກປີກາຍນີ້.
ໃນຖະແຫລງການຮ່ວມສະບັບນຶ່ງທີ່ອອກໃນເວລາຕໍ່ມາ ທ່ານນາງ ອອງ ຊານຊູຈີ ທີ່ໄດ້ຮັບລາງວັນໂນແບລຂະແໜງສັນຕິພາບ ແລະລັດຖະມົນຕີກະຊວງແຮງງານ ທ່ານ ອອງ ຈີ ກ່າວວ່າ ພວກທ່ານທັງສອງມີຄວາມພໍໃຈນໍາການພົບປະສົນທະນາກັນ ທີ່ໄດ້ກວມບັນຫາຫລາຍເລື່ອງທີ່ຖະແຫລງການເວົ້າວ່າ ຈະເປັນປະໂຫຍດແກ່ປະຊາຊົນມຽນມາ. ລັດຖະມົນຕີແຮງງານ ອອງ ຈີ ທີ່ອ່ານຈາກເອກະສານທີ່ກຽມໄວ້ແລ້ວນັ້ນ ກ່າວວ່າການສົນທະນາຂອງພວກທ່ານແມ່ນໂຮມເອົາທັງເລື່ອງການປົກຄອງດ້ວຍໂຕບົກກົດໝາຍ ແລະການເອົາ “ຊະນະຄວາມແຕກແຍກກັນ”.
ພວກລັດຖະບານຕາເວັນຕົກແລະກຸ່ມສິດທິມະນຸດຕ່າງໆ ແມ່ນໄດ້ຮຽກຮ້ອງໃຫ້ ລັດຖະບານໃໝ່ຂອງມຽນມາ ເປີດການເຈລະຈາກັບບັນດາກຸ່ມຝ່າຍຄ້ານ ຊຶ່ງຮວມທັງທ່ານນາງ Aung San Suu Kyi ແລະພວກເຂົາເຈົ້າຍັງພະຍາຍາມ ຊຸກຍູ້ໃຫ້ມຽນມາປ່ອຍບັນດານັກໂທດທາງການເມືອງ ຈໍານວນຫຼາຍກວ່າ 2,000 ຄົນ ນັ້ນນໍາ.
