ບັນດາສະມາຊິກລັດຖະສະພາສະຫະລັດໄດ້ສະແດງຄວາມຍິນດີຕໍ່ຂ່າວທີ່ວ່າ ມຽນມາໄດ້ອອກໜັງສືເດີນທາງຫລືພາສປອດໃຫ້ແກ່ທ່ານນາງ ອອງ ຊານ ຊູ ຈີ ຜູ້ນໍາພັກຝ່າຍຄ້ານຂອງມຽນມາ ຊຶ່ງເປັນການອະນຸຍາດໃຫ້ທ່ານນາງເດີນທາງໄປຕ່າງປະເທດໄດ້ ເປັນເທື່ອທໍາອິດໃນໄລຍະ 24 ປີ.
ທ່ານ ຈອນ ແຄຣີ ສະມາຊິກສະພາສູງສະຫະລັດສັງກັດພັກແດໂມແຄຣທ ຈາກລັດແມສຊາຈູເເຊັສ ຊຶ່ງໄດ້ພົບກັບທ່ານນາງ ອອງຊານ ຊູ ຈີ ເມື່ອ ສິບກວ່າປີຜ່ານມາແລ້ວນັ້ນ ສະແດງຄວາມຫວັງເມື່ອວັນອັງຄານວານນີ້ວ່າ ຜູ້ນໍາປະຊາທິປະໄຕຂອງມຽນມາ ຈະສາມາດມາຢ້ຽມຢາມສະຫະລັດໄດ້.
ທ່ານ ຈອນ ແມກເຄນ ສະມາຊິກສະພາສູງສັງກັດພັກຣີພັບບລິກັນຈາກ ລັດອາຣີໂຊນາ ກ່າວວ່າ ທ່ານເອງກໍຕັ້ງໜ້າລໍຄອຍທີ່ຈະໄດ້ພົບປະກັບທ່ານນາງ ທີ່ວໍຊິງຕັນ.
ທ່ານຈອນແມກເຄນກ່າວວ່າ “ສະພາຄອງແກຣສໄດ້ມອບຫລຽນຄໍາແກ່ທ່ານນາງແລ້ວ ແລະພວກເຮົາລໍຄອຍທີ່ຈະໄດ້ມອບຫລຽນນັ້ນໃຫ້ທ່ານນາງ. ພວກເຮົາພູມໃຈນໍາທ່ານນາງຫລາຍ ແລະພວກເຮົາກໍຫວັງວ່າ ຄວາມກ້າວໜ້ານີ້ຈະມີສືບຕໍ່ໄປໃນມຽນມາ.”
ບັນດາສະມາຊິກສະພາຄອງແກຣສ ໄດ້ຮຽກຮ້ອງໃຫ້ມີສິ້ງຊອມຕິດຕາມ ເບິ່ງ ເພື່ອໃຫ້ແນ່ໃຈວ່າ ພວກຜູ້ນໍາມຽນມາເຂົ້າໃຈດີວ່າ ຄວາມກ້າວໜ້າໃນດ້ານປະຊາທິປະໄຕນັ້ນຖືວ່າເປັນເງຶ່ອນໄຂສໍາຄັນປະການນຶ່ງ ຕໍ່ການຜ່ອນ ຜັນການລົງໂທດຕ່າງໆຂອງສະຫະລັດ ຕໍ່ມຽນມາ.
ເຈົ້າໜ້າທີ່ຄົນນຶ່ງປະຈໍາພັກສັນນິບາດແຫ່ງຊາດເພື່ອປະຊາທິປະໄຕຂອງທ່ານນາງອອງຊານ ຊູຈີ ກ່າວວ່າ ທ່ານນາງໄດ້ຮັບໜັງສືເດີນທາງ ທີ່ມີ ອາຍຸສາມປີນັ້ນ ໃນວັນອັງຄານວານນີ້ທີ່ນະຄອນຢ່າງກຸ້ງ. ເອກະສານສໍາ ຄັນດັ່ງກ່າວນີ້ແມ່ນເປີດໂອກາດສໍາລັບການເດີນທາງທີ່ໄດ້ກໍານົດໄວ້ຂອງ ທ່ານນາງຜູ້ໄດ້ຮັບລາງວັນໂນເບລ ທີ່ຈະໄປຢ້ຽມຢາມພາກພື້ນຢູໂຣບໃນ ເດືອນໜ້ານີ້.