ບັນດາຜູ້ປ່ອນບັດໃນມຽນມາພາກັບອອກໄປລົງຄະແນນສຽງໃນວັນອາທິດມື້ນີ້ ໃນການ
ເລືອກຕັ້ງເອົາສະມາຊິກສະພາແຫ່ງຊາດ ທີ່ເຫັນວ່າເປັນການທົດສອບຄັ້ງສໍາຄັນຂອງຄວາມ
ຄືບໜ້າຂອງການປະຕິຮູບປະເທດໄປສູ່ລະບອບປະຊາທິປະໄຕນັ້ນ.
ບັນດາຜູ້ສະມັກຮັບເລືອກຕັ້ງພາກັນແຂ່ງຂັນຊີງເອົາບ່ອນນັ່ງຈໍານວນ45 ບ່ອນນັ່ງໃນຈໍານວນ
ທັງໝົດ 664 ບ່ອນໃນສະພາແຫ່ງຊາດໃນການເລືອກຕັ້ງຮອບພິເສດຄັ້ງທໍາອິດ ນັບແຕ່
ຄະນະລັດຖະບານພົນລະເຮືອນແຕ່ໃນນາມ ຂຶ້ນຄອງອໍານາດມາໃນເດືອນມີນາໃນປີແລ້ວ
ນີ້ເປັນຕົ້ນມາ.
ຫົວໜ້າຝ່າຍຄ້ານຄົນສໍາຄັນ ທ່ານນາງອອງຊານຊູຈີ ທີ່ເປັນຫົວໜ້າພັກສິນນິບາດແຫ່ງ
ຊາດເພື່ອປະຊາທິປະໄຕໃນມຽນມາ ໄດ້ລົງສະມັກແຂ່ງຂັນຄັ້ງທໍາອິດນັບແຕ່ປີ 1990
ເປັນຕົ້ນມາ ເວລາພັກຂອງທ່ານນາງໄດ້ຊະນະການເລືອກຕັ້ງຢ່າງຖ້ວມລົ້ນ ໃນການ
ເລືອກຕັ້ງທົ່ວໄປ ຊຶ່ງໃນເວລານັ້ນ ພວກຜູ້ນໍາທະຫານບໍ່ຍອມສະລະຫຼືມອບອໍານາດໃຫ້
ທ່ານນາງ ແລະໄດ້ກັກຂັງທ່ານນາງ ໃຫ້ຢູ່ໃນບໍລິເວນບ້ານເຮືອນ ຕະຫລອດເວລາສ່ວນ
ໃຫຍ່ຂອງໄລຍະ20 ປີຕໍ່ມານັ້ນ.
ພັກສັນນິບາດແຫ່ງຊາດເພື່ອ
ປະຊາທິປະໄຕ ຫຼື NLD ກ່າວ
ຫາໃນວັນອາທິດມື້ນີ້ວ່າ ບັດ
ເລືອກຕັ້ງບາງບັດໄດ້ຖືກປົກຄຸມ
ດ້ວຍຂີ້ເຜີ້ງ ຊຶ່ງສາມາດຖູອອກ
ໄດ້ໃນພາຍຫລັງ ເພື່ອປ່ຽນຄະ
ແນນສຽງນັ້ນ. ນອກນັ້ນ ຝ່າຍ
ຄ້ານຍັງຈົ່ມວ່າຕື່ມອີກວ່າ ມີ
ການຂົ່ມຂູ່ຜູ້ປ່ອນບັດເຊ່ນກັນ.
ທ່ານນາງອອງຊານຊູຈີໄດ້ກ່າວ
ວ່າ ທ່ານນາງບໍ່ຄາດວ່າ ການ
ເລືອກຕັ້ງຄັ້ງນີ້ຈະດໍາເນີນໄປ
ຢ່າງຍຸຕິທໍານັ້ນ ແຕ່ທ່ານນາງ
ກໍກ່າວວ່າ ເຖິງຢ່າງໃດການ
ເລືອກຕັ້ງຄັ້ງນີ້ ກໍຍັງມີຄວາມ
ໝາຍທີ່ສໍາຄັນຢູ່.
ການເລືອກຕັ້ງທົ່ວໄປໃນປີ 2010 ທີ່ຊະນະໂດຍພວກຜູ້ສະມັກຮັບ ເລືອກຕັ້ງທີ່ໄດ້ຮັບ
ການໜຸນຫຼັງຈາກພວກທະຫານ ໄດ້ປະສົບກັບການຈົ່ມວ່າຢ່າງແຜ່ຫຼາຍວ່າ ມີການສໍ້ໂກງ
ບັດເລືອກຕັ້ງ ແລະພັກສັນນິບາດແຫ່ງຊາດເພື່ອປະຊາທິປະໄຕບໍ່ໄດ້ເຂົ້າຮ່ວມນໍາ ຊຶ່ງພັກ
ດັ່ງກ່າວໄດ້ພາກັນຄັດຄ້ານບໍ່ເຂົ້າຮ່ວມໃນການເລືອກຕັ້ງ ເພາະວ່າທ່ານນາງອອງ ຊານ
ຊູຈີ ຫົວໜ້າພັກທີ່ໄດ້ຮັບລາງວັນໂນແບລຂະແໜງສັນຕິພາບນັ້ນ ບໍ່ໄດ້ຮັບອະນຸຍາດໃຫ້
ເຂົ້າຮ່ວມນໍາ.
ໝາຍເຫດຈາກບັນນາທິການ: ລາຍງານຂ່າວຫລ້າສຸດ ຫລັງຈາກທີ່ເຮົາອອກອາກາດ
ໄປແລ້ວແຈ້ງວ່າ ທ່ານນາງອອງ ຊານຊູຈີ ໄດ້ຮັບໄຊຊະນະໃນການເລືອກຕັ້ງ. ເບິ່ງຮູບສະໄລດ໌ຂອງປະຊາຊົນທີ່ພາກັນສະແດງຄວາມດີອົກດີໃຈ: