ຊາວມຽນມາທີ່ລີ້ໄພໃນຕ່າງປະເທດທີ່ສຳຄັນກຸ່ມນຶ່ງ ກ່າວວ່າ ລັດຖະບານມຽນມາທີ່ໄດ້ຮັບ
ການໜຸນຫຼັງຈາກກອງທັບນັ້ນ ປະກົດວ່າ ກໍາລັງດໍາເນີນງານໄປຕາມປົກກະຕິ ໃນເລື້ອງທີ່
ກ່ຽວກັບພວກນັກໂທດການເມືອງ ເຖິງແມ່ນໄດ້ປ່ອຍພວກນັກໂທດຈິດສໍານຶກຫລາຍຮ້ອຍ
ຄົນໄປແລ້ວໃນຕົ້ນປີນີ້ ກໍຕາມ.
ສະມາຄົມຊ່ອຍເຫຼືອພວກນັກໂທດການເມືອງມຽນມາ ທີ່ມີຫ້ອງການຢູ່ໃນໄທ ກ່າວໃນວັນ
ອັງຄານມື້ນີ້ວ່າ ພວກນັກໂທດການເມືອງຈໍານວນຫລາຍຮ້ອຍຄົນຍັງຄົງຖືກກັກຂັງຢູ່ໃນ
ຄຸກ ແລະໄດ້ຮັບການປະຕິບັດຕໍ່ຢ່າງຮ້າຍກາດຢູ່.
ທາງການມຽນມາ ໄດ້ປ່ອຍພວກນັກໂທດການເມືອງຈໍານວນຫລາຍກວ່າ 600 ຄົນໃນ
ເດືອນມັງກອນຜ່ານມາ ອັນເປັນການເຄື່ອນໄຫວທີ່ໄດ້ຮັບການຍ້ອງຍໍຢ່າງແຜ່ຫລາຍໂດຍ
ພວກລັດຖະບານຝ່າຍຕາເວັນຕົກ ແລະພວກອົງການປົກປ້ອງສິດທິມະນຸດຕ່າງໆ.
ແຕ່ລາຍງານປະຈໍາເດືອນຂອງສະມາຄົມຊ່ອຍເຫຼືອພວກນັກໂທດການເມືອງມຽນມາ ຫລື
AAPPB ກ່າວວ່າ ພວກນັກໂທດທີ່ຖືກປ່ອຍໂຕອອກມານັ້ນບາງຄົນໄດ້ຖືກຈັບກຸມຄືນ ແລະ
ຖືກຮາວີລົບກວນ ແລະການເຄື່ອນໄຫວໄປມາຂອງພວກເຂົາເຈົ້າໄດ້ຖືກຈໍາກັດຮັບແຄບຢ່າງ
ຮ້າຍແຮງ.