ຍີ່ປຸ່ນແລະມາເລເຊຍ ຮຽກຮ້ອງໃຫ້ມຽນມາ ຈັດການເລືອກຕັ້ງເລືອກຕັ້ງທົ່ວໄປ ທີ່ເສຣີ ຍຸຕິທຳ ແລະເປີດກວ້າງ ໃຫ້ທຸກພັກການເມືອງ ໄດ້ເຂົ້າປະກອບສ່ວນ. ລຸນຫລັງການພົບປະກັນ ທີ່ກຸງໂຕກຽວ ໃນມື້ວັນຈັນວານນີ້ ລະຫວ່າງ ນາຍົກລັດຖະມົນຕີ ມາເລເຊຍ ທ່ານນາຈິບ ຣາຊັກ ແລະນາຍົກລັດຖະມົນຕີຍີ່ປຸ່ນ ທ່ານຢູກີໂອະ ຮາໂຕຢາມະ ຜູ້ນຳທັງສອງ ກໍໄດ້ອອກຖະແຫລງການ ສະບັບນຶ່ງ ກ່າວເນັ້ນເຖິງ ຄວາມສຳຄັນ ໃນການສ້າງຄວາມປອງດອງຊາດ ຢູ່ໃນປະເທດມຽນມາ. ລັດຖະບານທະຫານມຽນມາ ກ່າວໃນຕົ້ນເດືອນນີ້ວ່າ ມີພັກການເມືອງໃໝ່ 16 ພັກ ໄດ້ຈົດທະບຽນເຂົ້າຮ່ວມໃນການເລືອກຕັ້ງ ຂອງລັດຖະບານ ທີ່ມີແຜນຈະຈັດຂຶ້ນ ພາຍໃນທ້າຍປີນີ້. ສື່ມວນຊົນ ທີ່ລັດຄວບຄຸມຂອງມຽນມາ ລາຍງານວ່າ ຄະນະກຳມະການເລືອກຕັ້ງ ຂອງມຽນມາ ໄດ້ໃຫ້ການອະນຸມັດ ຕໍ່ພັກການເມືອງໃໝ່ ເຫລົ່ານັ້ນແລ້ວ ກ່ອນກຳນົດການ ຈົດທະບຽນ 60 ມື້ ຈະສິ້ນສຸດລົງ ໃນວັນທີ 6 ພຶສະພາ ຈະມານີ້. ພັກການເມືອງ ທີ່ມີຢູ່ກ່ອນແລ້ວ 3 ພັກ ກໍໄດ້ຈົດທະບຽນຄືກັນ ເພື່ອເຂົ້າຮ່ວມ ໃນການເລືອກຕັ້ງທົ່ວໄປ ເທື່ອທຳອິດ ຢູ່ໃນມຽນມາ ໃນຮອບ 2 ທົດສະວັດ. ລັດຖະບານມຽນມາ ຍັງບໍ່ທັນປະກາດໃຫ້ຊາບ ກ່ຽວກັບວັນເວລາ ໃນການເລືອກຕັ້ງເທື່ອ.
ວັນເສົາ, ໑໔ ທັນວາ ໒໐໒໔
