ມຽນມາຈັດພິທີສະຫລອງວັນຜູ້ສະຫລະຊີບເພື່ອຊາດຢ່າງງຽບໆ ໃນວັນຈັນມື້ນີ້ ເພື່ອລະນຶກເຖິງວັນຄົບ ຮອບການລອບສັງຫານນາຍພົນ ອອງຊານ ວີລະບຸລຸດເອກກະລາດ ຊຶ່ງເປັນບິດາຂອງທ່ານນາງ ອອງ ຊານ ຊູຈີ ຜູ້ນຳປະຊາທິປະໄຕທີ່ຖືກກັກບໍລິເວນຢູ່ໃນເວລານີ້.
ນາຍພົນອອງຊານ ພ້ອມດ້ວຍພວກອາລັກຂາ 8 ຄົນແລະສະມາຊິກ ສະພາອີກ 7 ຄົນ ຖືກລອບສັງຫານ ເມື່ອ 63 ປີຜ່ານມາ ຄືໃນວັນທີ່ 19 ເດືອນກໍລະກົດ ປີ 1947 ກ່ອນໜ້າມຽນມາຈະໄດ້ຮັບເອກກະລາດຈາກອັງກິດໃນວັນທີ່ 4 ເດືອນມັງກອນ ປີ 1948 ນັ້ນ.
ພິທີສະຫລອງໃນວັນຈັນມື້ນີ້ແມ່ນຈັດຂື້ນທີ່ອະນຸສາວະລີສຸສານຂອງຜູ້ສະຫລະຊີບເພື່ອຊາດ ໂດຍມີເຈົ້າຄອງ ກຳແພງນະຄອນຢ່າງກຸ້ງ ທ່ານ ອອງທຽນ ລິນ ມາຮ່ວມນຳ.
ທົງຊາດໄດ້ລົດລົງເຄິ່ງເສົາຢູ່ທີ່ອະນຸສາວະລີດັ່ງກ່າວ ໃນຂະນະພວກເຈົ້າໜ້າທີ່ວາງພວງມາລາໄວ້ທີ່ຫລຸມຝັງສົບ ແລະພວກຄອບຄົວຂອງຜູ້ນຳທີ່ເສຍຊີວິດ ແລະພວກທູຕານຸທູດໄດ້ເຂົ້າຮ່ວມໃນພິທີສະຫລອງນີ້ ດ້ວຍ ທ່າມກາງການຮັກສາຄວາມປອດໄພຢ່າງແໜ້ນໜາ.
ທ່ານນາງອອງຊານຊູຈີ ໄດ້ປະຕິເສດບໍ່ຂໍເຂົ້າຮ່ວມໃນພິທີປະຈຳປີດັ່ງກ່າວນີ້ ຕາບໃດທີ່ທ່ານນາງຍັງ ຖືກກັກບໍລິເວນຢູ່ນັ້ນ.