ສຽງຍິງປືນຫຼາຍລູກໄດ້ດັງຂຶ້ນ ໃນຄືນວັນອາທິດວານນີ້ ໃກ້ກັບບ້ານຂອງປະທານາທິບໍດີ ເບີກິນາ ຟາໂຊ ຫຼັງຈາກພວກທະຫານໄດ້ກໍ່ກະບົດຢູ່ຄ້າຍທະຫານຫຼາຍແຫ່ງ ເພື່ອຮຽກຮ້ອງໃຫ້ປົດຜູ້ບັນຊາການທະຫານຂອງປະເທດ ແລະ ຂໍງົບປະມານເພີ່ມເຕີມເພື່ອຕໍ່ສູ້ກັບພວກແບ່ງແຍກດິນແດນ ອິສລາມ.
ຜູ້ອາໄສຢູ່ໃນທ້ອງຖິ່ນຍັງໄດ້ລາຍງານວ່າເຂົາເຈົ້າເຫັນ ເຮລິຄັອບເຕີ ບິນຢູ່ເໜືອທີ່ພັກສ່ວນຕົວ ຂອງປະທານາທິບໍດີ ຣອດຈ໌ ມາກ ຄາບໍເຣ (Roch Marc Kabore) ໃນນະຄອນຫຼວງ ອວາກາດູກູ (Ouagadougou).
ມັນໄດ້ເກີດຂຶ້ນຫຼັງຈາກການຍິງປືນໃນຕອນເຊົ້າວັນອາທິດວານນີ້ຢູ່ຄ້າຍທະຫານບົກຫຼາຍແຫ່ງ, ຈົນກໍ່ໃຫ້ເກີດຄວາມຢ້ານກົວ ກ່ຽວກັບ ການກໍ່ລັດຖະປະຫານອີກຄັ້ງນຶ່ງ ໃນປະເທດທີ່ເອົາແນ່ບໍ່ໄດ້ ໃນພາກຕາເວັນຕົກຂອງ ອາຟຣິກາ ເຊິ່ງມີແນວໂນ້ມທີ່ຈະຖືກທະຫານເຂົ້າຄວບຄຸມນັ້ນ.
ໃນຂະນະດຽວກັນ, ພວກປະທ້ວງທີ່ປະທ້ວງ ກ່ຽວກັບ ການຮັບມືຂອງລັດຖະບານຕໍ່ໄພຂົ່ມຂູ່ຂອງພວກ ຈີຮາດ ໄດ້ຈູດໄຟເຜົາສຳນັກງານໃຫຍ່ຂອງພັກທີ່ກຳລັງປົກຄອງປະເທດ.
ແຕ່ລັດຖະບານໄດ້ປະຕິເສດຂ່າວລື ກ່ຽວກັບ ການພະຍາຍາມຍາດຊິງອຳນາດຢ່າງວ່ອງໄວ ແລະ ລາຍການຂອງຄຳຮຽກຮ້ອງທີ່ຖືກສະເໜີໂດຍກຳລັງທະຫານກະບົດບໍ່ໄດ້ກ່າວເຖິງການພະຍາຍາມທີ່ຈະຂັບໄລ່ທ່ານ ຄາບໍເຣ, ໃນຂະນະທີ່ໄດ້ກ່າວຢໍ້າເຖິງຄວາມຈຳເປັນສຳລັບແຜນຍຸດທະສາດການຕໍ່ຕ້ານພວກ ຈີຮາດ ທີ່ດີກວ່າເກົ່າ.
“ພວກເຮົາຢາກມີງົບປະມານທີ່ພຽງພໍສຳລັບການຕໍ່ສູ້” ຕ້ານພວກຫົວຮຸນແຮງ ອິສລາມ, ທະຫານຄົນນຶ່ງຈາກຖານທັບ ຊານກູເລ ລາມີຊານາ (Sangoule Lamizana) ໃນນະຄອນຫຼວງ ອວາກາດູກູ ໄດ້ກ່າວໃນບັນທຶກສຽງທີ່ໄດ້ຮັບໂດຍອົງການຂ່າວ AFP.
ພວກທະຫານທີ່ບໍ່ໄດ້ຖືກກະທົບຍັງຢາກໃຫ້ນາຍພົນລະດັບສູງ “ຖືກສັບປ່ຽນ,” ຮັກສາບາດແຜຂອງກຳລັງທະຫານໃຫ້ດີກວ່າເກົ່າ ແລະ ການສະໜັບສະໜູນຫຼາຍຂຶ້ນສຳລັບບັນດາຄອບຄົວທະຫານທີ່ເສຍຊີວິດໃນການຕໍ່ສູ້, ໂຄສົກສຳລັບກອງທະຫານກະບົດ ໄດ້ກ່າວໃນບັນທຶກສຽງທີ່ບໍ່ປະສົງອອກຊື່.
ບັນດາເຈົ້າໜ້າທີ່ໄດ້ປະກາດການຫ້າມອອກບ້ານຂ້າມຄືນຈາກ 8 ໂມງແລງຕາມເວລາໃນທ້ອງຖິ່ນ ຂອງວັນອາທິດວານນີ້ “ຈົນກວ່າຈະມີແຈ້ງການຕໍ່ໄປ” ແລະ ກະຊວງສຶກສາໄດ້ກ່າວວ່າໂຮງຮຽນຈະຖືກປິດໃນວັນຈັນ ແລະ ວັນອັງຄານ ທົ່ວປະເທດທີ່ທຸກຍາກ ແລະ ບໍ່ມີທາງອອກສູ່ທະເລດັ່ງກ່າວ.
