ນາຍ ຣອສ ດັງຄລີ ຊຶ່ງເປັນຊາວອອສເຕຣເລຍທີ່ກໍ່ຕັ້ງໜັງ
ສືພິມ Myanmar Times ຂື້ນໃນປີ 2000 ໄດ້ຖືກຈັບ
ຢູ່ນະຄອນຢ່າງກຸ້ງ ເມືອງຫລວງເກົ່າຂອງມຽນມາ ບໍ່ດົນ
ຫລັງຈາກຜູ້ກ່ຽວກັບຄືນມາຈາກຕ່າງປະ ເທດເມື່ອອາທິດ
ຜ່ານມານີ້ ຊຶ່ງມີລາຍງານວ່າໄດ້ເກີດການຂັດແຍ້ງກ່ຽວກັບ ການຄວບຄຸມໜັງສືພິມດັ່ງກ່າວ.
ປັດຈຸບັນນີ້ ນາຍດັງຄລີ ເປັນຜູ້ຖືຮຸ້ນ 49 ເປີເຊັນຂອງບໍລິສັດ Myanmar Consolidated Media ຊຶ່ງເປັນບໍລິສັດກໍາກັບດູແລໜັງສືພິມ ສ່ວນຮຸ້ນທີ່ເຫລືອນັ້ນ ຖືໂດຍ ທ່ານ Tin Htun Oo.
ຖະແຫລງການສະບັບນຶ່ງທີ່ອອກເຜີຍແຜ່ໃນມື້ວັນຈັນຜ່ານມານີ້ໂດຍ ບໍລິສັດ Post Media ທີ່ມີສຳນັກງານຢູ່ປະເທດໄທ ແລະເປັນບໍລິສັດທີ່ຢູ່ໃນເຄືອຂອງ Myanmar Consolidated ໄດ້ຮຽກຮ້ອງໃຫ້ປ່ອຍຕົວທ່ານດັງຄລີໂດຍທັນທີ ຫລັງຈາກພວກເຈົ້າໜ້າທີ່ບໍ່ສາມາດຕັ້ງຂໍ້ຫາໄດ້. ມີລາຍງານວ່າທ່ານດັງຄລີຖືກຈັບໃນຂໍ້ຫາຝ່າຝືນກົດລະບຽບດ້ານວິຊາແລະມີຢາເສບຕິດຢູ່ໃນຄອບຄອງ.
ທ່ານ ອອງ ຊໍ ບັນນາທິການວາລະສານ Irrawady ຊຶ່ງເປັນວາລະສານທີ່ ກ່ຽວກັບມຽນມາທີ່ພິມເຜີຍແຜ່ຢູ່ໃນປະເທດໄທນັ້ນກ່າວວ່າ ການຈັບກຸມນາຍ ດັງຄລີຄັ້ງນີ້ ສໍ່ສະແດງໃຫ້ເຫັນວ່າອາດພົວພັນກັບການຄວບຄຸມໜັງສືພິມຫລາຍກວ່າຂໍ້ຫາອາຊະຍາກໍາ. ຊຶ່ງທ່ານ ອອງ ຊໍ ກ່າວຊີ້ແຈງຕໍ່ໄປວ່າ:
"ສິ່ງທີ່ຈະແຈ້ງກໍຄືວ່າໄດ້ເກີດການຂັດແຍ້ງກັນຂຶ້ນລະຫວ່າງ ດຣ Tin Htun Oo ແລະທ່ານ Ross Dunkley ແລະເວລານີ້ ກໍປາກົດວ່າ ພວກເຈົ້າໜ້າທີ່ມຽນມາ ຢາກເຂົ້າຄວບຄຸມໜັງສືພິມ Myanmar Times ທັງໝົດ… ນັ້ນກໍຄືເລື່ອງລາວທີ່ ໄດ້ເກີດຂຶ້ນ. ດ້ວຍເຫດນີ້ ຂ້ອຍຈຶ່ງຄິດວ່າພວກເຈົ້າໜ້າທີ່ມຽນມາ ຄົງຈະຫາເລື່ອງ ໃສ່ລາວ ຊຶ່ງບໍ່ແມ່ນເລື້ອງທີ່ເຮັດຜູ້ຄົນປະຫຼາດໃຈແຕ່ຢ່າງໃດ."
ຮຸ້ນສ່ວນຄົນທໍາອິດຂອງທ່ານດັງຄລີ ຂອງໜັງສືພິມທີ່ນິຍົມຝ່າຍທະຫານນັ້ນ ກໍຄື ນາຍ Sonny Swe ລູກຊາຍຂອງອະດີດນາຍພົນຈັດຕະວາ Thien Swe.
ແຕ່ເນຶ່ອງຈາກວ່ານາຍພົນ Thien Swe ຕົກອັນດັບຈາກການເປັນຜູ້ນິຍົມຊົມຊອບຂອງ
ນໍາສູງສຸດ ນາຍ Sonny Swe ຈຶ່ງຖືກພົບເຫັນວ່າ ກະທໍາຜິດໃນຂໍ້ຫາສໍ້ລາດບັງຫລວງ
ແລະຖືກຕັດສິນໂທດຈໍາຄຸກໃນປີ 2005 ຫລັງຈາກນັ້ນ ຮຸ້ນທັງໝົດຂອງນາຍ Sonny
Swe ກໍໄດ້ໂອນໄປໃຫ້ ທ່ານ Tin Htun Oo.
ປະເທດພະມ້າ ຫລືທີ່ຮູ້ກັນວ່າ ມຽນມານັ້ນ ແມ່ນໄດ້ຖືກປົກຄອງໂດຍພວກທະຫານມາເປັນ
ເວລາດົນນານ ຊຶ່ງໄດ້ຄວບຄຸມວົງການສື່ມວນຊົນຢ່າງເຄັ່ງຄັດ ແລະເກືອບໃນທຸກໆດ້ານ
ຂອງການເສດຖະກິດ ແລະການເມືອງ.
ລັດຖະສະພາຊຸດທໍາອິດຂອງປະເທດໃນຮອບ 22 ປີໄດ້ຖືກເລືອກຕັ້ງຂື້ນມາໃນເດືອນພະຈິກ
ປີກາຍ ແຕ່ 80 ກວ່າເປີເຊັນຂອງບ່ອນນັ່ງທັງໝົດໃນສະພານັ້ນ ແມ່ນມາຈາກຝ່າຍທະຫານ
ຫລືພາກສ່ວນທີ່ພົວພັນພວກທະຫານ ແລະລັດຖະສະພາໄດ້ເລືອກເອົາອະດີດນາຍົກລັດຖະ
ມົນຕີ Thien Sein ໃຫ້ເປັນປະທານາທິບໍດີມຽນມາຄົນໃໝ່.
ທ່ານອອງ ຊໍ ກ່າວວ່າ ໃນຂັ້ນຕົ້ນທ່ານ ດັງຄລີ ເປັນຜູ້ທີ່ໃຫ້ຄວາມຫວັງທີ່ວ່າການຄວບຄຸມ
ດ້ານສື່ມວນຊົນທີ່ເຄັ່ງຄັດຂອງມຽນມານັ້ນ ຈະຜ່ອນເບົາລົງໄປ ແຕ່ທ່ານອອງ ຊໍ ກ່າວວ່າ
ການຄວບຄຸມເຫລົ່ານັ້ນ ແລະການເມືອງຂອງປະເທດແມ່ນໝາຍເຖິງການເຮັດໜັງສືພິມມັກ
ຈະເປັນການລົງທຶນທີ່ສ່ຽງອັນນຶ່ງສະເໝີ ຊຶ່ງທ່ານ ອອງ ຊໍ ກ່າວຕໍ່ໄປວ່າ:
"ທ່ານ Ross ຄວນຮູ້ຈັກວ່າ ມຽນມາຄືປ່າຊ້າການເມືອງສຳລັບທຸກໆຄົນ. ແມ່ນ
ແຕ່ລາວເອງ ກໍຄວນຮູ້ວ່າ ມີພວກນັກໜັງສືພິມແລະນັກຂ່າວຫຼາຍປານໃດ ທີ່ໄດ້ ຖືກຈັບແລະຖືກຂັງຄຸກ."
ສະມາຄົມໃຫ້ການຊ່ວຍເຫລືອນັກໂທດການເມືອງມຽນມາ ກ່າວວ່າ ພວກນັກຂ່າວແລະ
ພວກນັກເຄຶ່ອນໄຫວດ້ານສື່ມວນຊົນ ປະມານ 30 ຄົນ ແມ່ນ ຮວມຢູ່ໃນຈຳນວນພວກ
ນັກໂທດການເມືອງ ຫຼາຍກວ່າ 2,000 ຄົນຂອງ ມຽນມາ.
ນອກນີ້ແລ້ວ ທ່ານດັງຄລີ ຍັງເປັນຜູ້ພິມ ໜັງສືພິມ Phnom Penh Post ໃນປະເທດ
ກຳປູເຈຍ. ພວກນັກຂ່າວບາງຄົນທີ່ຮູ້ເລື່ອງດີກ່ຽວກັບການປະຕິບັດການນັ້ນກ່າວວ່າ ມີ
ຄວາມຢ້ານກົວວ່າ ການສູນເສຍໜັງສືພິມໃນມຽນມານັ້ນ ອາດສ້າງຄວາມເສຍຫາຍດ້ານ
ການເງິນໃຫ້ແກ່ Phnom Penh Post. ແຕ່ໜັງສືພິມ Phnom Penh Post ກ່າວໃນ
ມື້ວັນຈັນຜ່ານມານີ້ວ່າ ຄະນະບໍລິຫານຂອງຕົນແມ່ນມີຄວາມເປັນຫ່ວງດ້ານສະວັດດີພາບ
ຂອງນາຍດັງ ລີ. ສ່ວນໜັງສືພິມໄດ້ດຳເນີນງານຢ່າງເປັນປົກກະຕິ.
ມີການມອງກັນວ່າ ທ່ານ ດັງຄລີ ເປັນນັກສື່ມວນຊົນອິດສະຫຼະແລະ ຜູ້ກ້າສ່ຽງ ຫລັງຈາກ
ໄດ້ລົງທຶນໃນວົງການອຸດສາຫະກໍາການຂ່າວ ທີ່ບໍ່ມີປະສົບການຫຼືເລີ້ມຕົ້ນໃໝ່ຂອງຫວຽດ ນາມ ໃນຕົ້ນຊຸມປີ 1990.
ອົງການນັກຂ່າວບໍ່ມີພົນແດນ ຫລື Reporters Without Borders ໃນປີ 2010 ໄດ້ຈັດ
ມຽນມາ ໃຫ້ຢູ່ໃນອັນດັບ 174 ຂອງຈໍານວນທັງໝົດ 178 ປະເທດ ໃນດັດຊະນີເສລີພາບ
ດ້ານການຂ່າວປະຈໍາປີຂອງຕົນ. ພວກນັກວິເຄາະສື່ມວນຊົນໃນຂົງເຂດເອເຊຍຕາເວັນອອກ
ສຽງໃຕ້ຈຳນວນນຶ່ງກ່າວວ່າ ການທີ່ທ່ານດັງລີຖືກຈັບກຸມນັ້ນ ຊີ້ໃຫ້ເປັນເຖິງການຄວບຄຸມວົງ
ການສື່ມວນຊົນທີ່ເຄັ່ງຄັດເພີ່ມຂື້ນ ໂດຍລັດຖະບານທະຫານມຽນມາ.
