ສານແຫ່ງນຶ່ງໃນພາກເໜືອຂອງມຽນມາ ໄດ້ຕັດສິນໂທດຈຳຄຸກ ຜູ້ຊາຍສັນຊາດຈີນ 8 ຄົນ ເປັນເວລາດົນນານ ໃນຂໍ້ຫາ ລັກລອບ ຄ້າອາວຸດ ທີ່ຜິດກົດໝາຍ ໃກ້ໆກັບ ຊາຍແດນອິນເດຍ.
ແຫຼ່ງຂ່າວໄດ້ຢືນຢັນກັບ VOA ວ່າ ພວກຜູ້ຊາຍເຫຼົ່ານີ້ ໄດ້ຖືກຈັບໃນເດືອນເມສາແລ້ວນີ້ ພ້ອມກັບອາວຸດປືນ ລູກລະເບີດ ເສື້ອເກາະກັນກະສູນ ແລະລູກປືນ. ບໍ່ໄດ້ມີການເປີດເຜີຍ ລາຍລະອຽດ ຂອງການດຳເນີນຄະດີ ທີ່ໄດ້ມີຂຶ້ນປະມານ 130 ກິໂລແມັດ ທາງທິດຕາເວັນຕົກສຽງເໜືອຂອງນະຄອນ Mandalay.
ຜູ້ຊາຍ 7 ຄົນ ໃນຈຳນວນ 8 ຄົນ ແມ່ນໄດ້ຖືກໂທດຈຳຄຸກຄົນລະ 13 ປີ ສ່ວນຄົນທີ 8 ຖືກໂທດຈຳຄຸກ 10 ປີ.
ພວກຜູ້ຊາຍທີ່ກ່າວມານີ້ ໄດ້ຖືກຈັບກຸມ ຫຼັງຈາກທີ່ໄດ້ຖືກຕຳຫລວດຂັບລົດໄລ່ລ່າ ໃກ້ໆກັບເມືອງ Tamu. ຂົງເຂດດັ່ງກ່າວ ຊຶ່ງເປັນທີ່ຢູ່ອາໄສຂອງກຸ່ມກະບົດພື້ນເມືອງກຸ່ມນ້ອຍ ຫລາຍໆກຸ່ມ ມີຊື່ສຽງວ່າເປັນຖິ່ນ ລັກລອບຄ້າຂາຍຢາເສບຕິດແລະອາວຸດ.
