ລັດຖະບານມຽນມາກ່າວວ່າ ຕົນໄດ້ລົງນາມໃນຂໍ້ຕົກລົງສັນຕິພາບຂັ້ນຕົ້ນກັບພວກແບ່ງ
ແຍກດິນແດນເຜົ່າມອນ ຢູ່ໃນພາກຕາເວັນອອກສຽງ ໃຕ້ຂອງປະເທດ ຊຶ່ງເປັນການລົງ
ນາມເທື່ອຫຼ້າສຸດໃນຂໍ້ຕົກລົງຫຼາຍໆສະບັບທີ່ແນໃສ່ເພື່ອຍຸຕິບັນຫາຂັດແຍ້ງກັບພວກຊົນ
ຊາດຊົນເຜົ່າຂອງມຽນມາທີ່ດຳເນີນມາເປັນເວລາຫຼາຍໆທົດສະວັດ.
ໜັງສືພິມ New Light of Myanmar ຂອງລັດຖະບານມຽນມາເອີ້ນ ຂໍ້ຕົກລົງສະບັບ
ນີ້ວ່າເປັນຂໍ້ຕົກລົງສັນຕິພາບທີ່ແນໃສ່ເພື່ອເປີດການເຈລະຈາທາງດ້ານການເມືອງກ່ຽວກັບ
ບັນຫາຕ່າງໆ ຮວມທັງການສຶກສາ ສາທາລະນະສຸກແລະການປ່ອຍນັກໂທດການເມືອງ.
ການເຄື່ອນໄຫວ ກ່ຽວກັບການຢຸດຍິງຊົ່ວຄາວໄດ້ມີການປະກາດໃຫ້ຊາບໃນວັນທີ່ 1 ກຸມ
ພານີ້.
ຂໍ້ຕົກລົງສະບັບນີ້ ເປັນຂໍ້ຕົກລົງສະບັບທີ 7 ລະຫວ່າງລັດຖະບານຊຸດໃໝ່ຂອງມຽນມາ
ຊຶ່ງເປັນລັດຖະບານພົນລະເຮືອນແຕ່ພຽງໃນນາມ ແລະພວກກະບົດຈາກ 11 ຊົນຊາດ
ຊົນເຜົ່າກຸ່ມນ້ອຍນັບແຕ່ລັດຖະບານທະຫານທີ່ປົກຄອງປະເທດມາເປັນເວລາດົນນານໄດ້
ອອກຈາກອຳນາດໃນປີກາຍນີ້.
ການຕົກລົງໄດ້ມີຂື້ນຂະນະທີ່ລັດຖະບານປະເທດຕາເວັນຕົກ ຊຶ່ງນໍາພາ ໂດຍສະຫະລັດ
ແລະສະຫະພັນຢູໂຣບກົດດັນໃຫ້ມຽນມາສີ້ນສຸດການຂັດແຍ້ງກັບຊົນຊາດຊົນເຜົ່າຕ່າງໆ
ທີ່ມີມາເປັນເວລາດົນນານ ເພື່ອເປັນການແລກປ່ຽນ ກັບການຍົກເລີກການລົງໂທດທາງ
ດ້ານເສດຖະກິດ ທີ່ມີຕໍ່ອະດີດລັດຖະບານທະຫານມຽນມານັ້ນ.
ລັດຖະບານກ່າວວ່າ ການຕົກລົງກັບເຜົ່າມອນ ແມ່ນຮວມທັງຂໍ້ກຳນົດຕ່າງໆ ສຳຫຼັບຄະ
ນະຜູ້ຕາງໜ້າທີ່ເປັນທາງການ ທີ່ຈະເຈລະຈາກ່ຽວກັບວັນເວລາແລະສະຖານທີ່ເພື່ອການ
ເຈລະຈາສັນຕິພາບທີ່ສຳຄັນນັ້ນ.
ຂ່າວຍັງແຈ້ງໃຫ້ຊາບເພີ້ມຕື່ມອີກວ່າການເຈລະຈາທາງດ້ານການເມືອງຈະເລີ້ມຂຶ້ນພາຍ
ໃນ 45 ມື້.
