ນາຍົກລັດຖະມຸນຕີມຽນມ້າຮຽກຮ້ອງ ໃຫ້ປະຊາຊົນພາກັນເລືອກເອົາຜູ້ສະໝັກຮັບເລືອກຕັ້ງທີ່ຮັກຊາດ ແລະໃຫ້ຄັດ ຄ້ານຕໍ່ການເຄື່ອນໄຫວ ແບບທຳລາຍຕ່າງໆ ທີ່ອາດຈະລົບກວນຕໍ່ການເລືອກຕັ້ງໃນເດືອນພະຈິກນັ້ນ.
ໜັງສືພິມ New Light of Myanmar ທີ່ລັດເປັນຜູ້ຄວບຄຸມ ລາຍງານຂ່າວໃນວັນຈັນມື້ນີ້ວ່າ ນາຍົກລັດຖະມຸນຕີ Thein Sein ໄດ້ຮຽກຮ້ອງໄປຍັງປະຊາຊົນ ໃຫ້ເລືອກເອົາພວກຜູ້ສະໝັກແຂ່ງຂັນຢ່າງລະມັດ ລະວັງ ແລະໃຫ້ປ່ອນບັດເອົາຜູ້ທີ່ສະຫລາດສ່ອງໃສແລະຮັກຊາດ ແລະເອົາພວກທີ່ຈະບໍ່ສົ່ງເສີມການແຕກແຍກອອກຈາກກັນຂອງສະຫະພາບ ກໍຄືປະເທດຊາດນັ້ນ.
ມີການຄາດກັນຢ່າງແຜ່ຫລາຍວ່າ ພັກເພື່ອຄວາມເປັນເອກະພາບແລະການພັດທະນາຂອງສະຫະພາບ ທີ່ໄດ້ຮັບການໜຸນຫລັງຈາກທະຫານ ແລະນໍາພາໂດຍທ່ານ Thei Sein ນັ້ນ ຈະຊະນະການເລືອກຕັ້ງໃນ ວັນທີ 7 ພະຈິກປີນີ້ ຍ້ອນພັກດັ່ງກ່າວມີສາຍພົວພັນກັບລັດຖະບານ.
ທາງຝ່າຍຜູ້ນໍາຝ່າຍຄ້ານຂອງມຽນມາ ທ່ານ Thu Wai ປະທານພັກປະຊາທິປັດ ກ່າວໃນວັນອາທິດວານນີ້ວ່າ ກົດລະບຽບເລືອກຕັ້ງໃໝ່ໄດ້ສ້າງອຸບປະສັກທາງດ້ານການເງິນແລະບໍາລຸງ ທີ່ຈະກີດກັນບໍ່ໃຫ້ຫລາຍ ຄົນ ມາສະໝັກແຂ່ງຂັນໄດ້.
ມີ 41 ພັກການເມືອງໄປລົງທະບຽນເພື່ອປະກອບສ່ວນໃນການເລືອກຕັ້ງຄັ້ງນີ້ ແຕ່ທ່ານ Thu Wai ກ່າວວ່າ ບ່ອນນັ່ງປະມານ 500 ບ່ອນໃນຈຳນວນບ່ອນນັ່ງທັງໝົດ 1100 ບ່ອນໃນສະພາແຫ່ງຊາດ ຄາດວ່າ ຈະບໍ່ມີການແຂ່ງຂັນເອົາ ແລະພວກບ່ອນນັ່ງເຫລົ່ານີ້ ແມ່ນຈະຢູ່ໃນກໍາ ມືຂອງພັກທີ່ປົກຄອງປະເທດໃນປັດຈຸບັນ.
