ກຸ່ມພວກນາຍແພດບໍ່ມີພົນແດນ ຊຶ່ງເປັນກຸ່ມຊ່ວຍເຫລືອດ້ານການປິ່ນປົວ ກ່າວວ່າ ພວກຄົນເຈັບຕິດເຊື້ອເອັຈໄອວີໃນມຽນມາ ທີ່ຕ້ອງ ການການບໍາບັດຕໍ່ຕ້ານເຊື້ອໄວຣັສດັ່ງກ່າວ ໃນຈໍານວນເຖິງສອງສ່ວນສາມ ແມ່ນບໍ່ສາມາດໄດ້ຮັບເລີຍ ຊຶ່ງນັ້ນເປັນເຫດໃຫ້ປະຊາຊົນ 85,000 ຄົນຕົກ ຢູ່ໃນສະພາບທີ່ມີຄວາມອ່ອນແອ ແລະສາມາດຕິດເຊື້ອພະຍາດຕ່າງໆໄດ້ ເຊັ່ນໂຣກປອດແຫ້ງ ທີ່ໄດ້ເປັນສາເຫດຂອງປະມານນຶ່ງສ່ວນສີ່ຂອງການຕາຍທັງໝົດທີ່ກ່ຽວພັນກັບໂຣດເອດສ໌.
ກຸ່ມຊ່ວຍເຫລືອການປິ່ນປົວດັ່ງກ່າວ ຫລືທີ່ຮູ້ກັນໃນຊື່ຫຍໍ້ພາສາຝຣັ່ງວ່າ MSF ກ່າວວ່າ ທຸກໆປີຈະມີຜູ້ເປັນພະຍາດປອດແຫ້ງທີ່ດື້ຕໍ່ຢາ ລາຍໃໝ່ໆ ປະມານ 9,300 ຄົນ ແຕ່ເທົ່າເຖິງປັດຈຸບັນນີ້ ມີພຽງແຕ່ 300 ຄົນເທົ່ານັ້ນທີ່ໄດ້ຮັບການປິ່ນປົວ.
ກຸ່ມ MSF ໄດ້ຄາດໝາຍວ່າຈະໄດ້ຮັບການສະໜັບສະໜຸນດ້ານການເງິນ ພາຍໃຕ້ການຊ່ວຍເຫລືອຮອບໃໝ່ຈາກກອງທຶນໂລກເພື່ອປາບປາມໂຣກເອດສ໌ ໂຣກປອດແຫ້ງແລະໂຣກໄຂ້ຍຸງຫລືມາເລເຣຍ ເພື່ອຊ່ວຍຖົມຊ່ອງວ່າງດັ່ງກ່າວ ແຕ່ວ່າຕົກມາໃນເດືອນພະຈິກຜ່ານມານີ້ ການຊ່ວຍເຫລືອທີ່ວ່ານັ້ນໄດ້ຖືກຍົກເລີກໄປຢ່າງກະທັນຫັນ ເນຶ່ອງຈາກທາງກອງທຶນບໍ່ໄດ້ຮັບເງິນສົດພຽງພໍຈາກພວກປະເທດໃຫ້ບໍລິຈາກ.
ທ່ານ Peter de Groote ຫົວໜ້າໜ່ວຍປະຕິບັດການຂອງກຸ່ມດັ່ງກ່າວ ໃນມຽນມາ ກ່າວວ່າ ຖ້າໄດ້ມາເງິນຊ່ວຍຫລືອນັ້ນກໍຈະເສີມຂະຫຍາຍການປິ່ນປົວ ເພິ່ມຂຶ້ນໄດ້ຢ່າງຫລວງຫລາຍສົມຄວນ.
ທ່ານ de Groote ເວົ້າວ່າ “ສະນັ້ນ ເນຶ່ອງຈາກການຍົກເລີກການຊ່ວຍເຫລືອຮອບ 11 ທີ່ເກີດຂຶ້ນໃນປັດຈຸບັນນີ້ນັ້ນ ກໍໝາຍເຖິງວ່າ ປະຊາຊົນ 46,500 ຄົນທີ່ຕິດເຊື້ອເອັຈໄອວີ ທີ່ອາດສາມາດໄດ້ຮັບການປິ່ນປົວ ຕະຫລອດໄລຍະຫລາຍປີຕໍ່ໜ້ານີ້ ແລະອີກປະມານ 10,000 ຄົນທີ່ເປັນໂຣກປອດແຫ້ງປະເພດທີ່ດື້ຕໍ່ຢາຫລາຍຊະນິດນັ້ນ ກໍເລີຍຈະບໍ່ໄດ້ຮັບການປິ່ນປົວນີ້ເຊັ່ນກັນ ເນຶ່ອງຈາກວ່າບໍ່ມີຮັບເງິນຊ່ວຍເຫລືອເຂົ້າປະເທດ.”
ກຸ່ມ MSF ກ່າວວ່າ ການລະບາດຂອງເຊື້ອເອັຈໄອວີຢູ່ໃນມຽນມານັ້ນ ແມ່ນຂ້ອນຂ້າງຈະຕໍ່າ ແຕ່ຂາດເຂີນການປິ່ນປົວ ຊຶ່ງເຮັດໃຫ້ເປັນນຶ່ງໃນ ການລະບາດທີ່ຮ້າຍແຮງທີ່ສຸດໃນຂົງເຂດເອເຊຍ.
ອົງການສະຫະປະຊາຊາດກ່າວວ່າ ມີປະຊາຊົນລະຫວ່າງ 15,000 ແລະ 20,000 ຄົນທີ່ຕິດເຊື້ອເອັຈໄອວີ ເສຍຊີວິດໄປທຸກໆປີຢູ່ໃນມຽນມາ ເພາະ ວ່າພວກເຂົາເຈົ້າບໍ່ໄດ້ຮັບການປິ່ນປົວ.
ສ່ວນການແຜ່ລະບາດໂຣກປອດແຫ້ງໃນມຽນມານັ້ນ ກໍມີອັດຕາສູງເກືອບ ຮອດສາມເທົ່າຂອງອັດຕາໂດຍສະເຫລ່ຍຂອງໂລກ.
ພວກນາຍແພດບໍ່ມີພົມແດນ ຫລື MSF ນັບວ່າເປັນກຸ່ມສະໜອງການບໍາບັດໃຫ້ກິນຢາຕ້ານເຊື້ອພະຍາດ ກຸ່ມໃຫຍ່ທີ່ສຸດໃນມຽນມາ ບ່ອນທີ່ລັດຖະບານໃຊ້ຈ່າຍເງິນຊ່ວຍເຫລືອດ້ານສຸຂະພາບໜ້ອຍທີ່ສຸດນັ້ນ.
ໃນປີນີ້ ຄາດວ່າມຽນມາຈະເພີ່ມງົບປະມານການຮັກສາສຸຂະພາບຂຶ້ນ ແຕ່ ກໍຍັງຕ້ອງອາໃສກາງຕໍ່ການຊ່ວຍເຫລືອຈາກຕ່າງປະເທດນັ້ນຢູ່.
