ລິ້ງ ສຳຫລັບເຂົ້າຫາ

ວັນພະຫັດ, 01 ທັນວາ 2022

ມີຂ່າວວ່າ ອະດີດຜູ້ນໍາ ທະຫານມຽນມາ ລາອອກ ກິນເບ້ຍບໍານານແລ້ວ


ອະດີດຜູ້ນຳທະຫານມຽນມານາຍພົນ Than Shwe ໃນງານລ້ຽງອາຫານຄໍ່າເນື່ອງໃນວັນເອກກະລາດຄົບຮອບ 63 ປີຂອງມຽນມາ ທີ່ນະຄອນຫຼວງເນປີດໍ (4 ມັງກອນ 2011)

ອະດີດຜູ້ນຳທະຫານຂອງມຽນມານາຍພົນ Than Shwe ໄດ້ຖືກກ່າວເຖິງວ່າອອກກິນເບ້ຍ
ບຳນານແລ້ວ ໂດຍໜັງສືພິມຕ່າງໆໃນນະຄອນຢ່າງກຸ້ງ.

ລາຍງານຂ່າວກ່ຽວກັບການອອກກິນເບ້ຍບຳນານທີ່ວ່ານີ້ ມີຂຶ້ນໃນມື້ດຽວກັນ ກັບທີ່ສະມາຊິກ ຄົນນຶ່ງຂອງສະພາແຫ່ງຊາດມຽນມາ ປະກາດກ່ຽວກັບການຮັບຮອງເອົາຮ່າງກົດໝາຍທີ່ອະນຸ
ຍາດໃຫ້ປະຊາຊົນໂຮມຊຸມນຸມຢ່າງສັນຕິໄດ້ຖ້າພວກເຂົາເຈົ້າຫາກແຈ້ງໃຫ້ເຈົ້າໜ້າທີ່ຊາບລ່ວງ
ໜ້າ 5 ມື້.

ທ່ານ Aye Maung ສະມາຊິກຂອງພັກພັດທະນາຊົນຊາດ Rakhine ກ່າວວ່າເວລາໃດ
ຮ່າງກົດໝາຍສະບັບນີ້ໄດ້ມີການລົງນາມ ໃຫ້ມີຜົນບັງຄັບໃຊ້ ໂດຍປະທານາທິບໍດີ Thein
Sein ແລ້ວ ພວກປະທ້ວງຈະໄດ້ຮັບອະນຸຍາດໃຫ້ນຳສະແດງທຸງແລະສັນຍາລັກຂອງພັກ.

ທ່ານເອີ້ນຮ່າງກົດໝາຍໂຮມຊຸມນຸມແບບສັນຕິແລະແຫ່ຂະບວນນີ້ມີຄວາມສຳຄັນຍ້ອນວ່າສິດ
ທິຂອງພວກປະທ້ວງ ບໍ່ເຄີຍໄດ້ຮັບອະນຸຍາດໃຫ້ມີມາກ່ອນ ພາຍໃຕ້ການປົກຄອງຂອງພວກ
ທະຫານມຽນມາ.

ຮ່າງກົດໝາຍສະບັບນີ້ເປັນພາກສ່ວນນຶ່ງຂອງການປະຕິຮູບທີ່ໄດ້ມີຂຶ້ນເປັນລຳດັບເມື່ອໄວໆ
ມານີ້ ຮວມທັງກົດໝາຍອະນຸຍາດໃຫ້ພວກຄົນງານທຳການນັດຢຸດງານປະທ້ວງໄດ້.

ເມື່ອນຶ່ງປີກ່ອນ ຜູ້ນຳປະຊາທິປະໄຕໃນມຽນມາ ທ່ານນາງອອງຊານຊູຈີ ໄດ້ຖືກປ່ອຍຈາກ
ການກັກບໍລິເວນ ແລະຫຼັງຈາກນັ້ນມາກໍໄດ້ເປີດການເຈລະຈາກັບລັດຖະບານ.

ເພື່ອເປັນການສະໜອງຕອບ ຕໍ່ການປະຕິຮູບເຫຼົ່ານີ້ ປະທານາທິບໍດີສະຫະລັດ ທ່ານບາຣັກ
ໂອບາມາໄດ້ຕັດສິນໃຈທີ່ຈະສົ່ງລັດຖະມົນຕີການຕ່າງປະເທດ ທ່ານນາງ Hillary Clinton ໄປຍັງມຽນມາໃນເດືອນໜ້ານີ້ຊຶ່ງເປັນການຢ້ຽມຢາມເທື່ອທຳອິດໃນຮອບ 5 ທົດສະວັດ.

XS
SM
MD
LG