ພວກຜູ້ນໍາໃນການລຸກຮືຂຶ້ນຮຽກຮ້ອງເອົາປະຊາທິປະໄຕໃນມຽນມາໃນປີ 1988 ທີ່ປະສົບກັບຄວາມລົ້ມແຫລວ ໄດ້ມອບສັດທາຂອງເຂົາເຈົ້າໄວ້ນໍາທ່ານນາງອອງຊານຊູຈີ ຜູ້ນໍາສັນນິບາດເພື່ອປະຊາທິປະໄຕ ໃນມຽນມານັ້ນ.
ໃນວັນເສົາວານນີ້ ພວກຜູ້ນໍາກຸ່ມ ທີ່ເອິ້ນວ່າ “ກຸ່ມນັກສຶກສາລຸ່ນ 88” ທີ່ຫາກໍຖືກປ່ອຍໂຕຫວ່າງໄວໆມານີ້ ໄດ້ອອກມາສະແດງການສະໜັບສະໜຸນຕໍ່ທ່ານນາງອອງຊານຊູຈີ ແລະພັກສັນນິບາດຊາດເພື່ອປະຊາທິປະໄຕຂອງທ່ານນາງ. ພວກຜູ້ນໍາກຸ່ມນັກສຶກສາດັ່ງກ່າວ ຄື ທ້າວ Min Ko Nang ແລະທ້າວ Ko Ko Gyi ໄດ້ເຫັນດີນໍາການຕັດສິນໃຈຂອງທ່ານນາງອອງຊານ ທີ່ຈະເຂົ້າຮ່ວມໃນການເລືອກຕັ້ງ ແລະວ່າ ທ່ານນາງຈະໄດ້ຮັບການສະໜັບ ສະໜຸນໃນການເລືອກຕັ້ງສະໄໝພິເສດ ເອົາບ່ອນນັ່ງໃນສະພາໃນເດືອນເມສາໜ້ານີ້.
ຊາວມຽນມາແລະພວກນັກວິເຄາະເຫດການບາງຄົນ ຢ້ານວ່າ ລັດຖະບານທີ່ໄດ້ຮັບການໜຸນຫລັງຈາກກອງທັບ ກໍາລັງໃຊ້ທ່ານນາງອອງຊານ ຊູຈີ ແລະພວກນັກໂທດການເມືອງຫລາຍຮ້ອຍຄົນທີ່ຖືກປ່ອຍໂຕຫວ່າງໄວໆຜ່ານມານີ້ ເພື່ອໃຫ້ໄດ້ຮັບການຮັບຮູ້ວ່າ ພວກຕົນມີຄວາມ ຖືກຕ້ອງຕາມກົດໝາຍ ແມ່ນແຕ່ໃນຂະນະທີ່ພວກທະຫານຍັງບໍ່ຍອມປ່ອຍມື ຈາກອໍານາດຢູ່ນັ້ນ. ແຕ່ພວກຜູ້ນໍາກຸ່ມນັກສຶກສາລຸ່ນ 88 ກ່າວວ່າ ພວກເຂົາເຈົ້າຈະດໍາເນີນງານ ຮ່ວມກັບປະທານາທິບໍດີ Thein Sein ແລະພວກເຈົ້າໜ້າທີ່ຄົນອື່ນໆແລະພວກພັກການເມືອງຕ່າງໆ ຖ້າຫາກພວກເຂົາເຈົ້າສືບຕໍ່ດໍາເນີນການປະຕິຮູບໄປສູ່ລະບອບປະຊາທິປະໄຕ ຕໍ່ໄປ.
ລັດຖະບານໃໝ່ຂອງມຽນມາ ທີ່ໄດ້ຮັບການໜຸນຫລັງຈາກທະຫານ ໄດ້ຍື່ມມືຫາຝ່າຍຕາເວັນຕົກມາ ແລະໃນຫວ່າງໄວໆຜ່ານມານີ້ ກໍໄດ້ເປັນເຈົ້າພາບຮັບຕ້ອນທັງລັດຖະມົນຕີຕ່າງປະເທດສະຫະລັດ ທ່ານນາງ ຮີນລາຣີ ຄລິນຕັນ ແລະທ່ານ William Hague ລັດຖະມົນຕີການຕ່າງປະເທດອັງກິດ.