ອົງການຈັດຕັ້ງທາງການເມືອງ ທີ່ນໍາໂດຍທ່ານນາງອອງຊານ ຊູຈີ ນັກເຄຶ່ອນໄຫວເພື່ອ ປະຊາທິປະໄຕໃນມຽນມາ ກ່າວວ່າ ພວກຕົນໄດ້ຖືກທາງການມຽນມາ ສັ່ງໃຫ້ຍຸຕິກິດຈະກໍາ ທາງການເມືອງທັງໝົດ.
ໂຄສົກຄົນນຶ່ງຂອງສັນນິບາດແຫ່ງຊາດເພື່ອປະຊາທິປະໄຕ ຫລື NLD ກ່າວຕໍ່ພະແນກ ພາສາມຽນມາຂອງວີໂອເອ ໃນວັນພຸດມື້ນີ້ ວ່າກຸ່ມຂອງຕົນກໍາລັງພິຈາລະນາເອົາທ່າທີຕອບຕໍ່ຄໍາສັ່ງດັ່ງກ່າວ ທີ່ມາຈາກລັດຖະບານໃນຈົດໝາຍສະບັບນຶ່ງ.
ກຸ່ມ NLD ໄດ້ຖືກບັງຄັບໃຫ້ສະຫລາຍໂຕໃນຖານະເປັນພັກການເມືອງເມື່ອປີກາຍນີ້ ເວລາກຸ່ມດັ່ງກ່າວບໍ່ຍອມເຂົ້າຮ່ວມໃນການເລືອກຕັ້ງສະພາແຫ່ງຊາດ ເນື່ອງຈາກຜູ້ນໍາ ກໍຄືທ່ານນາງ ອອງ ຊານ ຊູຈີ ທີ່ຖືກກັກບໍລິເວນຢູ່ ໃນເວລານັ້ນ ບໍ່ໄດ້ຮັບອະນຸຍາດໃຫ້ປະກອບ ສ່ວນ.
ໜັງສືພິມ New Light of Myanmar ຂອງທາງການ ລາຍງານຂ່າວທີ່ ອ້າງອິງໃສ່ຈົດໝາຍຈາກກະຊວງພາຍໃນ ທີ່ກ່າວວ່າ ບັນດາສະມາຊິກພັກ NLD “ຕ້ອງຍຸຕິພຶດຕິ ການຕ່າງໆ ທີ່ສາມາດທໍາລາຍສັນຕິພາບ ສະຖຽນ ລະພາບ ແລະການປົກຄອງດ້ວຍຕົວ ບົດກົດໝາຍ ຕະຫລອດທັງຄວາມພ້ອມພຽງສາມັກຄີໃນໝູ່ປະຊາຊົນ” ໃນບົດວິຈານອີກບົດ ນຶ່ງນັ້ນ ໜັງສືພິມສະບັບນີ້ເວົ້າວ່າ ອາດມີຄວາມໂກລາຫົນວຸ້ນວາຍເກີດຂຶ້ນໄດ້ ຖ້າຫາກວ່າ ທ່ານນາງອອງຊານຊູຈີ ຍັງຈະອອກເດີນທາງໄປຢ້ຽມຢາມທົ່ວປະເທດ ມຽນມາ ຕາມທີ່ໄດ້ ວາງແຜນໄວ້ນັ້ນ.
ຈົດໝາຍສະບັບດັ່ງກ່າວ ໄດ້ກ່າວຫາພັກ NLD ວ່າຍັງຄົງຮັກສາຫ້ອງການໄວ້ ແລະຈັດ ກອງປະຊຸມຢູ່ຕໍ່ມາ ເຖິງແມ່ນໄດ້ຖືກບັງຄັບໃຫ້ສະຫລາຍຕົວໄປແລ້ວກໍຕາມ ຈົດໝາຍ ສະບັບນີ້ຍັງໄດ້ແນະນໍາໃຫ້ກຸ່ມ NLD ຍື່ນຄໍາຮ້ອງ ຂໍຈົດທະບຽນເປັນອົງການຈັດຕັ້ງໃໝ່ ຖ້າຍັງຢາກຈະພົວພັນໃນກິດຈະການດ້ານສັງຄົມຢູ່ຕໍ່ໄປ.
