ອົບພະຍົບເຜົ່າກະຈິນ ຕ້ອງການຄວາມຊ່ອຍເຫຼືອ ຈາກນາໆຊາດ

ຊາວ​ມຽນມາ​ທີ່​ລີ້ໄພໃນຕ່າງປະເທດ​ກຸ່ມ​ນຶ່ງ​ກ່າວ​ວ່າ ປະຊາຊົນຫລາຍພັນ​ຄົນຕ້ອງການ​
ຄວາມ​ຊ່ອຍ​ເຫລືອ​ຈາກ​ນາໆ​ຊາດ​ຢ່າງ​ຮີບ​ດ່ວນ​ໃນ​ພາກ​ເໜືອ​ຂອງ​ມຽນມາບ່ອນ​ທີ່​ພວກ​
ກະບົດ​ຊົນເຜົ່າ​ກະ​ຈິນຖືກໂຈມ​ຕີ​ໂດຍ​ກໍາລັງ​ຝ່າຍ​ລັດຖະບານ ​ຕັ້ງ​ແຕ່​ຕົ້ນ​ເດືອນແລ້ວ​ນີ້​
ມາ​ນັ້ນ.

ສະມາຄົມ​ແມ່ຍິງ​ເຜົ່າ​ກະ​ຈິນທີ່​ໄທ ກ່າວ​ໃນ​ວັນ​ພຸດ​ມື້​ນີ້​ວ່າ ພວກ​ອົບ​ພະຍົບຈໍານວນ
ຫລາຍ​ກວ່າ 16 ພັນ​ຄົນ​ກໍາລັງ​ພັກ​ພາ​ອາ​ໄສ​ຢູ່ໃນສູນຊົ່ວຄາວ​ແຫ່ງ​ຕ່າງໆ​ໃກ້​ກັບ​ຊາຍ
ແດນ​ຈີນ ​ແລະ​ເວົ້າ​ຕື່ມ​ວ່າ ພວກ​ຊາວບ້ານ​ທີ່​ຖືກ​ສົງ​ໄສ​ວ່າ​ໃຫ້ການ​ສະໜັບສະໜຸນ​ແກ່​
ພວກກະບົດ​ນັ້ນ​ ໄດ້​ຖືກ​ເຂັ່ນຂ້າ​ແລະ​ທາລຸນ​ນະ​ກໍາ​ແລະ​ວ່າ​ພວກ​ຕົນ​ມີ​ເອກະສານ​ກ່ຽວ
ກັບ​ການ​ຂົ່ມຂືນ​ຊໍາ​ເລົາຢ່າງ​ເປັນ​ລະບົບ 32 ກໍລະນີ.

ກຸ່ມ​ແມ່ຍິງ​ດັ່ງກ່າວ​ຍັງ​ເວົ້າ​ຕື່ມ​ວ່າ ພວກ​ອົບ​ພະຍົບຖືກ​ຕັດຂາດ​ຈາກ​ການຊ່ອຍ​ເຫລືອໃນ
ຂະນະ​ດຽວ​ກັນ ​ພວກ​ເຈົ້າ​ໜ້າ​ທີ່​ຈີນ​ກໍ​ບໍ່​ຍອມ​ປະປ່ອຍ​ໃຫ້ພວກ​ອົບ​ພະຍົບ​ເຫລົ່າ​ນີ້​ເຂົ້າໄປ
ລີ້ໄພ​ໃນ​ຈີນ ​ແລະ​ເວົ້າ​ຕື່ມ​ວ່າພວກ​ເຄືອ​ຂ່າຍ​ເຜົ່າການຈັດຕັ້ງເຜົ່າ​ກະ​ຈິນ​ໃນ​ທ້ອງ​ຖິ່ນ​ແລະ
ພວກ​ໂບດ​ຕ່າງໆ ​ກໍ​ບໍ່​ສາມາດ​ແກ້​ໄຂ​ບັນຫາ​ຄວາມ​ຕ້ອງການ​ຂອງ​ພວກ​ອົບ​ພະຍົບ​ເຫລົ່າ
ນີ້​ໄດ້ ​ແລະວ່າພວກ​ເຂົາ​ເຈົ້າ​ຕ້ອງການ​ຄວາມ​ຊ່ອຍ​ເຫລືອຈາກ​ນາໆ​ຊາດ​ຢ່າງຮີບ​ດ່ວນ.

ສະມາຄົມ​ແມ່ຍິງເຜົ່າກະ​ຈິນ​ໃນ​ໄທ​ກ່າວ​ວ່າ ພວກ​ອົບ​ພະຍົບ​ເຫຼົ່ານີ້ຍັງຕ້ອງການ​ຄວາມ
ຊ່ອຍ​ເຫລືອ​ໃນ​ໄລຍະ​ຍາວ​ເພາະວ່າ​ເຂົາ​ເຈົ້າຖືກ​ບັງຄັບ​ໃຫ້ອົບ​ພະຍົບອອກ​ຈາກ​ໄຮ່ນາ​
ຮົ້ວ​ສວນ​ຂອງ​ເຂົາ​ເຈົ້າ.