ມຽນມ້າກ່າວວ່າ ເຈົ້າໜ້າທີ່ຂອງຕົນຈັບໄດ້ຊ້າງເຜືອກ
ທີ່ຫາຍາກໂຕນຶ່ງ ຢູ່ໃນພາກຕາເວັນຕົກຂອງປະເທດ.
ໜັງສືພິມ ແສງສະຫວ່າງໃໝ່ຂອງມຽນມ້າ ທີ່ເປັນຂອງລັດ
ລາຍງານໃນວັນອັງຄານມື້ນີ້ວ່າ ຊ້າງເຜືອກແມ່ໂຕນີ້
ຖືກຈັບໄດ້ໃນວັນເສົາຜ່ານມາ ທີ່ເມືອງແຄມທະເລ
Maungtaw ໃນແຄວ້ນ Rakhine. ໜັງສືພິມເວົ້າວ່າ
ຊ້າງໂຕນີ້ມີອາຍຸ ປະມານ 38 ປີ ແລະສູງ 2 ແມດກວ່າ.
ໃນອະດີດ ພວກພະລາຊາແລະຜູ້ນຳປະເທດມຽນມ້າ
ທີ່ປະຊາຊົນສ່ວນໃຫຍ່ ນັບຖືສາສະໜາພຸດນັ້ນ
ໄດ້ໃຫ້ຄວາມສຳຄັນສູງແກ່ຊ້າງເຜືອກແຕ່ໃດໆມາ ໂດຍຖືວ່າເປັນຮ່ອງຮອຍທີ່ສະແດງ
ວ່າ ປະເທດຊາດໄດ້ຖືກປົກຄອງດ້ວຍຄວາມຍຸດຕິທຳແລະລາຊະອານາຈັກມີແຕ່ຄວາມ
ສະຫງົບສຸກແລະວັດທະນາຖາວອນ. ນອກນີ້ ຍັງຖືກັນວ່າຊ້າງເຜືອກເປັນລາງບອກ
ເຖິງການປ່ຽນແປງທາງການເມືອງ.
ລັດຖະບານທະຫານໃນມຽນມ້າ ມີແຜນການຈະຈັດການເລືອກຕັ້ງທົ່ວປະເທດຂຶ້ນ
ໃນທ້າຍປີນີ້ ເປັນເທື່ອທຳອິດໃນຮອບສອງທົດສະວັດ.
ລາຍງານຂ່າວບໍ່ໄດ້ບອກວ່າ ຊ້າງເຜືອກໂຕນີ້ຈະຖືກເກັບໄວ້ຢູ່ບ່ອນໃດ.
