ສະຫະພາບຢູໂຣບ ໃນມື້ວັນສຸກວານນີ້ ໄດ້ຜ່ອນຜັນການລົງໂທດຈຳນວນນຶ່ງຕໍ່ມຽນມາເພື່ອ
ເປັນການສະໜອງຕອບຕໍ່ການປະຕິຮູບທາງດ້ານການເມືອງທີ່ລິເລີ່ມໂດຍລັດຖະບານພົນລະ
ເຮືອນພຽງແຕ່ໃນນາມຂອງປະເທດດັ່ງກ່າວທີ່ໄດ້ ເຂົ້າກຳອຳນາດໃນປີກາຍນີ້.
ສະພາລັດຖະມົນຕີຂອງສະຫະພາບຢູໂຣບກ່າວວ່າ ຕົນໄດ້ໂຈະການຈຳກັດໃນການອອກວີຊ່າ
ໃຫ້ແກ່ເຈົ້າໜ້າທີ່ອະວຸໂສມຽນມາ 87 ຄົນຮວມທັງປະທານາທິບໍດີ ຮອງປະທານາທິບໍດີ ບັນ
ດາສະມາຊິກສະພາແຫ່ງຊາດ ພ້ອມໆກັບສະມາຊິກ ໃນຄອບຄົວຂອງພວກເຂົາເຈົ້າ. ການ
ເຄື່ອນໄຫວທີ່ວ່ານີ້ ມີຂຶ້ນລຸນຫຼັງລັດຖະບານມຽນມາໄດ້ປ່ອຍພວກນັກໂທດການເມືອງຈຳນວນ
ຫຼາຍຮ້ອຍຄົນ ໃນເດືອນມັງ ກອນຜ່ານມານີ້.
ທ່ານ Michael Mann ໂຄສົກຂອງສະຫະພາບຢູໂຣບໄດ້ກ່າວເຖິງບັນຍາກາດແຫ່ງຄວາມ
ຫວັງກ່ຽວກັບການຮັບມືຂອງສະຫະພາບຢູໂຣບກັບລັດຖະບານຊຸດໃໝ່ຂອງມຽນມາຫຼັງຈາກ
ຫຼາຍໆທົດສະວັດໃນການປົກຄອງແບບກົດຂີ່ຂອງລັດຖະບານທະຫານ.
ນອກນັ້ນ ລັດຖະບານຊຸດໃໝ່ຂອງມຽນມາ ຍັງໄດ້ແຜ້ວທາງໃຫ້ຜູ້ນຳປະຊາທິປະໄຕຂອງມຽນ
ມາທ່ານນາງອອງຊານຊູຈີລົງສະມັກແຂ່ງຂັນເອົາບ່ອນນັ່ງໃນການເລືອກຕັ້ງພິເສດຊຶ່ງຈະມີຂຶ້ນ
ໃນວັນທີ 1 ເມສາຈະມານີ້. ທ່ານນາງອອງຊານຊູຈີຜູ້ທີ່ເຄີຍໄດ້ຮັບລາງວັນໂນແບລຂະແໜງ
ສັນຕິພາບໄດ້ຖືກກັກບໍລິເວນເປັນສ່ວນໃຫຍ່ ໃນໄລຍະສອງທົດສະວັດຜ່ານມາ ຊຶ່ງທ່ານນາງ
ຫາກໍຖືກປ່ອຍ ໃນທ້າຍປີ 2010 ຂະນະທີ່ພວກທະຫານໂອນອຳນາດໃຫ້ລັດຖະບານພົນລະ
ເຮືອນ.
