ລາຍງານສະບັບນຶ່ງຂອງກຸ່ມນັກເຄື່ອນໄຫວເພື່ອຜົນປະໂຫຍດຂອງພວກຊົນກຸ່ມນ້ອຍເຜົ່າສານ ສອງກຸ່ມກ່າວວ່າ ເຂື່ອນໄຟຟ້ານໍ້າຕົກຂອງຈີນແຫ່ງນຶ່ງ ໄດ້ສົ່ງຜົນກະທົບຢ່າງໜັກຕໍ່ຊີວິດການ ເປັນຢູ່ຂອງປະຊາຊົນມຽນມາ ທີ່ອາໃສຢູ່ຕາມລໍາແມ່ນໍ້າ ໃຕ້ເຂື່ອນລົງໄປນັ້ນ.
ອົງການຮັກສາສະພາບແວດລ້ອມຂອງຊົນເຜົ່າສານ ແລະ ອົງການເຄືອຂ່າຍກິດແມ່ຍິງເຜົ່າ
ສານ ໄດ້ເຜີຍແຜ່ລາຍງານຂອງພວກຕົນ ກ່ຽວກັບຜົນກະທົບຂອງເຂື່ອນໄຟຟ້ານໍ້າຕົກດັ່ງ
ກ່າວ ທີ່ສ້າງຢູ່ແມ່ນໍ້າລອງຈຽນນັ້ນ ໃນວັນອັງຄານວານນີ້.
ລາຍງານສະບັບດັ່ງກ່າວເວົ້າວ່າ ນັບຕັ້ງແຕ່ເຂື່ອນແຫ່ງດັ່ງກາວໄດ້ເລີ້ມເປີດໃຊ້ ໃນເດືອນ
ກໍລະກົດເປັນຕົ້ນມາ ນໍ້າແມ່ນໄດ້ລົດລົງຢ່າງຫລວງຫລາຍແລະນໍ້າໄຫລມາບໍ່ສະໝໍ່າສະເໝີ ຊຶ່ງໄດ້ເຮັດໃຫ້ການນຳໃຊ້ແມ່ນໍ້າ ເຂົ້າໃນການຄ້າແລະການຂົນສົ່ງຂອງພວກຊາວບ້ານນັ້ນ
ຝືດເຄືອງຂຶ້ນ.
ພວກນັກເຄື່ອນໄຫວເວົ້າອີກວ່າ ການປ່ຽນແປງໃນການໄຫລຂອງແມ່ນໍ້ານັ້ນ ໄດ້ມີຜົນກະ
ທົບຕໍ່ຊີວິດການເປັນຢູ່ຂອງພວກຊາວບ້ານ 16 ພັນຄົນ ຊຶ່ງບາງຄົນໃນນັ້ນ ກໍໄດ້ພົບວ່າ
ລາຍຮັບຂອງພວກເຂົາເຈົ້າໄດ້ຖືກຕັດລົງ ຕັ້ງເຄິ່ງນຶ່ງ.
ພວກນັກເຄື່ອນໄຫວຊາວສານດັ່ງກ່າວ ໄດ້ຮຽກຮ້ອງໃຫ້ຈີນເຮັດໃຫ້ມີນໍ້າໄຫລຕາມທຳມະ
ຊາດຈາກເຂື່ອນດັ່ງກ່າວ ແລະ ໃຫ້ພິຈາລະນາເບິ່ງຄວາມຕ້ອງການຂອງປະເທດເພື່ອນບ້ານ
ກ່ອນ ກ່ອນຈະສ້າງເຂື່ອນຂຶ້ນອີກໃນອານາຄົດ.
ລາຍງານເວົ້າອີກວ່າ ຈີນມີແຜນຈະສ້າງເຂື່ອນ 13 ແຫ່ງ ຢູ່ໃນແມ່ນໍ້ານູ ທີ່ໄຫລຂ້າມໄປຫາ
ມຽນມານັ້ນເຊັ່ນກັນ.
