ໂຄສົກຂອງ ຜູ້ນໍາປະຊາທິປະໄຕໃນມຽນມາ ທ່ານນາງອອງຊານ ຊູຈີ ກ່າວວ່າ ທ່ານນາງຈະ
ລົງສະມັກເລືອກຕັ້ງເອົາບ່ອນນັ່ງໃນສະພາແຫ່ງຊາດ ໃນການເລືອກຕັ້ງຮອບພິເສດຄັ້ງຕໍ່ໄປ
ທີ່ຄາດກັນວ່າຈະມີຂຶ້ນໃນທ້າຍປີນີ້.
ທ່ານນຽນວິນ, ສະມາຊິກຄະນະກໍາມະການບໍລິຫານງານຂອງພັກສັນນິບາດແຫ່ງຊາດເພື່ອ ປະຊາທິປະໄຕໃນມຽນມາ ຫລື NLD ບອກກັບພວກນັກຂ່າວ ໃນວັນຈັນມື້ນີ້ວ່າ ທ່ານນາງ ອອງ ຊານ ຊູຈີ ທີ່ໄດ້ຮັບລາງວັນໂນແບລຂະແໜງສັນຕິພາບນັ້ນ ຈະລົງສະມັກເລືອກຕັ້ງ ເພື່ອຍາດເອົານຶ່ງໃນ 48 ບ່ອນນັ່ງ ຢູ່ໃນສະພາສູງຊຸດໃໝ່ຂອງມຽນມາ ແຕ່ວ່າທ່ານນາງຍັງບໍ່ໄດ້ຕັດສິນໃຈເທື່ອວ່າ ທ່ານນາງຈະສະມັກເປັນຜູ້ແທນເຂດໃດ.
ນັກເຄື່ອນໄຫວເພື່ອປະຊາທິປະໄຕຂອງມຽນມາ ໄດ້ສະແດງຮ່ອງຮອຍໃຫ້ຮູ້ວ່າ ທ່ານນາງຈະລົງແຂ່ງຂັນເອົາບ່ອນນັ່ງໃນສະພານັ້ນ ຢູ່ໃນກອງປະຊຸມຂອງບັນ ດາຜູ້ຕາງໜ້າພັກໃນວັນສຸກແລ້ວນີ້ ເວລາທີ່ພວກເຂົາເຈົ້າຕັດສິນໃຈວ່າຈະຈົດ ທະບຽນພັກຄືນໃໝ່ ເພື່ອໃຫ້ເປັນພັກການເມືອງພັກນຶ່ງ ແລະເຂົ້າຮ່ວມໃນການເລືອກຕັ້ງຕ່າງໆ.
ພັກສັນນິບາດແຫ່ງຊາດເພື່ອປະຊາທິປະໄຕມຽນມາ ຫລື NLD ໄດ້ຂວ້າມບາດ ບໍ່ເຂົ້າຮ່ວມ
ໃນການເລືອກຕັ້ງໃນປີກາຍນີ້ ຍ້ອນວ່າກົດໝາຍຂໍ້ນຶ່ງຫ້າມ ບໍ່ໃຫ້ທ່ານນາງ ອອງຊານ ຊູຈີ
ເຂົ້າຮ່ວມໃນການເລືອກຕັ້ງ. ລັດຖະບານໄດ້ລົບລ້າງກົດໝາຍດັ່ງກ່າວນັ້ນ ເມື່ອໝໍ່ໆມານີ້.
ມັນຈະເປັນຄັ້ງທໍາອິດທີ່ທ່ານນາງ ອອງຊານ ຊູຈີ ຈະໄດ້ເຂົ້າຮ່ວມການແຂ່ງຂັນ ຍາດເອົາ
ບ່ອນນັ່ງໃນສະພາຜູ້ແທນມຽນມາ. ພັກສັນນິບາດແຫ່ງຊາດເພື່ອປະຊາທິປະໄຕແຫ່ງຊາດ
ຂອງທ່ານນາງ ໄດ້ຮັບໄຊຊະນະຢ່າງຂາດລອຍ ໃນການເລືອກຕັ້ງທົ່ວໄປໃນປີ 1990. ແຕ່
ວ່າ ທ່ານນາງຖືກກັກບໍລິເວນໃຫ້ຢູ່ໃນເຮືອນ ໃນເວລາທີ່ມີການເລືອກຕັ້ງນັ້ນ.
ຫລັງຈາກນັ້ນ ລັດຖະບານທະຫານມຽນມາ ບໍ່ໄດ້ເອົາຫົວຊານໍາຜົນການເລືອກຕັ້ງ ແລະສັ່ງກັກບໍລິເວນທ່ານນາງ ຊູຈີ ໃຫ້ຢູ່ແຕ່ໃນບ້ານເປັນເວລາຍາວນານ. ທ່ານນາງ ໄດ້ໃຊ້ເວລາ 15 ປີ ໃນໄລຍະ 22 ປີຜ່ານມາ ຢູ່ພາຍໃຕ້ການຖືກກັກຂັງແບບໃດແບບນຶ່ງ.