ປະຊາຊົນຫລາຍພັນຄົນພາກັນຢືນລຽນແຖວ ຕາມຖະໜົນຫົນທາງສາຍຕ່າງໆໃນມຽນມາ
ມືໂບກທຸງແລະຖືປ້າຍຄໍາຂວັນຕ່າງໆສະໜັບສະໜຸນ ທ່ານນາງອອງຊານຊູຈີ ຜູ້ນໍາຝ່າຍຄ້ານ
ຂະນະທີ່ທ່ານນາງເລີ້ມອອກເດີນທາງໂຄສະນາຫາສຽງເລືອກຕັ້ງເອົາບ່ອນນັ່ງ ໃນສະພານັ້ນ.
ທ່ານນາງອອງຊານ ໄວ 66 ປີ ທີ່ໄດ້ຮັບລາງວັນໂນແບລຂະແໜງສັນຕິພາບ ໄດ້ເດີນທາງ
ອອກໂຄສະນາຫາສຽງຈາກນະຄອນຢ້າງກຸ້ງທາງພາກໃຕ້ຂອງປະເທດໄປຍັງເມືອງ
Kawhmu ໃນເຂດຊົນນະບົດ.
ໃນຄໍາປາໄສທີ່ໝູ່ບ້ານແຫ່ງນຶ່ງໃນວັນເສົາວານນີ້ ທ່ານນາງອອງຊານກ່າວຕໍ່ພວກສະໜັບ
ສະໜຸນທ່ານນາງວ່າ ມັນຈະບໍ່ເປັນເລື້ອງ່າຍ ແຕ່ພວກເຂົາເຈົ້າຈະສາມາດບັນລຸສັນຕິພາບ
ແລະສະຖຽນລະພາບ ຖ້າຫາກພວກເຂົາເຈົ້າສືບຕໍ່ດໍາເນີນງານເພື່ອເປົ້າໝາຍນີ້ຕໍ່ໄປ.
ທ່ານນາງອອງຊານຊູຈີກໍາລັງເຂົ້າແຂ່ງຂັນເພື່ອຊີງເອົາບ່ອນນັ່ງຢູ່ໃນສະພາ ຫລັງຈາກໃຊ້
ເວລາຫລາຍປີທີ່ຖືກກັກຂັງໃຫ້ຢູ່ໃນບໍລິເວນບ້ານເຮືອນ ໃນຂໍ້ຫາຖານທໍາການທ້າທາຍຕໍ່
ອໍານາດປົກຄອງທະຫານ. ທ່ານນາງຫວັງວ່າ ຈະຍາດເອົາບ່ອນນັ່ງບ່ອນນຶ່ງໃນຈໍານວນ
48 ບ່ອນນັ່ງຢູ່ໃນສະພາທີ່ຫວ່າງເປົ່າລົງ ເນື່ອງຈາກພວກຜູ້ແທນເຫລົ່ານີ້ຖືກແຕ່ງຕັ້ງໃຫ້ເຂົ້າ
ຮັບຕໍາແໜ່ງໃນຄະນະລັດຖະບານ ຫລືດໍາລົງຕໍາແໜ່ງອື່ນໆໃນວົງການລັດຖະບານ ໃນການ
ໂອນອໍານາດຈາກລັດຖະບານທະຫານໄປໃຫ້ລັດຖະບານພົນລະເຮືອນໃນປີກາຍນີ້.
ໃນຕົ້ນສັບປະດານີ້ ຜູ້ນໍາຝ່າຍຄ້ານ ໄດ້ເດີນທາງໄປຍັງເຂດສາມຫລ່ຽມປາກແມ່ນໍ້າອີຣາວະດີ
ເປັນເທື່ອທໍາອິດ ນັບແຕ່ປີ 1989 ເປັນຕົ້ນມາໃນຄວາມພະຍາຍາມເພື່ອລະດົມເອົາການ
ສະໜັບສະໜຸນໃຫ້ພັກຂອງທ່ານນາງ ໃນການເລືອກຕັ້ງຮອບພິເສດທີ່ຈະມີຂຶ້ນນີ້.
ແຕ່ເຖິງແມ່ນວ່າ ພັກສັນນິບາດແຫ່ງຊາດເພື່ອປະຊາທິປະໄຕຂອງທ່ານນາງ ຈະຊະນະ
ບ່ອນນັ່ງທັງໝົດໃນການເລືອກຕັ້ງໃນເດືອນເມສາໜ້ານີ້ກໍຕາມ ແຕ່ທ່ານນາງຈະບໍ່ມີຫວັງ
ວ່າ ຈະໄດ້ຮັບສຽງຂ້າງຫລາຍຂອງຈໍານວນບ່ອນນັ່ງທັງໝົດ 440 ບ່ອນຢູ່ໃນສະພາຕໍ່ານັ້ນ.
ສະພາທີ່ວ່ານີ້ແມ່ນຖືກຄອບງໍາເປັນສ່ວນໃຫຍ່ ໂດຍພວກທີ່ຖືກແຕ່ງຕັ້ງຈາກກອງທັບ ແລະ
ພວກພັນທະມິດຂອງອະດີດລັດຖະບານທະຫານ ທີ່ປົກຄອງປະເທດມາແຕ່ກ່ອນນັ້ນ.
