ລິ້ງ ສຳຫລັບເຂົ້າຫາ

ທ່ານນາງ Aung San Suu Kyi ຈະກ່າວຄໍາປາໄສ ຕໍ່ສະພາອັງກິດ

  • ໄພສານ ວໍຣະຈັກ

ຜູ້ນໍາຝ່າຍຄ້ານຂອງທຽນມາ ທ່ານນາງ Aung San Suu Kyi, ຂວາມື ກໍາລັງສົນທະນາກັບບັນດານັກຂ່າວ ຮ່ວມກັບທ່ານ Derek Mitchell, ຊ້າຍມື ທູດພິເສດຂອງ ສະຫະລັດ ອາເມຣິກາ ທີ່ Myanmar.

ຜູ້​ນໍາ​ປະຊາທິປະໄຕ​ມຽນມາ ທ່ານ​ນາງ Aung San Suu Kyi ​ຈະ​ກ່າວ​ຄຳ​ປາ​ໄສ​ຄັ້ງ
ປະຫວັດສາດຕໍ່​ທັງສອງ​ສະພາ​ຂອງ​ອັງກິດ ​ໃນ​ເດືອນ​ໜ້າ​ນີ້ ​ເວລາທີ່​ທ່ານ​ນາງ​ເດີນ
​ທາງ​ອອກ​ໄປ​ຢ້ຽມຢາມຕ່າງປະ​ເທດເປັນ​ຄັ້ງ​ທໍາ​ອິດ​ໃນຮອບ 24 ປີ.

ນາຍົກລັດຖະມົນຕີອັງກິດ ທ່ານ David Cameron ​ໄດ້ເຊື້ອເຊີນທ່ານ ນາງ ​Aung
San Suu Kyi ຜູ້​ໄດ້​ຮັບ​ລາງວັນ​ Nobel ຂະ​ແໜງສັນ​ຕິ​ພາບ​ ​ໄປ​ຢ້ຽມຢາມ​ປະ​ເທດ
​ອັງກິດ ໃນເວລາ​ທີ່ທ່ານ​ໄດ້​ໄປ​ຢ້ຽມຢາມ​ທ່ານ​ນາງ ​ຢູ່ທີ່ມຽນມາ​ ໃນ​ເດືອນ​ເມສາ​ທີ່​
ຜ່ານ​ມາ.

ທ່ານ​ນາງ Aung San Suu Kyi ​ໄດ້​ຮັບ​ກຽດແບບທີ່​ບໍ່​ມີ​ມາ​ກ່ອນ ໃຫ້ກ່າວ​ຄໍາ​ປາ
ໄສຕໍ່​ກອງ​ປະຊຸມຮ່ວມ​ຂອງສະພາອັງກິດ ​ເຖິງ​ແມ່ນ​ວ່າ​ທ່ານ​ນາງ​ບໍ່​ຢູ່​ໃນ​ລະດັບ​ຂັ້ນ
​ຜູ້​ນໍາປະ​ເທດກໍ​ຕາມ.

ທ່ານ​ນາງ​ມີ​ກຳນົດຈະເລີ້ມ​ການຢ້ຽມຢາມ​ປະ​ເທດ​ອັງກິດ ເປັນ​ເວລາ​ນຶ່ງ​ອາທິດ​ໃນ​
ວັນ​ທີ 18 ເດືອນມິ​ຖະ​ນາ ຈະ​ມານີ້. ນອກ​ນັ້ນ ຍັງ​ຄາດ​ວ່າທ່ານ​ນາງຈະ​ໄປ​ຢ້ຽມ​ຢາມ​
ປະ​ເທດ​ນໍ​ເວ ນຳ​ດ້ວຍ.

ທ່ານ​ນາງເຄີຍໄດ້​ຢູ່ທີ່​ປະ​ເທດ​ອັງກິດ​ມາຫລາຍ​ປີ​ກັບ​ສາມີຂອງ​ທ່ານ​ນາງ ທີ່​ໄດ້​ເຖິງ​ແກ່​
ມໍຣະນະ​ກໍາ​ໄປ​ແລ້ວພ້ອມ​ດ້ວຍ​ລູກ​ສອງ​ຄົນ​ຂອງ​ທ່ານນາງ ຈົນ​ເຖິງ​ປີ 1988 ​ທ່ານ​ນາງ
​ຈຶ່ງໄດ້​ກັບ​ຄືນ​ໄປ​ຢູ່​ບ້ານ​ເກີດ​ເມືອງນອນ ​ເວລາ​ນີ້ເອງທ່ານ​ນາງ​ໄດ້​ຖືກສັ່ງ​ໃຫ້​ສົ່ງ​ໜັງສື
ຜ່ານ​ແດນຄືນ. ນັບ​ແຕ່​ນັ້ນ​ມາທ່ານ​ນາງບໍ່​ໄດ້​ເດີນທາງ​ອອກ​ຈາກ​ມຽນມາ ຍ້ອນຢ້ານ​ວ່າ​
ພວກ​ຜູ້ນຳ ລັດຖະບານທະຫານ​ ທີ່​ເຂົ້າກໍາອໍານາດ ມາຈົນ​ເຖິງ​ປີ 2011 ນັ້ນ ຈະ​ບໍ່
ອະນຸຍາດ​ໃຫ້​ທ່ານ​ນາງກັບ​ຄືນປະ​ເທດ​.

ການ​ເດີນທາງ​ຢ້ຽມ​ຢາມ​ຢູ​ໂຣບຂອງ​ທ່ານ​ນາງ ແມ່ນຈະ​ມີ​ຂຶ້ນຫຼັງຈາກ​ໄດ້​ມີ​ການປ່ຽນ​
ແປງ​ຫລາຍໆ​ຢ່າງ​ຢູ່ໃນ​ມຽນມາຮວມ​ທັງ​ການ​ເລືອກ​ຕັ້ງ​ຄັ້ງ​ປະ​ຫວັດ​ສາດໃນ​ເດືອນ​ເມສາ
ທີ່​ທ່ານ​ນາງ​ໄດ້​ຊະນະ​ບ່ອນ​ນັ່ງ​ຢູ່​ໃນສະພາ ທີ່ເຂົ້າມາ​ແທນການປົກຄອງ​ແບບ​ຜະ​ເດັດ​
ການຂອງ​ທະຫານ​ເປັນ​ເວລາ​ເກືອບ ຫ້າ​ທົດ​ສະ​ວັດ​.

​ໃນ​ວັນ​ພະຫັດຜ່ານມາ​ນີ້ ລັດຖະມົນ​ຕີ​ການ​ຕ່າງປະ​ເທດ​ສະຫະລັດ ທ່ານ​ນາງ Hillary
Clinton ​ໄດ້​ປະກາດໂຈະ ການ​ລົງ​ໂທດ​ທາງ​ດ້ານ​ເສດຖະກິດ​ຕໍ່​ມຽນມາ ຊຶ່ງ​ໄດ້​ຫ້າມ​ບໍ່​
ໃຫ້ສະຫະລັດ ໄປ​ລົງ​ທືນ​ໃນ​ປະ​ເທດດັ່ງກ່າວມາ​ເປັນ​ເວລາ 15 ປີ​. ທ່າ​ນນາງ Clinton ​
ຍັງໄດ້​ປະກາດວ່າ ທ່ານ Derek Mitchell ຜູ້ຕາງໜ້າ​ພິ​ເສດ​ຂອງ​ກະ​ຊວງ​ການ​ຕ່າງປະ
​ເທດສະຫະລັດ​ປະຈຳ​ມຽນມາ ຈະ​ໄດ້​ຖືກແຕ່ງຕັ້ງໃຫ້​ເປັນ​ເອກ​ອັກຄະ​ລັດຖະທູດຂອງ​
ສະຫະລັດ ປະ​ຈໍາ​ປະ​ເທດດັ່ງກ່າວ.

XS
SM
MD
LG