ລິ້ງ ສຳຫລັບເຂົ້າຫາ

ກອງທັບມຽນມ້າປັບ ການຈັດຕັ້ງໃໝ່

  • ສິງ ບູຣົມມະວົງ

ບັນດາ​ນັກວິ​ເຄາະ​ກ່າວ​ວ່າ ການ​ປັບການ​ຈັດຕັ້ງ​ໃໝ່​ແລະ​ການ​ເຄື່ອນ​ໄຫວທາງ​ທະຫານຂອງ​ທະຫານ​ມຽນມ້າ ​ຫວ່າງ​ໄວໆ​ຜ່ານ​ມາ​ນີ້ ​ແມ່ນມີ​ວັດຖຸ​ປະສົງເພື່ອ​ຮັບປະກັນ​ວ່າ​ ກອງ​ທັບ​ແຫ່ງ​ຊາດ​ຈະ​ຍັງ​ຮັກສາ​ອໍານາດ​ໄວ້​ຕໍ່​ໄປ ຫລັງ​ຈາກ​ການ​ເລືອກ​ຕັ້ງ​ໃນ​ວັນ​ທີ 7 ພະຈິກ​ປີ​ນີ້.

ການ​ປັບ​ການຈັດ​ຕັ້ງ​ໃໝ່​ຂອງ​ກອງທັບ​ມຽນມາຄັ້ງ​ຫລ້າ​ສຸດ ທີ່ພົວພັນ​ກັບ​ພວກນາຍ​ທະຫານ​ ຂັ້ນ​ອາວຸ​ໂສ​ຈໍານວນຫລາຍ​ກວ່າ 70 ຄົນ ແມ່ນ​ເປັນ​ການ​ຍົກຍ້າຍ​ແລະ​ສັບ​ຊ້ອນ​ຄັ້ງໃຫຍ່ ​ເທື່ອທີ​ສອງໃນ​ປີ​ນີ້ ​ຂອງ​ພວກ​ສະມາຊິກ​ຂອງ​ລັດຖະບານ​ທະຫານ​ ທີ່​ປົກຄອງ​ປະ​ເທດ​ໃນ​ປັດຈຸບັນ. ໃນ​ວັນ​ທີ 27 ເມສາຜ່ານ​ມາ ເຈົ້າ​ໜ້າ​ທີ່​ຂັ້ນ​ອາວຸ​ໂສ​ຫລາຍ​ຄົນ ຮວມທັງ​ນາຍົກ ລັດຖະມຸນຕີ ນາຍ​ພົນ Thein Sein ນັ້ນ ​ໄດ້​ລາອອກ​ກິນ​ເບ້ຍ​ບໍານານຈາກ​ກອງທັບແລະ​ ​ໄດ້​ມີ​ການຄາດຄະ​ເນ​ກັນ​ວ່າ ພວກ​ທ່ານ​ເຫລົ່າ​ນັ້ນຈະ​ເຂົ້າ​ຮ່ວມ​ໃນ​ພັກຄວາມ​ເປັນ​ເອກກະພາບ​ ແລະ​ການ​ພັດທະນາ​ຂອງ​ສະຫະພາບ​ ທີ່​ທະຫານ​ໜຸນ​ຫລັງ​ນັ້ນ.


ທ່ານ Carl Thayer ນັກ​ວິ​ເຄາະ​ດ້ານ​ການ​ປ້ອງ​ກັນ​ປະ​ເທດ​ຈາກ​ມະຫາ​ວິທະຍາ​ໄລ New South Wales ປະ​ເທດ​ອອ໊ສ​ເຕຣ​ເລຍ ກ່າວ​ວ່າ ການ​ເຄື່ອນ​ໄຫວ​ເຫລົ່າ​ນີ້​ ເປັນ​ພາກສ່ວນ​ນຶ່ງ​ຂອງ​ຍຸດ​ທະ​ສາດ​ ອັນ​ກວ້າງຂວາງ​ຂອງ​ກອງທັບມຽນມ້າ ເພື່ອ​ລວບ​ລວມ​ອໍານາດ​ໃຫ້ເຂັ້ມ​ແຂງ​ຂຶ້ນ ​ກ່ອນ​ການ​ເລືອກ​ຕັ້ງແຫ່ງ​ຊາດໃນ​ວັນ​ທີ 7 ​ເດືອນ​ພະຈິກ​ປີ​ນີ້ ຊຶ່ງ​ທ່ານ Thayer ກ່າວຊີ້​ແຈງ​ດັ່ງ​ນີ້:

“ການສັບ​ຊ້ອນນາຍທະຫານຄັ້ງໃຫຍ່​ເທື່ອ​ທີ​ສອງ​ໄດ້ມີຂຶ້ນ​ແລ້ວ. ພວກນາຍທະຫານ​ເຫລົ່າ​ນີ້ ຈະເຂົ້າໄປຮ່ວມກັບພັກຄວາມ​ເປັນ​ເອກ​ກະພາບແລະການພັດທະນາຂອງ​ສະຫະພາບ ຫລືພັກ USDP ແລະ​ເຂົ້າແຂ່ງຂັນ​ໃນການເລືອກຕັ້ງ ແລະພັກ USDP ກໍໄດ້ເຂົ້າຮ່ວມກັບສະມາຄົມຄວາມ​ເປັນເອກ​ກະພາບແລະການພັດທະນາ ຂອງ​ສະຫະພາບ ທີ່ມີສະມາຊິກເປັນລັດຖະກອນຫລື​ພະນັກງານ​ລັດ ປະມານ 27 ລ້ານຄົນນັ້ນ. ສະ​ຫລູບ​ແລ້ວ ກໍ​ແມ່ນ​ວ່າ ໄດ້ມີ​ການຈັດຕັ້ງພັກ​ການ​ເມືອງ​ທີ່​ໃຫຍ່​ມະຫາສານຂຶ້ນມາ ແລະພ້ອມ​ກັບຂໍ້ຈຳກັດຮັດແຄບຕ່າງໆຂອງການເລືອກຕັ້ງ ທີ່ ໄດ້ປະກາດອອກມາ ໃນເດືອນນີ້ແລ້ວ ພັກ​ທີ່​ວ່ານີ້ກໍ​ແມ່ນ​ຈະລອຍ​ເຂົ້າສູ່​ການ​ ເລືອກ​ຕັ້ງ ​ແລະ​ກໍ​ຈະຊະນະການເລືອກຕັ້ງໃນທີ່ສຸດ​.”


ຫລັງ​ຈາກ​ການປ່ອນ​ບັດ​ແລ້ວ ສະພາ​ຜູ້​ແທນ​ລັດຖະດອນທີ່​ມີ 440 ບ່ອນ​ນັ່ງ ​ທີ່​ຖືກ​ເລືອກ​ຕັ້ງ ​ຂຶ້ນ​ມາໃໝ່ນັ້ນ ຈະ​ປະກອບ​ດ້ວຍ​ຜູ້​ແທນ​ທະຫານ 110 ຄົນ ແລະ​ຜູ້​ແທນພົນລະ​ເຮືອນ 330 ຄົນທີ່​ປະຊາຊົນ​ປ່ອນ​ບັດເອົາ. ສ່ວນ​ຢູ່ໃນ​ສະພາ​ຊົນ​ຊາດ​ທີ່​ມີ 224 ບ່ອນ​ນັ່ງ​ນັ້ນ 168 ບ່ອນແມ່ນຈະ​ຖືກປະຊາຊົນປ່ອນ​ບັດ​ເອົາ ​ແລະ 56 ບ່ອນ​ແມ່ນ​ຮັກສາ​ໄວ້​ໃຫ້​ພວກ​ທະຫານ.


ມີ​ພັກ​ການ​ເມືອງ​ຫລາຍ​ກວ່າ 40 ພັກ ເຂົ້າ​ປະກອບ​ສ່ວນ​ໃນ​ການ​ເລືອກຕັ້ງ​ຄັ້ງ​ນີ້. ​ແຕ່​ພັກ​ ຝ່າ​ຍຄ້ານຊັ້ນ​ນໍາ​ ຄື​ພັກ​ສັນນິບາດ​ແຫ່ງ​ຊາດເພື່ອປະຊາທິປະ​ໄຕ​ ພາຍ​ໃຕ້​ການ​ນໍາພາ​ຂອງ​ທ່ານ ​ນາງ​ອອງຊານ​ຊູ​ຈີ ທີ່​ໄດ້ຮັບ​ລາງວັນ​ໂນ​ແບນ​ຂະ​ແໜງ​ສັນຕິພາບນັ້ນ ​ໄດ້ພາກັນ​ຂວໍ້າ​ບາດ​ ການເລືອກຕັ້ງ​ ເພື່ອ​ປະ​ທ້ວງ​ກົດ​ລະບຽບ​ການ​ເລືອກ​ຕັ້ງ​ຕ່າງໆ​ ທີ່​ຫ້າມ​ທ່ານ​ນາງ​ແລະ​ພວກ​ລູກ​ນ້ອງ​ຄົນ​ສໍາຄັນ​ອື່ນໆ​ ບໍ່​ໃຫ້​ເຂົ້າ​ປະກອບສ່ວນນໍາ.


ທ່ານ Thayer ​ເຊື່ອ​ວ່າ ນາຍ​ພົນ Than Shwe ຜູ້​ນໍາ​ລັດຖະບານທະຫານ ມີ​ທ່າ​ທາງ​ວ່າ​ຈະ​ຖືກ ​ແຕ່ງ​ຕັ້ງ​ໃຫ້​ເປັນ​ປະທານາທິບໍດີ​ ຫລັງ​ຈາກການ​ເລືອກ​ຕັ້ງ. ທ່ານ Thayer ຍັງ​ກ່າວອີກ​ວ່າ ປາກົດ​ວ່າພວກ​ທະຫານ​ມຽນມາ​ກໍາລັງເອົາ​ແບບຢ່າງ​ດຽວ​ກັນ​ກັບອັນ​ທີ່​ເອີ້ນ​ວ່າ “New Order” ຫລື ລະບົບ​ໃໝ່ ຂອງ​ອິນ​ໂດ​ເນ​ເຊຍ ພາຍ​ໃຕ້​ການ​ນໍາພາ​ຂອງ​ມື້​ລາງ​ປະທານາທິ ບໍດີ ຊູ​ຮາກໂຕ​ ໃນ​ຊຸມ​ປີ 1960.

ໃນ​ສະ​ໄໝນັ້ນ ປະທານາທິບໍດີ​ຊູ​ຮາກ​ໂຕ​ໄດ້​ເຮັດ​ໃຫ້​ເປັນ​ທີ່​ແນ່ນອນວ່າ​ ພວກ​ທະຫານ​ໄດ້​ມີ ​ບົດບາດ​ສໍາຄັນ​ໃນ​ວົງ​ການ​ລັດຖະບານ ​ແລະ​ຄວບຄຸມການຈັດ​ຕັ້ງ​ດ້ານ​ການເມືອງ​ແລະ​ສັງຄົມ​ຕ່າງໆ​. ນອກ​ນັ້ນ​ ພາຍ​ໃຕ້ລະບົບ​ໃໝ່​ດັ່ງກ່າວ ອິນ​ໂດ​ເນ​ເຊຍຍັງ​ໄດ້​ທໍາ​ການ​ປາບ​ປາມ​ພວກ​ຄັດຄ້ານ​ລັດຖະບານ ຢ່າງ​ມີ​ປະສິດທິ​ຜົນ​ນໍາ​ເຊ່ນ​ກັນ. ບັນດາ​ນັກວິ​ເຄາະ​ເຫດການ​ກ່າວ​ວ່າ ​ໃນ​ບັ້ນ​ສຸດ​ທ້າ​ຍນັ້ນ ລະບົບ​ໃໝ່​ຂອງອິນ​ໂດ​ເນ​ເຊຍ​ ​ໄດ້​ຖືກບ່ອນ​ທໍາລາຍ​ໂດຍ​ຄວາມ​ເຫັນ​ແກ່ ຍາດຕິ​ພີ່ນ້ອງ ການ​ສໍ້​ລາດບັງ​ຫລວງ ​ແລະ​ການ​ສົມຮູ້​ຮ່ວມ​ຄິດ​ກັນ​ ທີ່​ໄດ້​ພາ​ໃຫ້​ການ​ສະໜັບ ສະ​ໜຸນ​ສໍາລັບ​ມື້​ລາງ​ທ່ານ​ຊູ​ຮາກ​ໂຕ ​ເຫືອດແຫ້ງ​ລົງ​ນັ້ນ.


ນາງ Debbie Stothardt ໂຄສົກ​ຍິງ​ປະ​ຈໍາ​ກຸ່ມ​ປົກ​ປ້ອງ​ສິດທິ​ມະນຸດ Alternative ASEAN Network ຫລື​ເຄືອ​ຂ່າຍ​ທາງ​ເລື​ອກອາ​ຊ່ຽນ ກ່າວ​ວ່າ ບັນດາ​ກຸ່ມ​ປົກ​ປ້ອງ​ສິດທິ​ມະນຸດ​ແລະ​ຫລາຍ​ປະ​ເທດ​ໃນ​ປະຊາ​ຄົມ​ໂລກ​ ຖື​ວ່າການ​ເລືອກ​ຕັ້ງ​ໃນ​ມຽນມາ​ຄັ້ງ​ນີ້ເປັນ​ການ ເລືອກ​ຕັ້ງ​ຈອມ​ປອມ​ແລະຫລອກ​ລວງ​ ຊຶ່ງມີ​ວັດຖຸ​ປະສົງເພື່ອ​ອໍານວຍ​ໃຫ້​ພວກ​ທະຫານ​ ມີ​ຖານະ​ທີ່ຖືກຕ້ອງ​ຕາມ​ກົດໝາຍຢູ່​ພາຍ​ໃນ​ປະ​ເທດ​. ນາງ Stothardt ກ່າວ​ຊີ້​ແຈງ​ວ່າ:


“ມັນສຳຄັນ​ທີ່​ເຮົາຈະ​ຕ້ອງຮັບ​ຮູ້​ວ່າ ອໍານາດ​ປົກຄອງ​ມຽນມາ​ນັ້ນ ​ບໍ່​ແມ່ນ​ພຽງ​ແຕ່ ຊອກ​ຫາ​ສະຖານະ​ພາບ​ທີ່​ຖືກຕ້ອງ​ຕາມ​ກົດໝາຍ​ ​ໃນ​ສາຍຕາ​ຂອງນາໆ​ຊາດເທົ່າ​ນັ້ນ ​ແຕ່​ເປັນ​ທີ່​ແລ​ເຫັນ​ໄດ້​ຢ່າງ​ແຈ່ມແຈ້ງ​ຫລາຍ​ຂຶ້ນເລື້ອຍໆວ່າ ການ​ເລືອກ​ຕັ້ງ​ຄັ້ງ​ນີ້​ແມ່ນ​ກໍາລັງ​ຖືກຈັດແຈງ​ຂຶ້ນ ​ໃນ​ທາງ​ທີ່​ຈະ​ເຮັດໃຫ້​ອໍາ​ນາດ​ປົກຄອງນີ້ ມີ​ສະຖານະ​ພາບ​ທີ່​ຖືກຕ້ອງ​ຕາມ​ກົດ​ໝາຍໃນ​ສາຍຕາ​ຂອງ​ປະຊາຊົນພາຍ​ໃນ​ປະ​ເທດ​ເຊ່ນ​ກັນ. ​ໃນ​ຄວາມ​ຄິດ​ຂອງ​ພວກ​ເຂົາ​ແລ້ວ ​ແມ່ນພວກ​ເຂົາ​ຕ້ອງການຢາກ​ຈະສະ​ເ​ເດ​ງ​ໃຫ້​ເຫັນວ່າ​ ຄະນະຜູ້ນຳ​ທະຫານ​ຂອງ​ພວກ​ເຂົາ​ນັ້ນ​ ໄດ້​ຖືກ​ເລືອກ​ຕັ້ງ​ໃຫ້​ເປັນ​ຜູ້ນຳ ລັດຖະບານ ຢ່າງ​ຖືກຕ້ອງ​ຊອບ​ທໍາ.”


ອໍານາດປົກຄອງທະຫານ​ມຽນມາ​ໄດ້​ເວົ້າ​ມາ​ແຕ່​ດົນ​ນານ​ແລ້ວວ່າ​ ຕົນ​ຈໍາ​ເປັນຕ້ອງຄອບ​ງໍາ​ເວທີ ການ​ເມືອງຂອງ​ປະ​ເທດ ​ຍ້ອນມີ​ຂະ​ບວນການ​ແບ່ງ​ແຍກ​ດິນແດນ​ຢູ່ໃນ​ປະ​ເທດ​. ​ແຕ່​ລັດຖະບານ​ຫລາຍ​ປະ​ເທດ ຮວມທັງສະຫະລັດ ​ໄດ້​ວາງ​ມາດຕາການ​ລົງ​ໂທດ​ຕໍ່​ມຽນມາ ​ຍ້ອນ​ການລະ​ເມີດ​ສິດທິມະນຸດ​ຕ່າງໆ​ ແລະ​ການ​ປາບ​ປາມ​ດ້ານ​ການ​ເມືອງ​ນັ້ນ.


ຫວ່າງ​ໄວໆ​ມາ​ນີ້ ສະຫະລັດ​ກໍ​ໄດ້ໃຫ້ການ​ສະໜັບສະໜຸນ ຕໍ່ການ​ຈັດ​ຕັ້ງ​ຄະນະ​ກໍາມະການ ​ຂຶ້ນ​ມາສືບສວນ​ສອບ​ສວນ​ ກ່ຽວ​ກັບ​ອາຊະ​ກໍາ​ສົງຄາມ​ແລະ​ອາຊະ​ຍາກໍາ​ຕ້ານ​ມະນຸດຊາດ ​ທີ່ພວກຜູ້​ນໍາ​ທະຫານມຽນມາ ​ອາດ​ໄດ້ກໍ່​ຂຶ້ນ ​ໃນ​ຫວ່າງບໍ່​ເທົ່າ​ໃດ​ທົດ​ສະ​ວັດ​ຜ່ານ​ມາ​ນີ້.

XS
SM
MD
LG