ລິ້ງ ສຳຫລັບເຂົ້າຫາ

ທ່ານນາງອອງຊານຊູຈີ ໄປຮ່ວມພິທີໄວ້ອາໄລ ແກ່ດວງວິນຍານ ຂອງພວກວິລະຊົນມຽນມາ


ພິທີໄວ້ອາໄລເຖິງດວງວິນຍານແກ່ພວກວີລະບຸລຸດມຽນມາ ວັນທີ 19 ກໍລະກົດ 2011

ທ່ານ​ນາງ​ອອງຊານ​ຊູ​ຈີ ນັກ​ເຄື່ອນ​ໄຫວ​ເພື່ອ​ປະຊາທິປະ​ໄຕ​ມຽນມາ​ໄດ້ໄປ​ປາກົດ​ໂຕ​ເປັນ​ເທື່ອ​ທໍາ​ອິດ​ໃນ​ຮອບ 9 ປີຜ່ານມາ​ໃນ​ວັນ​ອັງຄານ​ມື້​ນີ້ໃນ​ພິທີ​ທາງ​ການ​ເພື່ອ​ໃຫ້​ກຽດ​ແກ່​ມື້​ລາງ​ບິດາ​ຂອງ​ທ່ານ​ນາງ​ແລະ​ພວກວີລະ​ບຸລຸດແຫ່ງ​ຊາດ​ອື່ນໆ​ທີ່​ໄດ້​ເຖິງ​ແກ່​ມໍລະນະ​ກໍາ​ໄປ​ແລ້ວ​ນັ້ນ.

ທ່ານ​ນາງ​ຄາດ​ວ່າ​ຈະກັບ​ຄືນ​ສູ່​ອະນຸສາວະລີວີລະຊົນໃນ​ນະຄອນຢ້າງ​ກຸ້ງ​ອີກໃນ​ຕອນ​ບ່າຍໆວັນ​ອັງຄານ​ມື້​ນີ້​ເພື່ອ​ເຂົ້າ​ຮ່ວມ​ໃນ​ການ​ເດີນ​ຂະ​ບວນທີ່​ບໍ່​ໄດ້​ຮັບ​ອະນຸຍາດ​ຈາກ​ລັດຖະບານ ​ກັບ​ພວກ​ສະມາຊິກຫລາຍ​ຮ້ອຍ​ຄົນ​ຂອງ​ພັກ​ສັນນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ​ໃນ​ມຽນມາ ທີ່ຖືກທາງ ການ​ເກືອດ​ຫ້າມ​ຂອງ​ທ່ານ​ນາງ​ນັ້ນ.

ໃນ​ການ​ໄປ​ປາກົດ​ໂຕ​ທີ່ສຸສານ​ດັ່ງກ່າວ​ໃນ​ຕອນ​ເຊົ້າ​ມື້​ນີ້ ທ່ານ​ນາງ​ອອງຊານ​ຊູ​ຈີ ​ໄດ້​ວາງ​ດອກ​ໄມ້​ທີ່​ອະນຸສາວະລີສໍາລັບ​ບິດາ​ຂອງ​ທ່ານ​ນາງ​ ມື້ລາງ​ນາຍພົນອອງຊານ​ ແລະ​ພວກ​ຜູ້​ນໍາ​ຕໍ່ສູ້​ເພື່ອ​ເອກະລາດອື່ນໆທີ່​ໄດ້​ຖືກ​ລອບ​ສັງຫານ​ໃນ​ວັນ​ທີ 19 ກໍລະກົດ​ປີ 1947. ນັບ​ວ່າເປັນ​ການ​ປາກົດ​ໂຕ​ຄັ້ງ​ທໍາ​ອິດ​ຂອງ​ທ່ານ​ນາງ​ໃນ​ການ​ທໍາ​ພິທີ​ໄວ້ອາ​ໄລປະ​ຈໍາປີ​ນັບ​ແຕ່​ທ່ານ​ນາງ​ຖືກ​ກັກ​ໂຕ​ໃຫ້ຢູ່​ໃນ​ບໍລິ​ເວນ​ບ້ານ​ເຮືອນ​ມາ​ໃນ​ປີ 2003 ນັ້ນ.

ໃນ​ສັບປະດາ​ນີ້ ລັດຖະບານ​ໄດ້​ເຊື້ອ​ເຊີນ​ຜູ້​ນໍາ​ການ​ເມືອງ​ທີ່​ກ້າ​ເວົ້າ​ກ້າ​ປາກທ່ານນີ້​ເຂົ້າ​ຮ່ວມ​ໃນ​
ພິທີ​ດັ່ງກ່າວພ້ອມ​ກັບ​ພວກ​ລູກ​ຫລານແລະ​ທາຍາດຂອງ​ພວກວີລະ​ບຸລຸດ​ເພື່ອ​ເອກະລາດອື່ນໆ.
ເຖິງ​ຢ່າງ​ໃດ​ກໍ​ດີບໍ່​ເປັນ​ທີ່ຈະ​ແຈ້ງ​ເທື່ອ​ວ່າ ທາງ​ການຈະ​ເອົາ​ມາດ​ຕະການ​ຕອບ​ໂຕ້​ແບບ​ໃດ​ຕໍ່​
ການ​ເດີນ​ຂະ​ບວນຂອງ​ພວກ​ສະມາຊິກ​ຂອງ​ພັກສັນນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ​ໃນ​
ມຽນມາ​ທີ່​ກໍານົດ​ຈະ​ມີ​ຂຶ້ນ​ໃນ​ຕອນ​ບ່າຍຂອງວັນ​ອັງຄານ​ມື້​ນີ້.

XS
SM
MD
LG