ຜູ້ນຳປະຊາທິປະໄຕຂອງມຽນມາ ທ່ານນາງອອງຊານ ຊູຈີ ໄດ້ເຕືອນ ເຖິງຄວາມເປັນໄປໄດ້
ກ່ຽວກັບການສໍ້ໂກງຄະແນນສຽງ ໃນການປ່ອນບັດເລືອກຕັ້ງສະພາແຫ່ງຊາດໃນເດືອນໜ້າ
ໂດຍເວົ້າວ່າເປັນທີ່ປະກົດວ່າບັນຊີລາຍຊື່ຜູ້ມີສິດປ່ອນບັດຂອງລັດຖະບານໃນການເລືອກຕັ້ງ
ເພີ່ມ ແມ່ນຮວມທັງພວກທີ່ເສຍຊີວິດໄປແລ້ວເປັນຈຳນວນຫຼວງຫຼາຍ.
ທ່ານນາງອອງຊານ ຊູຈີ ຜູ້ທີ່ເຄີຍໄດ້ຮັບລາງວັນໂນແບລຂະແໜງສັນຕິພາບ ຊຶ່ງພັກສັນນິບາດ
ແຫ່ງຊາດເພື່ອປະຊາທິປະໄຕຂອງທ່ານນາງ ຈະເຂົ້າແຂ່ງຂັນເອົາບ່ອນນັ່ງໃນສະພາ ໃນການ
ເລືອກຕັ້ງໃນວັນທີ 1 ເມສາຈະມານີ້ ໄດ້ໃຫ້ຄວາມເຫັນດັ່ງກ່າວ ຢູ່ນອກນະຄອນຢ່າງກຸ້ງ ໃນ
ວັນພະຫັດວານນີ້.
ທ່ານນາງອອງຊານ ໃຫ້ຄວາມເຫັນທີ່ວ່ານີ້ ລຸນຫຼັງການພົບປະກັບລັດຖະມົນຕີການຕ່າງປະ
ເທດການາດາທ່ານ John Baird ຊຶ່ງປະເທດຂອງທ່ານໄດ້ຮ່ວມສົມທົບກັບປະເທດຕາເວັນ
ຕົກອື່ນໆໃນການລົງໂທດທາງດ້ານເສດຖະກິດຕໍ່ມຽນມາແລະອະດີດພວກຜູ້ນຳທາງທະຫານ
ຂອງປະເທດດັ່ງກ່າວ.
ພັກສັນນິບາດແຫ່ງຊາດເພື່ອປະຊາທິປະໄຕຂອງທ່ານນາງອອງຊານຊູຈີ ຍັງໄດ້ຈົ່ມທຸກກ່ຽວ
ກັບການຈຳກັດຮັດແຄບໃນການໂຄສະນາຫາສຽງ ຮວມທັງການຫ້າມຂອງລັດຖະບານເມື່ອ
ໄວໆມານີ້ບໍ່ໃຫ້ພັກຂອງທ່ານນາງໃຊ້ສະໜາມກິລາໃນການໂຮມຊຸມນຸມກັນນັ້ນ.