ໂທລະພາບຂອງທາງການມຽນມາໄດ້ປະກາດໃນວັນອັງຄານວານນີ້ວ່າ ພວກເຈົ້າໜ້າທີ່
ຈະປ່ອຍພວກນັກໂທດ 6,300 ກວ່າຄົນ ອັນເປັນພາກສ່ວນນຶ່ງ ໃນການໃຫ້ອະໄພຍະ
ໂທດຂອງລັດຖະບານ.
ວິທະຍຸແລະໂທລະພາບຊ່ອງ 4 ຂອງທາງການມຽນມາກ່າວວ່າ ພວກເຈົ້າໜ້າທີ່ໄດ້ກະ
ກຽມບັນຊີລາຍຊື່ຂອງພວກນັກໂທດທີ່ຈະຖືກປ່ອຍແລ້ວແຕ່ບໍ່ໄດ້ລະບຸຊື່ນັກໂທດຄົນໃດໆ
ເລີຍ.
ຜູ້ປະກາດຂ່າວເວົ້າວ່າ ພວກນັກໂທດທີ່ໄດ້ຮັບໃຊ້ໂທດຂອງເຂົາເຈົ້າ ເປັນບາງສ່ວນແລ້ວ
ໂດຍໄດ້ມີການປະພຶດດີຈະຖືກປ່ອຍ ພາຍໃຕ້ການໃຫ້ອະໄພຍະໂທດ ເພື່ອເຫັນແກ່ມະນຸດ
ສະທຳໂດຍປະທານາທິບໍດີ Thein Sein ແລະຜູ້ປະກາດຂ່າວເວົ້າຕໍ່ໄປວ່າພວກນັກໂທດ
6,359 ຄົນຈະຖືກປ່ອຍເລີ່ມແຕ່ວັນພຸດມື້ນີ້ເປັນຕົ້ນໄປ ເພື່ອໃຫ້ເປັນການສອດຄ່ອງກັບກົດ
ໝາຍລັດຖະທຳມະນູນຂອງປະເທດ.
ໜັງສືທີ່ຂຽນໃນຈໍໂທລະພາບ ໃນລະຫວ່າງທີ່ມີການປະກາດນັ້ນໄດ້ກ່າວຢໍ້າເຖິງທ່າທີຂອງ
ລັດຖະບານມຽນມາ ທີ່ວ່າບໍ່ມີພວກນັກໂທດການເມືອງ ຖືກຄຸມຂັງຢູ່ໃນມຽນມາມີແຕ່ພວກ
ຄົນຮ້າຍທີ່ມີຄວາມຜິດທາງອາຍາທໍ່ນ້ັນ.
ແຕ່ຢ່າງໃດກໍຕາມ ລາຍງານຂ່າວລ່າສຸດຂອງວີໂອເອແຈ້ງວ່າ ມີພວກນັກໂທດການເມືອງ
ຫຼາຍກວ່າ 50 ຄົນໄດ້ຖືກປ່ອຍ ຮວມທັງພວກນັກເຄື່ອນໄຫວທີ່ມີຊື່ສຽງຈຳນວນນຶ່ງນຳ.
ໜັງສືພິມ New Light of Myanmar ຂອງທາງການ ສະບັບທີ່ອອກໃນວັນອັງຄານ
ວານນີ້ໄດ້ພິມເຜີຍແຜ່ຄຳຮຽກຮ້ອງ ຂອງຄະນະກຳມາທິການສິດທິມະນຸດຂອງມຽນມາທີ່
ຂໍໃຫ້ປະທານາທິບໍດີ Thein Sein ປ່ອຍພວກນັກໂທດຈິດສຳນຶກ. ໃນມື້ວັນຈັນຜ່ານມາ
ນີ້ ຮອງລັດຖະມົນຕີການຕ່າງປະເທດນໍເວ ກ່າວຕໍ່ວິທະຍຸວີໂອເອ ພາກພາສາມຽນມາວ່າ ປະທານສະພາແຫ່ງຊາດຂອງມຽນມາ ທ່ານ Thura Shwe Mann ໄດ້ໃຫ້ການຄໍ້າປະ
ກັນແກ່ທ່ານວ່າ ພວກນັກໂທດການເມືອງຈະເລີ່ມຖືກປ່ອຍພາຍໃນສອງສາມມື້ຂ້າງໜ້ານີ້.
ແຕ່ແນວໃດກໍຕາມ ພວກຕຳໜິຕິຕຽນລັດຖະບານມຽນມາກ່າວວ່າ ເຖິງແມ່ນໄດ້ມີການ
ປ່ອຍພວກນັກໂທດການເມືອງກໍດີ ນັ້ນບໍ່ໄດ້ໝາຍຄວາມວ່າມີການປ່ຽນແປງໃນດ້ານນະ
ໂຍບາຍຂອງພວກເຈົ້າໜ້າທີ່ມຽນມາ.
ທ່ານ Bo Kyi ໂຄສົກຂອງສະມາຄົມພວກນັກໂທດການເມືອງມຽນມາທີ່ມີສຳນັກງານ
ຢູ່ປະເທດໄທກ່າວວ່າ ການປະຕິເສດຂອງພວກເຈົ້າໜ້າທີ່ ຕໍ່ການຮັບຮູ້ວ່າ ມີພວກນັກ
ໂທດການເມືອງຢູ່ໃນມຽນມານັ້ນ ແມ່ນໝາຍຄວາມວ່າພວກນັກໂທດການເມືອງຍັງຈະ
ສືບຕໍ່ມີປະວັດວ່າ ໄດ້ກະທໍາຄວາມຜິດດ້ານອາຍາ.
ທ່ານເວົ້າວ່າ ພວກທະນາຍຄວາມ ທີ່ຖືກຈັບຍ້ອນໄດ້ທຳການຕໍ່ສູ້ຄະດີໃຫ້ແກ່ພວກນັກ
ເຄື່ອນໄຫວເພື່ອປະຊາທິປະໄຕນັ້ນ ຈະບໍ່ສາມາດເຮັດວຽກ ກ່ຽວກັບເລື່ອງກົດໝາຍໄດ້
ອີກ ແລະພວກນັກສຶກສາທີ່ຖືກຕັດສິນໂທດ ຍ້ອນພາກັນປະທ້ວງນັ້ນກໍຈະບໍ່ໄດ້ຮັບອະ
ນຸຍາດໃຫ້ຮຽນຕໍ່ໄດ້.
ທ່ານ Bo Kyi ເວົ້າວ່າ “ສະຫະພາບຢູໂຣບຫຼືສະຫະລັດ ຄວນພິຈາລະນາເບິ່ງ ແລະບາງທີຄວນຈະຕີຄວາມໝາຍຢ່າງລະມັດລະວັງ ໃນສິ່ງທີ່ພວກເຈົ້າໜ້າທີ່
ມຽນມາເວົ້າອອກມາ. ປັດຈຸບັນນີ້ ຂ້າພະເຈົ້າຍັງບໍ່ເຫັນວ່າ ມີການປ່ຽນແປງ
ໃດໆ ໃນດ້ານນະໂຍບາຍເລີຍ. ດັ່ງນັ້ນ ສິ່ງທີ່ພວກເຮົາຕ້ອງການກໍຄື ທຳອິດ
ແມ່ນການປ່ຽນແປງ ໃນດ້ານນະໂຍບາຍ ໂດຍຮັບຮູ້ພວກນັກໂທດເຫຼົ່ານີ້ວ່າ
ເປັນນັກໂທດການເມືອງ ແລະກໍປ່ອຍພວກເຂົາເຈົ້າໃນຖານະທີ່ເປັນພວກນັກ
ໂທດການເມືອງ.”
ທ່ານ Bo Kyi ກ່າວຕໍ່ໄປວ່າ ການໃຫ້ອະໄພຍະໂທດທີ່ວ່ານີ້ແມ່ນເປັນແຜນການຫຼອກ
ລວງເພື່ອຢາກໃຫ້ມີການຍົກເລີກການລົງໂທດທາງດ້ານເສດຖະກິດຕໍ່ມຽນມາແລະເພື່ອ
ໃຫ້ມຽນມາ ໄດ້ຮັບການສະໜັບສະໜຸນເພີ່ມຂຶ້ນ ໃນການເປັນເຈົ້າພາບຈັດກອງປະຊຸມ
ສຸດຍອດຂອງສະມາຄົມບັນດາປະຊາຊາດເອເຊຍຕາເວັນອອກສຽງໃຕ້ຫຼືອາຊ່ຽນ ໃນປີ
2014.
ທ່ານໃຫ້ຂໍ້ສັງເກດວ່າແມ່ນແຕ່ໃນຂະນະທີ່ມີການປະກາດໃຫ້ອະໄພຍະໂທດຢູ່ນັ້ນພວກ
ນັກເຄື່ອນໄຫວການເມືອງ ທີ່ຖືກຈັບກຸມເມື່ອໄວໆມານີ້ກຳລັງຖືກດຳເນີນຄະດີຢູ່ ແລະ
ນັກຂ່າວຄົນນຶ່ງທີ່ຖືກຄຸມຂັງຍ້ອນໄດ້ຖ່າຍຮູບເອົາບ່ອນທີ່ມີການໂຈມຕີດ້ວຍລະເບີດນັ້ນ ກໍໄດ້ຖືກເພີ່ມໂທດຕິດຄຸກໃຫ້ດົນຂຶ້ນ.
ເມື່ອວັນຈັນຜ່ານມານີ້ ລັດຖະມົນຕີຊ່ອຍວ່າການກະຊວງການຕ່າງປະເທດສະຫະລັດ
ທ່ານ Kurt Campbell ໄດ້ກ່າວຕໍ່ກອງປະຊຸມໃຫ້ສໍາພາດຂ່າວຢູ່ບາງກອກວ່າ ໄດ້ມີ
ການປ່ຽນແປງໃຫຍ່ໆຫລາຍຢ່າງຢູ່ໃນມຽນມາ ແຕ່ວໍຊິງຕັນກໍກໍາລັງລໍຖ້າເບິ່ງການປ່ຽນ
ແປງທີ່ມີແກ່ນສານເພີີ່ມຕື່ມ.
ທ່ານ Campbell ເວົ້າວ່າ “ພວກເຮົາກຳລັງກຽມໂຕ ສໍາລັບບັ້ນຕອນໃໝ່ ໃນ
ຄວາມສຳພັນຂອງພວກເຮົາ ແລະພວກເຮົາ ກໍກຳລັງຕິດຕາມເບິ່ງ ຢ່າງລະ
ມັດລະວັງ ກ່ຽວກັບການເຄື່ອນໄຫວຕ່າງໆຢູ່ໃນມຽນມາ ແລະຂ້າພະເຈົ້າຄິດ
ວ່າມັນເປັນສິ່ງທີ່ຍຸຕິທຳທີ່ຈະກ່າວວ່າພວກເຮົາຈະສະໜອງຕອບໃນການເອົາ
ບາດກ້າວທີ່ໃກ້ຄຽງກັນ.”
ທ່ານ Campbell ໄດ້ກ່າວເຖິງ ການປ່ອຍພວກນັກໂທດການເມືອງວ່າ ຮວມຢູ່ໃນບັນ
ດາບາດກ້າວທີ່ສະຫະລັດຕ້ອງການຢາກເຫັນມຽນມາດຳເນີນນັ້ນ.
