ສື່ມວນຊົນແຫ່ງລັດຂອງມຽນມາກ່າວວ່າ ລັດຖະບານໄດ້ຈັດຕັ້ງຄະນະກໍາມາທິການແຫ່ງຊາດວ່າດ້ວຍສິດທິມະນຸດຂອງຕົນຂຶ້ນຄັ້ງທໍາອິດ.
ໃນຄໍາປະກາດສັ້ນໆໃນວັນອັງຄານມື້ນີ້ ໜັງສືພິມ New Light of Myanmar ຂອງທາງການກ່າວວ່າ ຄະນະກໍາມາທິການທີ່ປະກອບດ້ວຍສະມາຊິກ 15 ທ່ານຈະເປັນຜູ້ກໍາກັບດູແລໃນການສົ່ງເສີມແລະຮັກສາໄວ້ແຫ່ງສິດທິພື້ນຖານຂອງພົນລະເມືອງພາຍໃຕ້ກົດໝາຍລັດ ຖະທໍາມະນູນຂອງຊາດໃນປີ 2008 ນັ້ນ.
ຄະນະກໍາມາທິການດັ່ງກ່າວແມ່ນປະກອບດ້ວຍພວກນັກການທູດ ນັກວິຊາການແລະພວກອະດີດເຈົ້າໜ້າທີ່ລັດຖະບານ ຊຶ່ງທັງໝົດແມ່ນອອກກິນເບ້ຍບໍານານແລ້ວ.
ຄໍາປະກາດດັ່ງກ່າວນີ້ມີຂຶ້ນຫລັງຈາກການຢ້ຽມຢາມມຽນມາຂອງທ່ານ Tomas Quintana ທູດພິເສດວ່າດ້ວຍສິດທິມະນຸດຂອງສະຫະປະຊາຊາດໃນເດືອນແລ້ວນີ້ ຊຶ່ງເປັນຄົນທໍາອິດທີ່ໄດ້ຮັບອະນຸຍາດໃຫ້ໄປຢ້ຽມຢາມພວກນັກໂທດທີ່ຄຸກ Insein ທີ່ມີຊື່ສຽງບໍ່ດີ ແລະທໍາການໂອ້ລົມສົນທະນາກັບທ່ານນາງອອງຊານຊູຈີ ນັກເຄື່ອນໄຫວເພື່ອປະຊາທິປະໄຕໃນມຽນມາ.
ເຖິງຢ່າງໃດກໍດີ ລັດຖະບານຍັງສືບຕໍ່ກັກຂັງພວກນັກໂທດການເມືອງຈໍານວນຫລາຍກວ່າ 2 ພັນຄົນຢູ່ຕໍ່ມາ. ມຽນມາປະເຊີນໜ້າກັບການລົງໂທດຢ່າງໜັກຈາກນາໆຊາດ ເນື່ອງຈາກການກົດຂີ່ປາບປາມທາງດ້ານການເມືອງມາເປັນເວລາຫລາຍທົດສະວັດນັ້ນ.
