ກ່ຽວກັບມຽນມາ ອົງການນິລະໂທດກໍາສາກົນຫຼື Amnesty Interna-tional ກ່າວວ່າ ການລະເມີດສິດທິມະນຸດໃນບັນດາຂົງເຂດຊົນເຜົ່າກຸ່ມນ້ອຍໃນມຽນມາໄດ້ເພີ່ມທະວີຂຶ້ນໃນປີແລ້ວນີ້ ເຖິງແມ່ນມີການປະຕິຮູບ ດ້ານການເມືອງແລະເສດຖະກິດຫວ່າງໄວໆຜ່ານມານີ້ ຢູ່ໃນມຽນມາກໍຕາມ.
ຢູ່ໃນລາຍງານປະຈໍາປີ ທີ່ເປີດເຜີຍໃຫ້ຮູ້ໃນວັນພະຫັດມື້ນີ້ ກຸ່ມປົກປ້ອງສິດທິມະນຸດທີ່ມີສຳນັກງານຢູ່ໃນປະເທດອັງກິດດັ່ງກ່າວ ໄດ້ຈົດບັນທຶກ ຫຼາຍໆກໍລະນີ ກ່ຽວກັບການປະຫານຊີວິດແບບຮວບຮັດຕັດຕອນ ການທາລຸນນະກໍາແລະການໃຊ້ແຮງງານແບບບັງຄັບໂດຍພວກທະຫານມຽນ ມາ ໃນເຂດຊົນກຸ່ມນ້ອຍແຫ່ງຕ່າງໆທີ່ເປັນບັນຫາຂັດແຍ່ງກັນນັ້ນ.
ທ່ານ Benjamin Zawacki ນັກຄົ້ນຄວ້າດ້ານເອເຊຍ ທີ່ອົງການ Amnesty Interna
tional ກ່າວຕໍ່ວີໂອເອວ່າ ການລະເມີດສິດເຫຼົ່ານີ້ ແມ່ນເປັນການກະທໍາທີ່ກົງກັນຂ້າມ
ກັບການປະຕິຮູບດ້ານການເມືອງຕ່າງໆທີ່ປະທານາທິບໍດີ Thein Sein ແຫ່ງມຽນມາ
ໄດ້ດໍາເນີນໄປໃນປີຜ່ານມານີ້.
ແຕ່ທ່ານ Zawacki ກ່າວວ່າພວກເຈົ້າໜ້າທີ່ລັດຖະບານແລະທະຫານທີ່ທໍາການລະເມີດສິດທິມະນຸດນັ້ນຍັງບໍ່ທັນຖືກດໍາເນີນຄະດີເທື່ອ ເຖິງ ແມ່ນມີການຈັດຕັ້ງຄະນະກໍາມາທິການປົກປ້ອງສິດທິມະນຸດແຫ່ງຊາດຂຶ້ນໃນປີແລ້ວນີ້ກໍຕາມ.
ຄະນະນໍາພາທະຫານທີ່ກົດຂີ່ຂົ່ມເຫັງຂອງມຽນມາ ໄດ້ອະນຸຍາດໃຫ້ລັດ ຖະບານພົນລະເຮືອນແຕ່ພຽງໃນນາມຂຶ້ນຄອງອໍານາດໃນປີແລ້ວນີ້ແລະ ນັບແຕ່ນັ້ນມາ ຄະນະລັດຖະບານດັ່ງກ່າວກໍໄດ້ປ່ອຍພວກນັກໂທດການເມືອງຈຳນວນນຶ່ງ ຜ່ອນຄາຍການກວດກາສື່ມວນຊົນລົງແລະອະນຸຍາດ ໃຫ້ທ່ານນາງອອງຊານຊູຈີ ຜູ້ນໍາປະຊາທິປະໄຕໃນມຽນມາສະໝັກເຂົ້າ ແຂ່ງຂັນໃນການເລືອກຕັ້ງສະພາແຫ່ງຊາດຮອບພິເສດໄດ້ຢ່າງສໍາເລັດຜົນ.