ພວກປະທ້ວງ ຊາວພຸດ ໂຈມຕີຫ້ອງການ ອົງການຊ່ອຍເຫຼືອ ໃນມຽນມາ (ວີດີໂອ)

ເຈົ້າ​ໜ້າ​ທີ່​ມຽນມາ ກ່າວ​ວ່າ ພວກປະທ້ວງສາສະໜາພຸດກຸ່ມນຶ່ງ ​
ໄດ້​ທຳ​ການ​ໂຈມ​ຕີ​ຫ້ອງການຂອງ​ກຸ່ມ​ຊ່ອຍ​ເຫຼືອນາໆ​ຊາດ​ທີ່ລັດ
ຣາໄຄ ​ທີ່​ມີ​ຄວາມ​ວຸ້ນ​ວາຍ​ທາງ​ພາກ​ຕາ​ເວັນ​ຕົກ​ຂອງ​ປະ​ເທດ​.

ຕຳຫຼວດ​ກ່າວ​ວ່າ ມີ​ຫຼາຍໆ​ຮ້ອຍ​ຄົນ​ໄດ້​ຫ້ອມລ້ອມ​ຫ້ອງການ
ໄວ້ ແລະ​ພາກັນ​ແກ່ວ​ງກ້ອນ​ຫີນ​ໃສ່​ຫ້ອງການຂອງອົງການ
Malterser International ​ໃນ​ແລງ​ວັນ​ພຸດວານ​ນີ້ໃນ​ເມືອງ
Sittwe.

ເຈົ້າໜ້າທີ່​ກ່າວ​ວ່າ ເວລາ​ຄວາມ​ພະຍາຍາມ​ທີ່​ຈະທັບ​ມ້າງ​ຝູງຊົນ​
ໃຫ້​ແຕກ​ພ່າຍໜີໄປ​ ​ໄດ້​ລົ້ມ​ແຫຼວລົງແລ້ວນັ້ນຕຳຫຼວດ​ໄດ້​ຍິງ​ປືນ​ຫຼາຍ​ນັດຂຶ້ນ​ຟ້າ​ເພື່ອ ສົ່ງ​ສັນຍານເຕືອນ.

ແຕ່ບໍ່​ມີ​ລາຍ​ງານ​ວ່າ ມີຜູ້ໃດບາດເຈັບລົ້ມຕາຍ.

ພວກ​ທີ່ຢູ່​ອາ​ໄສ​ໃນ​ຂົງ​ເຂດ ໄດ້​ກ່າວ​ວ່າ ຄວາມ​ບໍ່​ສະ​ງົບ​ຍັງ​ສື​ບຕໍ່ດຳເນີນມາ ​ໃນ​ວັນ​ພະຫັດ​ມື້​ນີ້ ​ໂດຍ​ທີ່ມີການ​ໂຈມ​ຕີ​ຢ່າງເປັນ​ຂະ​ບວນການ ຕໍ່ບ່ອນຢູ່ຂອງ​ກຸ່ມ​ພະນັກ
ງານ​ຊ່ອຍ​ເຫຼືອນຳ.

​ໄດ້​ມີ​ພະນັກງານ​ຂອງ​ສະມາຊິກອົງການ Malterser International ຫລາຍໆຄົນ
ຖືກຈັດ​ໃຫ້​ຢູ່​ພາຍ​ໃຕ້​ການ​ຄຸ້ມ​ຄອງ​ຂອງ​ພວກ​ຕຳຫຼວດ.

ຕຳຫຼວດ​ກ່າວ​ວ່າ ພວກ​ປະ​ທ້ວງແມ່ນຄຽດ​ແຄ້ນ ​ເພາະວ່າ ​ໄດ້​ມີ​ລາຍ​ງານ​ວ່າມີ​ບາງ​ຄົນ ​ໃນ​ອົງການ​ໃຫ້ການ​ຊ່ອຍ​ເຫຼືອຂອງ​ເຢຍຣະມັນດັ່ງກ່າວ​ໄດ້ຍ້າຍທຸງສາສະໜາ​ພຸດ​ອອກ ໄປຈາກ​ຕໍ່ໜ້າອົງການດັ່ງກ່າວ.

ຊາວພຸດ ໄດ້​ນຳເອົາ​ທຸງ​ສາສະໜາ ມາປັກໄວ້​ທີ່ໝູ່​ບ້ານ ຊຶ່ງ​ເປັນສ່ວນນຶ່ງຂອງ​ການ​ປະ​ ທ້ວງ​ຕໍ່ຊາວມຸສລິ​ມໂຣຮິງ​ຢາ ຊຶ່ງເປັນຊົນກຸ່ມນ້ອຍຂອງມຽນມາ​ນັ້ນ.

ສະມາຊິກ​ຂອງ​ຊົນເຜົ່າຣະ​ໄຄ ສ່ວນ​ໃຫຍ່ນັ້ນແມ່ນ​ເປັນຜູ້ທຳການໂຈມ​ຕີຢ່າງຮ້າຍແຮງ ຫຼາຍໆ ຄັ້ງ ຕໍ່​ຊາວ​ໂຣຮິງ​ຢາ ​ໃນ​ຮອບຫຼາຍໆປີທີ່ຜ່ານມາ.

​ໄດ້​ມີ​ເຖິງ 280 ຄົນ​ແລ້ວ​ເສຍ​ຊີວິດ ​ໃນ​ການ​ກໍ່​ຄວາມ​ຮຸນ​ແຮງ​ນີ້ ​ແລະ​ມີ 140 ພັນ​ຄົນ
​ໄດ້ຫລົບ​ໜີ​ໄປອອກ​ຈາກ​ບ້ານ​ເຮືອນ​ຂອງ​ພວກ​ເຂົາ​ເຈົ້າ.

​ມີ​ຄວາມ​ຢ້ານ​ກົວ​ກັນວ່າ ​ຄວາມ​ເຄັ່ງ​ຕຶງ​ລະຫວ່າງ ຊາວຣາໄຄທີ່ນັບຖືສາສະໜາ​ພຸດ ​ແລະ​ຊາວ ໂຣຮິງ​ຢາ ຊຶ່ງເປັນມຸສລິ​ມ ຈະ​ເພີ່ມ​ທະວີ​ຂຶ້ນ ກ່ອນການສຳຫລວດສຳມະໂນ
ຄົວໃນທົ່ວປະເທດ ຊຶ່ງ​ຈະ​ເລີ້​ມຂຶ້ນ​ ໃນ​ວັນ​ອາທິດ​ຈະ​ມາ​ເຖິງ​ນີ້.

ເບິ່ງວີດີໂອກ່ຽວຂ້ອງ:
​