ລິ້ງ ສຳຫລັບເຂົ້າຫາ

ເຈົ້າໜ້າທີ່ມຽນມາຮັບຮູ້ ວັນຄົບຮອບການລຸກຮືຂຶ້ນ ເພື່ອປະຊາທິປະໄຕ

  • ທອງປານ ເທບວົງສາ

ນັກເຄື່ອນໄຫວຄົນນຶ່ງ ສະແດງຄວາມເຫັນ ໃນພິທີຈັດຂຶ້ນເປັນຂີດໝາຍ ຄົບຮອບ 24 ປີ ຂອງການລຸກຮືຂຶ້ນ ເພື່ອປະຊາທິປະໄຕ ເມື່ອວັນທີ 8 ສິງຫາ 1988 ທີ່ຢ່າງກຸ້ງ.

​​​ເຈົ້າໜ້າ​ທີ່​ມຽນມາ​ໄດ້​ສະ​ແດງ​ການຮັບ​ຮູ້ ​ແລະສະໜັບສະໜຸນ ​ໃນ​ລະດັບ​ໃດ​ລະດັບນຶ່ງ ເປັນ​ເທື່ອ​ທໍາ​ອິດ​ ວັນ​ຄົບຮອບ​ການ​ລຸກ​ຮື​ເດີນ​ຂະ​ບວນປະ​ທ້ວງ​ເພື່ອ​ປະຊາ​ທິປະ​ໄຕ​ ຄັ້ງ​ປີ 1988 ຂອງ​ມຽນມາ ​ໃນ​ວັນ​ພຸດ​ຜ່ານ​ມາ​ນີ້. ພັກ​ຝ່າຍ​ຄ້ານ ​ກໍ​ຄື​ພັກ​ສັນນິບາດແຫ່ງ​ຊາດ​ເພື່ອ​ປະຊາ ທິປະ​ໄຕ​ມຽນມາ ​ໄດ້​ສະ​ແດງ​ຄວາມ​ຍິນ​ດີ​ກັບການເຄື່ອນ​ໄຫວດັ່ງກ່າວ ອັນ​​ເປັນ​ສັນຍານ​ສະ​ແດງ​ໃຫ້​ເຫັນ​ເຖິງຄວາມ​ປອງ​ດອງຊາດ ໃນ​ຂະນະ​ທີ່​ບັນດານັກ​ເຄຶ່ອນ​ໄຫວ​ກ່າວ​ວ່າ ຍັງ​ມີຫຼາຍ​ສິ່ງ​ຫຼາຍ​ຢ່າງ​ທີ່​ມຽນມາ​ຈະ​ຕ້ອງ​ປະຕິ​ຮູບຢູ່. ຜູ້​ສື່ຂ່າວ​ວີ​ໂອເອ Daniel Schearf ​ລາຍ​ງານ​ມາຈາກ​ບາງກອກ ຊຶ່ງ​ທອງ​ປານ​ຈະ​ນໍາ​ເອົາ​ລາຍ​ລະອຽດ ມາສະ​ເໜີ​ທ່ານ​D

ນັກ​ເຄື່ອນ​ໄຫວ ພ້ອມ​ດ້ວຍພະສົງ ຫຼາຍ​ຮ້ອຍ​ຄົນ ໄດ້​ທໍາ​ພິທີ​ສວດ​ມົນ​ໃນ​ເມື່ອ​ວັນພຸດຜ່ານ
​ມາ​ນີ້ ຢູ່​ນະຄອ​ນຢາງ​ກຸ້ງ ​ເພື່ອ​ເປັນ​ຂີດ​ໝາຍວັນ​ຄົບຮອບ ​ປີ​ທີ 24 ຂອງ​ການ​ລຸກ​ຮື​ຂຶ້ນ​ເພື່ອ​
ປະຊາທິປະ​ໄຕ​ທີ່​ບໍ່​ສໍາ​ເລັດ​ຜົນ​ ​ໃນ​ປີ 1988 ນັ້ນ. ​ແລະເປັນ​ເທື່ອ​ທໍາ​ອິດ​ທີ່​ບັນດາ​ເຈົ້າໜ້າ​ທີ່​
ມຽນມາ ​ໄດ້ສະ​ແດງ​ການ​ຮັບ​ຮູ້ແລະ​ຮອດ​ໃຫ້ການສະໜັບສະໜຸນ​ທາງ​ການ​ເງິນ ແກ່ການ
ຈັດພິທີດັ່ງກ່າວນີ້​.

ລັດຖະມົນຕີ​ກະຊວງ​ການລົດ​ໄຟ​ແລະ​ອຸດສາຫະກໍາ​ຂອງ​ມຽນມາ ​ໄດ້ບໍລິຈາກເງິນ​ຈໍານວນ
ປະມານ 230 ​ໂດ​ລາ ​ໃຫ້​ແກ່​ວັດ​ແຫ່ງ​ນຶ່ງ ທີ່​ເປັນ​ເຈົ້າພາບ​ຈັດ​ພິທີລະນຶກ​ເຖິງ​ວັນດັ່ງກ່າວ.
ນອກ​ນີ້ແລ້ວ ທາງ​ກະຊວງ​ຍັງ​ໄດ້​ມອບ​ເງິນຈໍານວນ 1000 ​ກ່ວາໂດ​ລາ ​ໃຫ້​ແກ່​ກຸ່ມ​ທີ່​ນໍາພາ​
ການ​ເຄື່ອນ​ໄຫວ​ໃນ​ເວລາ​ນັ້ນ ​ທີ່​ເອີ້ນ​ກັນ​ວ່າ ກຸ່ມຄົນ​ລຸ້ນປີ 88 ນັ້ນ.

ທ່ານ Nyan Win ​ໂຄສົກພັກ​ຝ່າຍ​ຄ້ານ ສັນ​ນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕມຽນມາ
ເວົ້າ​ວ່າ ທ່າ​ທີ​ທີ່​ສະ​ແດງ​ມາ​ນີ້​ ຖື​ວ່າ​ເປັນ​ຮ່ອງຮອຍທີ່​ດີ.

​ໂຄສົກ ນວຽນ ວິນ ກ່າວ​ວ່າ: “ພວກ​ເຮົາ​ຂໍ​ສະ​ແດງ​ຄວາມ​ຍິນ​ດີ​ຕໍ່​ການ​ຮ່ວມປະກອບສ່ວນ ​
ແລະ​ການ​ຮັບ​ຮູ້​ການ​ເຄື່ອນ​ໄຫວ​ຄົນ​ລຸ້ນປີ 88 ນີ້ ຊຶ່ງ​ຂ້າພະ ​ເຈົ້າຄິດ​ວ່າ ມັນ​ເປັນ​ຮ່ອງຮອຍ
ປະການ​ນຶ່ງ​ແຫ່ງຄວາມ​ປອງ​ດອງ​ຊາດ”

ການ​ລຸ​ກຮືດັ່ງກ່າວ​ເກີດ​ຂຶ້ນ ​ເມື່ອ​ວັນ​ທີ່ 8 ​ເດືອນ​ສິງຫາ ປີ 1988 ຢູ່​ໃນ​ເມືອງ​ກຸ້ງ ຊຶ່ງ​ຍັງ​ເປັນ
​ເມືອງ​ຫຼວງ​ຂອງ​ມຽນມາ​ໃນ​ເວລາ​ນັ້ນ ​ໂດຍ​ທີ່ບັນດາ​ນັກ​ສຶກສາໄດ້ພາກັນ​ເດີນ​ຂະ​ບວນ
ປະ​ທ້ວງ​ຕໍ່ຕ້ານ​ລັດຖະບານ​ທະຫານ ທວງ​ເອົາການ​ປະຕິ​ຮູບ.

ປະຊາຊົນ​ຫຼາຍ​ຮ້ອຍ​ພັນ​ຄົນໄດ້​ພາກັນອອກ​ມາ​ຮ່ວມປ​ະທ້ວງໃນທົ່ວ​ປະ​ເທດ ຈົນ​ກະ​ທັ່ງ​ຝ່າຍ​
ທະຫານທໍາ​ການ​ປາບ​ປາມ​ຢ່າງ​ນອງ​ເລືອດ ​ເລຶ່ອງຈຶ່ງ​ຍຸຕິ​ລົງ​ແລະງຽບໄປ.

​ເຊື່ອ​ກັນ​ວ່າ ມີ​ປະຊາ​ຊົນຫຼາຍ​ພັນ​ຄົນຖືກ​ຂ້າ​ຕາຍ ​ໃນເຫດການ​ຄັ້ງ​ນັ້ນ ແລະ​ອີກຈໍາ​ນວນ​
ນັບ​ບໍ່​ຖ້ວນ ​ໄດ້ຖືກ​ຈັບ​ເຂົ້າຄຸກ ​ເຖິງ​ແມ່ນ​ຝ່າຍ​ລັດຖະບານ​ຍອມ ຮັບ​ວ່າ​ ມີພຽງ​ບໍ່​ເທົ່າ​ໃດ​
ຮ້ອຍ​ຄົນ​ທີ່​ເສຍ​ຊີວິດ​ ກໍ​ຕາມ.

ທີ່​ບາງກອກ ພວກປະ​ທ້ວງ​ກຸ່ມ​ນຶ່ງ ​ໄດ້​ເຕົ້າ​ໂຮມ​ກັນ​ຢູ່​ບໍ​ລິ​ເວນ​ນອກ​ສະຖານທູດ​ມຽນມາ
ເພື່ອ​ທໍາ​ພິທີ​ໃຫ້​ກຽດ​ແກ່​ພວກ​ທີ່​ເສຍ​ຊີວິດ​ໄປ​ໃນ​ເຫດການ​ຄັ້ງ​ນັ້ນ.

ທ່ານນາງ Debbie Stothard ຜູ້​ປະສານ​ງານປະ​ຈໍາ​ເຄືອ​ຂ່າຍ ASEAN ທາງ​ເລືອກ
ກ່ຽວ​ກັບ​ມຽນມາ ຫຼື Alternative ASEAN Network ກ່າວ​ວ່າ ການ​ໃຫ້ການ​ສະໜັບ
ສະໜຸນແກ່​ວັນ​ຄົບຮອບ​ດັ່ງກ່າວ​ນີ້ ນັບ​ວ່າ​ເປັນບາດກ້າວ​ປ່ຽນ​ແປງ​ຢ່າງ​ໃຫຍ່ ​ໄປ​ຈາກ​
ປະຕິກິລິຍາ​ທີ່​ເຄີຍ​ມີ​ມາ​ຂອງ​ລັດຖະບາ​ນມຽນມາ.​ ແຕ່​ເດ​ບບີ້ ສະ​ໂຕ​ເທີ​ດ ​ໃຫ້​ຂໍ້​ສັງ​ເກດ
ຕື່ມ​ວ່າ ບໍ່​ມີໃຜເຄີຍຖືກນໍາ​ມາ​ຮັບ​ເອົາ​ຄວາມ​ຮັບຜິດຊອບ ​ຕໍ່​ການ​ເສຍ​ຊີວິດ​ໃນ​ເຫດການ
​ຄັ້ງ​ນັ້ນ ​ແຕ່​ຢ່າງໃດ​ເລີຍ.

“ຂ້າພະ​ເຈົ້າຄິດ​ວ່າ ມັນ​ຈະ​ບໍ່​ເປັນ​ການ​ປ່ຽນ​ແປງ​ທີ່​ຍິ່ງໃຫຍ່ດອກ ເວັ້ນ​ເສຍ​ແຕ່​ວ່າ
ປະທານາທິບໍດີເອງ ແລະ​ຝ່າຍ​ທະຫານ​ເອງ​ ຍອມຮັບ​ວ່າ ເຫດການທີ່​ໂຊກ​ຮ້າຍ​
ອັນ​ນັ້ນ ​ໄດ້​ເກີດ​ຂຶ້ນໃນ​ປະວັດ​ສາດ​ຂອງ​ພວກ​ເຂົາ​ເຈົ້າ ​ແລະ ໃຫ້​ຄໍາ​ໝັ້ນ​ສັນຍາ​
ຢ່າ​ງ​ໃດ​ຢ່າງ​ນຶ່ງ ວ່າ​ຈະ​ທໍາ​ການແກ້ໄຂ ໃນ​ສິ່ງ​ທີ່ໄດ້ເກີດ​ຂຶ້ນ​ເມື່ອ​ປີ 1988 ນັ້ນ”

ການ​ເລືອກ​ຕັ້ງ​ເມື່ອ​ຄັ້ງ​ປີ 2010 ໄດ້​ນໍາ​ເອົາ​ປະທານາທິບໍດີ ​ເທ​ນ ​ເຊ​ນ ຂຶ້ນ ມາ​ກໍາ​ອໍາ
ນາດ​ບໍລິຫານ​ປະ​ເທດ ​ແລະ​ທ່ານ​ກໍ​ໄດ້​ສ້າງ​ຄວາມ​ປະຫຼາດ​ໃຈ​ໃຫ້​ແກ່​ພວກ​ວິຈານທັງ
ຫຼາຍ ດ້ວຍການ​ປະຕິ​ຮູບທາງ​ການ​ເມືອງ​ຫຼາຍຢ່າງ​ ​ໂຮມ​ທັງ​ການ​ປ່ອຍ​ຕົວ​ພວກ​ນັກ​
ໂທດ​ການ​ເມືອງ​ຫຼາຍ​ຮ້ອຍ​ຄົນ.

​ໃນ​ການ​ປ່ຽນ​ແປງ​ທີ່​ສໍາຄັນທີ່​ສຸດ​ຢ່າງ​ນຶ່ງໃນ​ຫຼາຍໆ​ຢ່າງ​ນັ້ນ ກໍ​ຄື​ອະດີດ​ນັກ​ໂທດການ
​ເມືອງ ​ແລະ​ຜູ້​ນໍາ​ພັກ​ສັນ​ນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ ຫຼື NLD ກໍ​ຄື​ທ່ານ​ນາງ
​ອອງຊານ ຊູ​ຈີ ​ໄດ້​ຖືກ​ເລືອກ​ຕັ້ງ​ໃຫ້​ເປັນ​ສະມາຊິກ​ສະພາ​ຜູ້​ແທນ.

ໂກລາ​ເຕ ສະມາຊິກຄົນ​ນຶ່ງ​ກຸ່ມ​ຄົນ​ລຸ້ນປີ 88 ຍອມ​ຮັບ​ຮູ້ວ່າ ມີ​ການ​ເຄຶ່ອນ​ໄຫວ​ໄປ​ສູ່​
ປະຊາທິປະ​ໄຕ​ຢູ່​ໃນ​ປະ​ເທດ​ຈິງ ​ແຕ່​ກໍ​ຍັງ​ຄົງ​ມີການທ້າ​ທາຍຫລາຍ​ຢ່າງ​ຫລາຍ​ອັນ​ຢູ່.

ໂກລາ​ເຕ ກ່າວ​ວ່າ ຫຼາຍ​ສິ່ງ​ເລິ່ມປ່ຽນ​ແປງ​ໄປຢູ່​ໃນ​ມຽນມາ ​ແຕ່​ລາວ​ຄິດ​ວ່າ ນີ້​ເປັນ​ພຽງ​
ຂັ້ນ​ເລີ່​ມຕົ້ນ​ເທົ່າ​ນັ້ນ ​ເພາະມີ​ການ​ປຶກສາ​ຫາລື​ກັນ​ເລຶ່ອງ​ຕ່າງໆຢູ່ ​ໃນ​ສະພາ ​ແຕ່​ແນວ
​ໃດ​ກໍ​ດີ ມາ​ຮອດ​ປັດຈຸບັນ​ນີ້ ພວກ​ເຮົາ​ກໍ​ຍັງ​ບໍ່​ເຫັນ​ສະ​ວັດ​ດິການ​ໃດໆເທື່ອ.

ກຸ່ມ​ຄົນ​ລຸ້ນປີ 88 ​ກໍາລັງ​ຮຽກຮ້ອງ​ໃຫ້​ປ່ອຍ​ຕົວ​ພວກ​ນັກ​ໂທດ​ການ​ເມືອງ​ຈຸທີ່​ຍັງເຫຼືອ​ນັ້ນ​
ທັງ​ໝົດ ​ແລະໃຫ້ອະນຸຍາດ​ໃຫ້ບັນດາ​ນັກ​ເຄື່ອນມຽນມາ​ພັດ​ຖິ່ນ ກັບ​ຕ່າວຄືນ​ບ້ານ​ໄດ້.

XS
SM
MD
LG