ສານສູງສຸດຂອງມຽນມາ ບໍ່ຍອມຮັບຟັງຄໍາອຸທອນ ຂອງທ່ານນາງອອງຊານຊູຈີ ຜູ້ນໍາປະ ຊາທິປະໄຕໃນມຽນມາ ກ່ຽວກັບການກັກໂຕທ່ານນາງໃຫ້ຢູ່ໃນບໍລິເວນບ້ານເຮືອນນັ້ນ.
ກໍານົດການກັກໂຕຜູ້ນໍາຝ່າຍຄ້ານໃຫ້ຢູ່ໃນບໍລີເວນບ້ານເຮືອນຈະໝົດອາຍຸໃນວັນເສົາສັບປະດານີ້ ແຕ່ທ່ານນາງໄດ້ຕັ້ງຄວາມຫວັງໄວ້ວ່າ ຈະທໍາການເຄື່ອນໄຫວທາງດ້ານກົດໝາຍເພື່ອສະແດງໃຫ້ເຫັນວ່າ ການກັກໂຕທ່ານນາງນີ້ບໍ່ຖືກຕ້ອງຕາມກົດໝາຍ.
ທ່ານນາງຖືກຕັດສິນວ່າມີຄວາມຜິດໃນປີແລ້ວນີ້ ໃນຂໍ້ຫາຖານລະເມີດຂໍ້ກໍານົດຕ່າງໆຂອງ ຄໍາສັ່ງຈັບກຸມທ່ານນາງກ່ອນໜ້ານັ້ນ ເວລາທ່ານນາງໃຫ້ບ່ອນພັກເຊົາແກ່ຜູ້ຊາຍອະເມລິກັນຄົນນຶ່ງທ່ີລອຍຂ້າມບຶງມາຍັງບ້ານພັກຂອງທ່ານນາງຢູ່ແຄມບຶງໃນນະຄອນຢັ້ງກຸ້ງໂດຍບໍ່ມີການຮັບເຊີນນັ້ນ. ໃນຂໍ້ຫາທີ່ວ່ານີ້ ທ່ານນາງຖືກຕັດສິນໂທດຈໍາຄຸກໃນຄ້າຍສັບພະທຸກເປັນເວລາ 3 ປີ ແຕ່ນາຍພົນ Than Shwe ຜູ້ນໍາອໍານາດປົກຄອງທະຫານມຽນມາລົດໂທດນັ້ນລົງມາໃຫ້ທ່ານນາງ ເປັນການກັກໂຕໃຫ້ຢູ່ໃນບໍລິເວນບ້ານເຮືອຢູ່ຕໍ່ມາຕື່ມອີກ 18 ເດືອນ.
ພວກທະນາຍຄວາມຂອງທ່ານນາງອອງຊານຊູຈີ ກ່າວວ່າ ພວກເຂົາເຈົ້າຍັງບໍ່ທັນໄດ້ຮັບຂ່າວໃດໆເທື່ອວ່າ ທ່ານນາງຈະຖືກປ່ອຍໂຕໃນວັນເສົານີ້ຫລືບໍ ເວລາກໍານົດການກັກໂຕທ່ານນາງໝົດອາຍຸລົງນັ້ນ.