ສື່ຂອງລັດຖະບານມຽນມາ ໄດ້ກ່າວຄໍາຍ້ອງຍໍຊົມເຊີຍຢ່າງບໍ່ເຄີຍມີມາກ່ອນ ຕໍ່ຜູ້ນໍາ
ປະຊາທິປະໄຕ ທ່ານນາງ Aung San Suu Kyi ຢູ່ໃນບົດບັນນາທິການ ຊຶ່ງເປັນ
ສິ່ງທີ່ຄາດຄິດກັນບໍ່ເຖິງເລີຍ ພຽງເມື່ອບໍ່ເທົ່າໃດເດືອນກ່ອນນີ້ ພາຍໃຕ້ກົດໝາຍ
ກວດກາທີ່ເຄ່ງຄັດ ຂອງປະເທດທີ່ກໍາລັງມີການປະຕິຮູບປ່ຽນແປງນັ້ນ.
ຢູ່ໃນບົດຂຽນທີ່ມີຫົວຂໍ້ເລື້ອງວ່າ “ເຖິງບັນດາຜູ້ນໍາທັງຫລາຍ ທີ່ເປັນຄວາມຫວັງຂອງ
ມຽນມາ” ນັ້ນ ໜັງສືພີມ the New Light of Myanmar ກ່າວໃນວັນອັງຄານມື້ນີ້
ວ່າ ອານາຄົດຂອງປະເທດ ແມ່ນ “ຂື້ນຢູ່ທັງໝົດ” ກັບການຮ່ວມມືຂອງທ່ານນາງ
Aung San Suu Kyi ແລະປະທານາທິບໍດີ Thein Sein.
ຜ່ານມາ ໜັງສືພີມດັ່ງກ່າວ ທີ່ເປັນຂອງລັດຖະບານ ແລະຈັດພິມເຜີຍແຜ່ໂດຍກະຊວງ
ຖະແຫລງຂ່າວ ແມ່ນໄດ້ລາຍງານຂ່າວແຕ່ພຽງເລັກນ້ອຍ ກ່ຽວກັບສະມາຊິກສະພາ
ຝ່າຍຄ້ານທີ່ຫາກໍຖືກເລືອກຕັ້ງໃໝ່ທ່ານນີ້ ນັບຕັ້ງແຕ່ທ່ານນາງໄດ້ຖືກປ່ອຍອອກຈາກ
ການຖືກກັກບໍລິເວນ ໃນປີ 2010 ນັ້ນ.
ທ່ານນາງ ອອງ ຊານ ຊູຈີ ທີ່ໄດ້ຮັບລາງວັນໂນແບລຂະແໜງສັນຕິພາບ ໄດ້ກັບຄືນເຖິງ
ປະເທດໃນວັນອາທິດຜ່ານມາ ຫລັງຈາກການຢ້ຽມຢາມປະເທດໄທ ຊຶ່ງເປັນການເດີນ
ທາງຢ້ຽມຢາມຕ່າງປະເທດຄັ້ງທໍາອິດໃນລະຍະ 24 ປີ. ການເດີນທາງຄັ້ງນີ້ໄດ້ຖືກເບິ່ງ
ເຫັນວ່າ ເປັນຮ່ອງຮອຍສະແດງເຖິງຄວາມໝັ້ນໃຈຂອງທ່ານນາງ ໃນການປະຕິຮູບທາງ
ການເມືອງຢູ່ໃນມຽນມານັ້ນ ຊຶ່ງແຕ່ກ່ອນ ທ່ານນາງໄດ້ປະຕິເສດທີ່ຈະເດີນທາງອອກ
ນອກປະເທດ ເພາະຢ້ານກົວວ່າເຈົ້າໜ້າທີ່ຈະບໍ່ໃຫ້ທ່ານນາງກັັບຄືນເຂົ້າມາປະເທດອີກ.
